Mikunga 95

Na ntangu ya kubelama na ntadisi ya Yave

1Beno kwiza, beto sala milolo ya nsayi samu na Yave!

Beto looka na nsayi samu na ditadi ya nene yina ke vuukisaka beto!

2Beto kwenda na mantwala ya yandi na mikunga ya nzitusu,

beto kembila yandi na mikunga.

3Ya tsyelika, Yave kele Nzambi ya nene,

yandi kele ntinu ya nene na zulu ya banzambi nyonso.

4Ni yandi ke simbaka balufulu ya ntoto na maboko ya yandi,

bansongi ya myongo kele ya yandi.

5Mubu kele ya yandi, ni yandi salaka yawu,

ntoto ya kuyuma mpe ni yandi yidikaka yawu na maboko ya yandi.

6Beno kwiza, beto finama,

beto yinama, beto fukama na ntadisi ya Yave. Ni yandi yidikaka beto.

7Samu ti yandi kele Nzambi ya beto,

beto kele bantu ya yandi mpe yandi kele Muvungi ya beto,

mameme yina yandi ke na kutwadisa na diboko ya yandi.

Bubu yayi kana beno kuwa ndinga ya yandi:

8«Beno kukanga ve bantima ya beno mutindu salaka bankooko ya beno kuna na Meliba,

mutindu na Masa, kuna na yinsi ya kuyuma.

9Ni kuna bankooko ya beno sombolaka munu,

bawu mekaka munu, ata ti bawu talaka mambu yina mu salaka.

10Bamvula makumi yiya1,

mbandu yayi nyongisaka munu,

mu tubaka: Bawu kele bantu,

yina me zimbana nzila ya mbote,

bawu me zaba ve banzila ya munu.

11Na nkele ya munu, mu kudyaka ndefi yayi:

“Ve! Bawu ke kota ve na yinsi ya kizunu yina mu kubikilaka bawu2.”»