Mikunga 54

Lusambulu ya muntu yina ba ke na kukwamisa

1Mukunga ya Davidi. Mukunga yina ba twadisaka na mfumu ya miyimbidi, ba ke yimbilaka yawu na muningu ya nsambi. 2Ntangu bantu ya Zife kwizaka tuba na Sawule ti: «Davidi kele ya kubumbama na sika ya beto.»

3Nzambi, na Nkumbu ya nge, vuukisa munu,

nwanina munu na lulendo ya nge.

4Nzambi kuwa lusambulu ya munu,

teka makutu na mambu yina ke na kubasika na yinwa ya munu.

5Samu ti banzenza ke na kunwanisa munu,

bantu ya yimbi ke na kusosa na kufwa munu,

bawu me tula ve Nzambi na mantwala ya bawu. Kupema

6Kasi Nzambi kele lusalusu ya munu,

Mfumu ke simbaka mwela ya munu.

7Bika ti yandi sala ti mpasi kubwidila bambeni ya munu,

na kukwikama ya nge, sala ti bawu kuvwanda swii.

8Mu ke pesa nge minkayulu na luzolo ya munu mosi,

Yave, mu ke kembila Nkumbu ya nge, samu ti yawu kele mbote.

9Nge me kuula munu na bampasi nyonso,

mu ke na kutala kubwa ya bambeni ya munu.