Yelemya 47

Mambu yina me tadila ba-Filiseti

1Mambu ya Yave kuminaka mumbikudi Yelemya na yina me tadila ba-Filiseti. Yawu salamaka ntete Falawo kwiza nwanisa bantu ya Ngaza.

2Yave ke na kutuba:

«Maza ke na kukatuka na node,

yawu ke na kukuma mwila ya nene,

yawu ke na kumwangana na yinsi nyonso,

na zulu ya bima nyonso.

Yawu ke na kumwangana na bambanza,

mpe bantu yina ke zingaka kuna.

Babakala ke na kulooka,

bantu nyonso ya yinsi ke na kuyawula.

3Ba ke na kuwa makelele ya makulu ya bampunda,

makelele ya bapusu-pusu ya mvita,

mpe makelele ya makalu ya yawu.

Bibuti ke na kuzimbana bana ya bawu,

bawu ke na kutelama kuna, maboko mpamba.

4Kilumbu ke na kukwiza samu na kufwa ba-Filiseti,

bantu ya Tile mpe bantu nyonso

yina lenda kusadisa bantu ya Sidone yina bikanaka.

Ee, Yave ke manisa na kufwa ba-Filiseti,

mpe bantu yina ke bikana na kisanga ya Kafetole.

5Bantu ya Ngaza me katula bansuki.

Asekelone me kuma swi.

Beno bayina me bikana moyo

na kati ya bantu ya ngolo,

tii wapi ntangu beno ke tatamana

na kusalaka bansamba na nzutu1?

6Beno ke na kutuba:

“Yayi mambu ya kyadi,

mbele ya mvita ya Yave,

nge ke pemaka ve?

Vutuka na kisika na kati ya nkutu,

vwanda swi, dingama.”

7- Wapi mutindu yawu lenda kupema?

Ni Yave me tumisa yawu,

na kukwenda na Asekelone

mpe na ndilu ya mubu!

Ni kuna yandi me fidisa yawu.»