Mambu ya Nzambi
Mikunga 70
Yave kwiza nswalu mpe sadisa munu
(Mga 40.14-18)
Mukunga ya Davidi. Mukunga yina ba twadisaka na mfumu ya miyimbidi. Mukunga samu na kubambukaka Nzambi moyo.
Oo, Nzambi kuula munu!
Yave, kwiza mbangu samu na kusadisa munu!
Bika ti bayina ke na kusosa lufwa ya munu,
bawu kutala nsoni, bawu kusafuka!
Bika ti bayina ke na kusosa kusala munu yimbi!
Bawu kuvutuka manima na nsoni.
Bika ti bayina ke na kuseka munu,
bawu kuvutuka na nsoni.
Bika ti bayina nyonso ke na kusosa nge,
bawu yangalala mpe bawu vwanda na kyese!
Bika ti bayina ke zolaka mpulusu ya nge, bawu kutuba ntangu nyonso:
«Nzambi kele Nzambi ya nene!»
Munu, mu kele mputu mpe muntu ya mpasi.
Oo, Nzambi kwiza nswalu.
Nge kele nsadisi mpe kikuudi ya munu.
Yave kulutisa ve ntangu.
Mambu ya Nzambi. Copyright © 2025 Wycliffe Bible Translators, Inc. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.