Mikunga 142

Yave kele kiswamunu ya nsuka

1Mukunga ya Davidi, ntangu yandi vwandaka ya bumbamaka na kati ya ntadi. Lusambulu.

2Mu ke na kulooka na sika ya Yave na ndinga ya ngolo,

mu ke na kubondila Yave na ndinga ya ngolo.

3Mu ke na kumwangisa lusambulu ya munu mutindu maza na ntadisi ya Yave,

mu me lakisa yandi mpasi ya munu.

4Ntangu yina mpeve ya munu me lemba,

nge, nge me zaba nzila ya munu.

Ba me sadila munu mutambu,

na nzila yina mu ke lutilaka.

5Tala na lweka ya lubakala,

ata muntu ke na kuzaba dyaka munu,

mu ke dyaka ve na kisika ya kwenda bumbama.

Ata muntu ve ke na kutala ntima mpasi samu na luzingu ya munu.

6Yave ni na sika ya nge mu ke na kulooka!

Mu me tuba: «Nge kele kibumbamanu ya munu,

nge kele mvwilu ya munu awa na ntoto ya bantu ya moyo.»

7Kuwa kulooka ya munu,

samu ti mu me lemba mingi,

kuula munu na maboko ya bantu yina ke na kulanda munu,

samu ti bawu me lutila munu ngolo.

8Basisa munu na boloko,

samu ti mu kembila Nkumbu ya nge!

Bantu ya kudedama ke kwiza zunga munu,

ntangu yina nge ke sadila munu mambu ya mbote.