Efeso 1

Zimboti

1Polo, mvuala wu Yesu Klisto mu luzolo lu Nzambi, fidisidi nkanda kuidi banlongo badi ku Efeso ayi kuidi bobo badi bakuikama mu Yesu Klisto.

2Bika Nzambi Dise dieto ayi Pfumu eto Yesu Klisto baluvana nlemvo ayi ndembama.

LUVULUSU LUIDI MU KLISTO

Nlemvo wu Nzambi mu Klisto.

3Bika Nzambi kakemboso,

niandi Dise di Pfumu eto Yesu Klisto !

Niandi wutusakumuna mu zitsakumunu zioso

zi phila mu phila zi kipheve mu Diyilu mu Klisto.

4Tuamina tula zifundasio zi ntoto,

Nzambi wutusobula mu niandi

mu diambu tuba banlongo

ayi batu bakambulu tsembolo va ntualꞌandi

5Bu didi ti niandi wutuzola,

wutukubika tona thama

muba bana bandi

mu Yesu Klisto ;

boso buididi luzolo luandi.

6Mu diambu tusanisina

Nkembo wu nlemvo wu katuvanina

mu kiluzolo kiandi.

7Mu niandi, beto tukudulu mu menga mandi ;

tutambudila nlemvo mu masumu meto

boso buididi kimvuama ki nlemvoꞌandi.

8Wowo Nzambi kadukula mu

buwombo, mu beto, mu nzila

yi nzayulu ayi diela di phila mu phila.

9Niandi wutuzabikisa matsueki ma luzolo luandi

boso bubela lukanu luandi lumboti

lukakitezila mu niandi.

10Mu diambu di dedikisa luawu

zithangu bu ziela fuana :

kutikisa va kimosi bima bioso mu Klisto

biobi bidi ku diyilu ayi biobi bidi va ntoto

11Mu diambu diandi beto tutambudi kuku kieto ki phulusu

boso buididi lukanu lu mutu wowo

wumvanganga bima bioso

mu luzolo luandi veka.

12Mu diambu tusanisina nkembo andi,

beto tuba batheti mu

tula diana dieto mu Klisto.

13Mu niandi beno mamveno,

bu lumana wa mambu ma kiedika,

Nsamu wumboti wu phulusu eno,

mu niandi luwilukila ayi lutudulu dimbu,

pheve yinlongo yoyo yivanunu tsila.

14Pheve yinlongo yidi dimbu mu kutumonisa

ti tuela tambula kiuka kieto mu diambu

di khudulu yi batu bobo Nzambi,

kakibakila mu diambu di sanisina nkembo andi.

Lusambulu lu Polo mu diambu di basi Efeso

15Diawu tona mamvama bu ndiwilu buididi minu kieno mu Pfumu Yesu ayi luzolo luidi yeno mu banlongo boso ; 16ndivonganga ko mu kuluvutudilanga matondo kuidi Nzambi. Ndieti kulutebukilanga moyo mu zitsambulu ziama ; 17mu diambu Nzambi yi Pfumuꞌeto Yesu Klisto, dise di nkembo kaluvana pheve yi nzayulu ayi yi tsongolo muingi lunzaba bumboti, 18muingi kakienzula diela dieno ayi lusudika boso buididi diana diodi Nzambi kalutedila ayi boso buididi kimvuama ki nkembo wu kiuka kiandi va khatitsika banlongo ; 19ayi boso buididi bunneni bu lulendo lolo luidi mu beto tuwilukila ; boso buididi lulendo lu zingolo ziandi. 20Wumonisa lulendo beni bu kafulukisa Klisto mu bafua ayi bu kamvuandisa va koko kuandi ku lubakala, mu Diyilu ; 21va yilu luyalu loso, kikulutu kioso, lulendo loso, kipfumu kioso ayi va yilu dizina dioso dizabikini ; bika sia ti mu tsungi yayi kaka vayi nate mu tsungi yela kuiza. 22Wutula bima bioso ku tsi bitambi biandi ayi wumbieka Pfumuyi bima bioso mu Dibundu. 23Dibundu diawu nitu andi, fuluka ku mutu wowo wumfulusanga bima bioso mu bibuangu bioso.