Mikunga 47

Beno bula maboko samu na ntinu ya nene

1Mukunga ya bana ya Kole yina ba yimbilaka na lutwadusu ya mfumu ya miyimbidi.

2Beno bantu nyonso, beno bula maboko!

Beno sala milolo ya nsayi samu na Nzambi!

3Ya tsyelika, Yave Nzambi ya Kulutila Kuzangama, kele Nzambi ya nsisi,

yandi kele ntinu ya nene na ntoto nyonso.

4Yandi me sala ti bantu kuvwanda na yisi ya lutumu ya beto,

yandi me tula bayinsi na yisi ya makulu ya beto.

5Yandi me soola mvwilu samu na beto,

yawu ke na kusala nkembo ya Yakobi, yina yandi me zola. Kupema

6Nzambi ke na kukota na Yinzo ya yandi,

na kati ya milolo ya nsayi.

Yave ke na kubelama na muningu ya mpungi.

7Beno yimbila! Beno yimbila samu na Nzambi!

Beno yimbila! Beno yimbila samu na ntinu ya beto!

8Ya tsyelika, Nzambi kele ntinu ya ntoto nyonso,

beno yimbila mukunga!

9Nzambi kele ntinu na bayinsi,

Nzambi kele ya kuvwanda na kiti ya yandi ya longo ya kintinu.

10Bamfumu ya makanda ke na kuvukana,

ya kele bantu ya Nzambi ya Abalayami.

Ya tsyelika, bamfumu ya ntoto kele bantu ya Nzambi,

Nzambi kele na zulu ya bantu nyonso.