Biblica® Open Nkanda wu Moyo, Nguizani Yimona ayi Minkunga 2002
Minkunga 75
Nzambi wela sambisa ntoto
Nkunga Asafi kuidi pfumu minyimbidi “Kadi vonda”.
Tueti kuvutudila matondo, a Nzambi.
Tueli vutula matondo bila dizina diaku didi difikama
batu balembo yolukila matsiminanga maku.
Ngeyo tubidi : “tsobudi thangu yifuana
Keti minu ndieti sambisa mu bufuana.
Ntoto bu wulembo nikuka va kimosi ayi batu bandi boso
Keti minu ndisimbidila makunzi mandi.
Kuidi nkua luniemo, ndintuba : ‘Kadi kukiniemisanga ngolo’
Kuidi batu bambimbi : ‘lubika vumbula ziphoka zieno.’
Lubika vumuna ziphoka zieno mu diambu di diyilu ;
bikanu tubila mu nonumuna madinga !”
Kadi mutu wumosi tona ku Esite voti ku Wesite
voti tona ku dikanga wulenda yayisa mutu.
Vayi Nzambi niandi weti sambisa ;
niandi weti kulula wunkaka, niandi weti yayisa wunkaka.
Mu koko ku Yave muidi mbungu yiwala vinu kingolo
ayi yisobokoso.
Wulembo dukula kiawu ayi batu boso bambimbi
badi va ntoto bela nua kiawu
nate kuna dibomvi.
Vayi minu, ndiela samunanga mawu
mu thangu zioso.
Ndiela yimbidila nzitusu
kuidi Nzambi yi Yakobi.
Ndiela zenga ziphoka zi batu boso bambimbi,
vayi ziphoka zi batu basonga
luela nanguku.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.