Skip to content
BibleKenya

Dao Ao Dai Literal Text

Ma-tai 25

Năngđ nâyx, Tênb-toongh Côkz six pây cayx năngđ săpc lanh munh sab đăngb, stiz mănv nzauf mănv toongz setb ninyh stipx săngb langh. Six yămz stiz wax peob naih pyaz lanh oongx, cloon pyaz lanh leemđ. Six wa pyaz lanh oongx, nzauf stiz nyăngz toongz ninyh, yâuc max nzâyz cloon yâuh ninyh. Năngx naih wax đomc leemđ six zoz yâuh ănz wa eengz nzâyz lêpc toongz ninyh. Wax zanyf, wâyc săngb langh max taih căn, stiz songđ muif lanh oix mâyc njoomh yâuc taux wa mâyc njoomh nzuf. Six tauv đamx munf, naih stingb hamv coong: ‘Săngb langh wex! Oix zuc setb ninyh tauv wa tinc stipx.’ Wax zanyf wax đomc munh sab đăngb tuz êu điub taih nzuf yâuc bênc stiz nyăngz toongz. Wax zanyf, wax đomc munh oongx coong ănz wax đomc munh leemđ: ‘Joođ tanb tix cay nyâuh nyăngz yâuh phunz buz, wâyc buz nyăngz toongz cayx tayc gôh.’ Six wax đomc munh leemđ tauz, coong: ‘Naih dlih bâyf max caux tuz buz cloon nyâuh tinyh đoih nongc. Nyâuh wănh, ninyh lov wax đomc maic yâuh nyăngz munh nongc maif phunz nyâuh.’ Six, stiz ninyh maif yâuh wax zanyf, săngb langh taih tauv, wax đomc bênc săngh tuz cloon săngb langh ninyh nzac coonx hinh, yâuc omz jeengh blătc. Tăng wa, wax đomc munh sab oongx zef lauf tauv, êu coong: ‘Zâu lex, Zâu lex, joođ coib jeengh phunz buz.’ Six zâu tauz coong: ‘Yaz coong senz bux nyâuh, yaz max pâyz nyâuh.’ Wâyc nây oix zuc bôngh stimz, wâyc nyâuh max pâyz wax noib cloon wax săngx huđ.

Wâyc zuc cayx năngđ ah lanh munh cayx setb jau ninyh côz, nănh songđ êu nănh nyăngz pâuz taih yâuc jaoz nănh nyăngz jax toongx phunz stiz. Nănh phunz nâyx lanh pyaz panc, wax lanh iz panc, ah lanh timb ah panc — phunz âyz stiz cănh nyăngz jab, tăng wa nănh songđ setb jau ninyh stâyz phangz côz. Tauv nănh ninyh blătc, tuz pyaz panc wax tauh songđ nzâyz wax đomc nyanh ninyh ayx steengb âyx yâuc tuz gâyc pyaz panc pâu. Lauf tinyh năngđ, tuz iz panc wax tauh lauf ninyh ayx gâyc tuz iz panc timb pâu. Six tuz ah panc wax tauh songđ, nzâyz ninyh witz cotb plopx zâu nyăngz nyanh. Tăng wa blătc quaix đangz lauh, wax đomc pâuz nyăngz zâu lauf songđ stunx mangc wax đomc pâuz nyăngz stâub tanz. Tuz stipx pyaz panc wax tauh nzâyz cloon pyaz panc timb, staox taih stătx, yâuc coong: ‘Zâu lex, mâyh phunz yaz pyaz panc. Six mangc nhlex, yaz ayx tuz gâyc pyaz panc pâu.’ Nănh nyăngz zâu songđ coong ănz nănh: ‘Gongx gôh, mâyh six ah lanh pâuz gongx yâuc nyâuđ zanyx! Mâyh ayx nyâuđ zanyx yămz nâyx đomc cumh pâuz jenz. Yaz six jaoz phunz mâyh cun cumh pâuz lub. Nzac taih cloon mâyh nyăngz zâu songc numđ nyađ gôh.’ Tuz iz panc wax tauh zef staox taih stătx lauf coong: ‘Zâu lex mâyh phunz yaz iz panc, six mangc nhlex, yaz zef ayx tuz gâyc iz panc pâu.’ Nănh nyăngz zâu coong ănz nănh: ‘Gongx gôh, mâyh six ah tauh pâuz gongx yâuc nyâuđ zanyx! Mâyh ayx nyâuđ zanyx yămz cumh pâuz jenz. Yaz six phunz mâyh cun cumh pâuz lub. Nzac taih cloon mâyh nyăngz zâu songc numđ nyađ gôh.’ Năngx naih wax tauh tuz stipx ah panc, lauf staox taih, yâuc coong: ‘Zâu lex, yaz pâyz tuz mâyh, coong mâyh six ah lanh munh stekx luungđ yongb, mâyh sâub yămz mâyh max songx nyăngz tinc, yâuc quănf yămz mâyh max hav nyăngz tinc. Wâyc numđ cumh nzav, yaz nzăngđ nzâyz zâu nyăngz nyanh ninyh plopx ănz wa nib đi. Mangc nhlex, mâyh cănh nongc mâyh nyăngz phănc.’ Six nănh nyăngz zâu tauz ănz nănh coong: ‘Mâyh lâyc tauh pâuz huđ yâuc nhlengc! Mâyh pâyz tuz coong yaz sâub yămz yaz max songx nyăngz tinc, yâuc quănf yămz yaz max hav nyăngz tinc. Năngđ nây, mâyh six hoopđ zuc nzâyz yaz nyăngz nyanh ninyh ănz nyanh njămf, tauv yaz lauf, six njinh tuz yaz nyăngz nyanh coonz căn nyanh gâyc. Năngđ nâyx, oix zuc zoz nănh nyanh taih yâuc nzâyz ninyh phunz naih săpc panc wax tauh. Wâyc laiv lanh jinh đangh naih six tuz sađ muif huungđ phunz — ayx tuz naih yăngc. Six wax đomc max naih, six njinh nănh naih nyăngz yâuc zuc zoz setb ninyh. Yâuc oix zuc zoz nâyx tauh huđ nyăngz pâuz quanyf nzac wa cungh ngwaic nzămc nyăngz tinc ninyh, yămz wa six naih pungx stingb haoh tăpc nyah tanyđ.’

Six tauv Bamh Munh yămz Nănh nyăngz gwăngz eeng cloon Nănh wax đomc muif lanh stinz munh nzac taih, tauv wax zanyf, Nănh six stâyv yămz Nănh nyăngz gwăngz eeng tinc. Guungh đi manf stingx munh six taih căpx dlonf yămz Nănh nyăngz cah đangc, Nănh six njeengx stiz phunz goib taih, cayx năngđ jămđ yuungh nyăngz munh phunz goib yuungh cloon pax jiz yuungh nâyx. Nănh six phunz pax jiz yuungh yămz Nănh nyăngz byaoh phanx yuungh yămz staix phanx. Tăng wa, Huungh six coong ănz yămz Nănh nyăngz byaoh phanx wax đomc munh: ‘Nyâuh đomc tuz Yaz nyăngz Pha sađ pôz nyăngz munh, staox taih gôh, taih stipx tăng zuyx guungh zuyx nib tuz bênc săngh phunz nyâuh nyăngz côkz. Wâyc Yaz nyâuđ sab, nyâuh yâuc phunz Yaz nhlinc; Yaz nyâuđ gatb, nyâuh yâuc phunz Yaz hopb; Yaz six munh njingc nyâuh yâuc stipx Yaz nzac pyau; Yaz max naih zuc, nyâuh yâuc phunz Yaz zuz; Yaz săngh gumc, nyâuh yâuc jămđ Yaz; Yaz yămz wa nzauh, nyâuh yâuc ninyh tex Yaz.’ Tauv wax zanyf, wax đomc peengh stimz munh songđ tauz Nănh, coong: ‘Zâu lex, laiv zanyf, buz phătc Mâyh nyâuđ sab bix phunz nhlinc, max six nyâuđ gatb bix phunz hopb heh? Nzof buz laiv zanyf phătc Mâyh ayx munh njingc bix stipx nzac pyau, max six phătc max naih zuz bix phunz zuz heh? Zef laiv zanyf buz phătc Mâyh săngh gumc max six yămz wa nzauh bix ninyh tex Mâyh heh?’ Huungh songđ tauz ănz stiz coong: ‘Yaz coong senz bux nyâuh, wâyc nyâuh ayx nâyx đomc muif huungđ phunz ah lanh jenz stăm quaix nyăngz munh yămz Yaz nâyx đomc yâuf pez ô stayx cah njaf, nyâuh six ayx phunz Yaz gôh.’ Tăng wa huungh zef coong ănz yămz staix phanx wax đomc: ‘Tiuv gâyh Yaz gôh, nyâuh zuc zaux nyăngz munh lex, ninyh yămz wa stâyv quâyx nyăngz tâuf bênc săngh phunz manđ huungh cloon wax đomc manđ peengz nyăngz tinc. Wâyc Yaz nyâuđ sab nyâuh yâuc max phunz Yaz nhlinc; Yaz nyâuđ gatb nyâuh yâuc max phunz Yaz hopb; Yaz six munh njingc nyâuh yâuc max stipx Yaz; max naih zuz nyâuh yâuc max phunz Yaz zuz; săngh gumc cloon yămz wa nzauh nyâuh yâuc max jămđ yaz.’ Tauv wax zanyf stiz six lauf tauz, coong: ‘Zâu lex, buz laiv zanyf phătc Mâyh nyâuđ sab, max nyâuđ gatb, max six ayx munh njingc, max six max naih zuz, max six săngh gumc, max six yămz wa nzauh bix max stăngc Mâyh heh?’ Tăng wa Huungh zef tauz ănz stiz, coong: ‘Yaz coong senz bux nyâuh, wâyc nyâuh max ayx nâyx đomc cumh pâuz phunz ah lanh jenz stăm quaix nyăngz munh yămz nâyx đomc munh nyâuh six max ayx phunz Yaz gôh.’ Wax đomc munh six nzac wa stâyv quâyx zuc tingc stoif, nzof wax đomc peengh stimz munh six muf wa stâyv quâyx tuz săngh meengc.”

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.