Biblica® Open Nkanda wu Moyo, Nguizani Yimona ayi Minkunga 2002
Minkunga 24
Yave kotidi mu buangu kiandi kinlongo
Nkunga Davidi.
Ntoto widi wu Yave ayi bibioso bidi mu wawu ;
nza ayi babo banzinganga muawu.
Bila niandi wutunga ntoto va mbata mimbu
ayi wukindisa wawu va mbata minlangu.
Nani wulenda kuma ku mongo wu Yave ?
Nani wulenda telama va buangu kiandi kinlongo e ?
Woso mutu widi mioko misukulu
ayi ntima wuvedila ;
woso mutu wunkambu vumuna muelꞌandi kuidi bitumba,
Voti wunkambu levanga ndefi mu mambu ma luvunu.
Wela tambula lusakumunu luela ba kuidi Yave,
ayi ndungunu Nzambi yi Mvulusi andi.
Buawu bobo buididi tsungi yi batu bakuntombanga,
yi bawu bantombanga zizi kiaku,
a Nzambi yi Yakobi.
Luvumbula mintu mieno, beno mielo !
Luvumbuka beno mielo mikhulu !
Muingi ntinu wu nkembo kakota.
Nani ntinu wu nkembo e ?
Keti Yave, nkua ngolo ayi nkua lulendo !
Keti Yave, nkua lulendo mu zimvita !
Luvumbula mintu mieno, beno mielo !
Luvumbuka beno mielo mikhulu !
Muingi ntinu wu nkembo kakota.
Nani wowo ntinu beni wu nkembo e ?
Keti Yave, pfumu yi minkangu mi masodi.
Niandi ntinu wu nkembo.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.