Minkunga 58

Nzambi widi zuzi disonga

Nkunga Davidi kuidi pfumu minyimbidi “kadi vonda”.

1A buevi, beno bapfumu, mu busonga lueti yolukilanga e ?

Mu bufuana lueti sambisilanga batu e ?

2Nana ! Mu mintima mieno, lueti yindula makambulu masonga

ayi mioko mieno milembo muangisa makhemi va ntoto.

3Tona mu mbutukulu, batu bambimbi beti zimbala ;

tona mu vumu, ntu ngolo badi ayi bantubanga luvunu.

4Mitsa miawu midi banga mitsa mi nioka,

banga kusa kizibikidi matu mandi

5kinkambu wa mbembo yi batu bansakisanga zinioka ;

mbembo yi ndoki yiyenda tsangu.

6Kola meno mu miunu miawu, a Nzambi ;

vuza, a Yave, meno ma zikhosi.

7Bika balalakana banga maza ma nkumba !

Mu thangu bambansula mimbasa miawu,

bika madionga mawu maba makambu tsongi

8banga khodi yinsiuta bu yilembo diati ;

banga muana wusuluka bika kabika mona thangu.

9Tuamina zinzungu zieno zimona diamu di zitsendi

ziba zinlangu voti ziyuma,

batu bambimbi bela kombulu.

10Basonga bela mona khini

bu bela mona landi kioki bela kuba vutudila ;

bela sukula malu mawu mu menga ma batu bambimbi.

11Batu bela tuba :

“Bukiedika ; basonga bantambulanga mfutu mu kadika thangu.

Bukiedika vadi Nzambi weti sambisa va ntoto.”