Minkunga 146

Yave weti nungisa batu bayamusu

1Luzitisa Yave ;

Zitisa Yave, a muelꞌama.

2Ndiela zitisanga Yave mu luzingu luama loso ;

ndiela yimbidilanga Nzambi ama minzitusu

thangu yoso ndizingila.

3Kadi tula diana dieno mu bana ba mintinu,

mu batu bobo beti fua, bobo balendi vukisa ko.

4Pheve awu yawu kuenda buna beti vutuka mu ntoto ;

zikhanu ziawu zilalikini.

5Lusakumunu kuidi mutu wowo widi ti Nzambi yi Yakobi

niandi nsadisi andi ;

wuntulanga diana diandi mu Yave, Nzambi andi,

6mvangi wu diyilu, ntoto, mbu ayi bibio bidi muna ;

widi wukuikama mu zithangu zioso.

7Niandi weti vavila mambu ma bobo beti yamusu,

ayi wumvananga bidia kuidi bobo badi nzala ;

Yave niandi weti totula batu bobo badi mu nloko.

8Yave weti vana kiezila kuidi phofo,

Yave weti vumbula bobo badi bakomvama.

Yave weti zola batu basonga.

9Yave weti sunga nzenza,

niandi wunkindisanga muana sana ayi difuola

vayi weti kakumukina zinzila zi batu bambimbi.

10Yave wunyalanga mu zithangu zioso.

Nzambi aku, a Sioni, mu zitsungi zioso.

Luzitisa Yave.