Minkunga 39

Va ntuala lufua

Nkunga Davidi kuidi Yedutuni, pfumu minyimbidi.

1Minu ndituba : “ndiela sunga zinzila ziama

ayi ndiela keba ludimi luama mu masumu.

Ndiela tula luvambu mu munuꞌama mu zithangu zioso

batu bambimbi bela banga ku ntuala meso mama.”

2Bu ndiba dio sui ayi ndidingalala

ayi bu ndisia tuba kadi diambu ko.

Vayi ziphasi ziama buelama na buelama zilembo zibuelama.

3Ntimꞌama wulema mu khati nitu ama ;

ayi bu ndiyindula, buna mbazu yilema.

Diawu nditumbu tubila mu ludimi luama :

4“Wumbonisa, a Yave tsukulu yi luzingu luama ;

ayi thalu yi bilumbu biama

bika wunzabikisa ti luzingu luama vioka lu mvioka !

5Ngeyo wuvanga bilumbu biama

siadila banga dikanda diama

Tezo ki mimvu miama kisi ko kadi mfunu va ntanlꞌaku.

Kadika luzingu lu mutu luidi kaka phemo.

6Mutu widi khatika kimbindi

bu keti kuenda ayi vutuka weti banga mayindu, vayi mu phamba kuandi ;

weti kupika bima vayi kakadi zaba nani wela bitota.

7Vayi buabu, Yave, mbi mfueti vingila e ?

Diana diama didi mu ngeyo.

8Wuphukisa mu zinzimbala ziama zioso ;

kadi kundiekula ndikituka sekonono ki bivulu.

9Ndiba dio sui ; ndisia zibula munu ama ko

bila ngeyo wuvanga buawu.

10Wuphengumunina nsongo aku.

Ndieka suka mu diambu di bikoti bi mioko miaku.

11Ngeyo weti tubidila ayi weti vana batu thumbudulu

mu diambu di masumu mawu.

Ngeyo weti zinisa kimvuama kiawu banga kiphepele

kadika mutu widi phemo.

12Wa lusambulu luama ; a Yave !

Dimba yamikina kuama mu diambu di lusadusu.

Kadi lasakana mu bidilu biama ;

bila ndieti kalanga yaku va kimosi banga nzenza,

banga nkibi, banga bakulu bama boso.

13Wuphengumunina thaluꞌaku

muingi ndimona diaka khini

tuamina ndunda ayi ndibika buela monika.”