Lu-ca 23

1Tăng wa stiz wax peob munh tinyh đoih nyoongz quef, ênz Nănh ninyh Phi-latx wa. 2Stiz quef coonz cooux Zâu Yê-su, coong: “Buz phătc lâyc tauh munh taih lungz buz nyăngz pec stingx, êu gâyf setb sôiv phunz Sê-sa, nănh yâuc cănh nhlimc ayx Zâu Jix-Tuz, yâuc ayx huungh.” 3Six, Phi-latx naic Nănh, coong: “Mâyh zâyf Yu-tai munh nyăngz Huungh max?” Six Nănh tauz Phi-latx, coong: “Cănh năngđ mâyh coong nâyx.” 4Tăng wa, Phi-latx coong ănz wax đomc stayb munh cloon songx munh: “Yaz zah nâyx lanh munh max phătc naih luungđ stoif tiny.” 5Six stiz lauf nzetx nhlengc găngz coong: “Nănh lungz songx munh, nzaox gâyf nzêux Yu-đê stâyz phangz, quef coonz tăng Ga-li-lê taih tuz tauv nây.” 6Phi-latx numđ coong nâyx, nănh songđ zah naic Zâu Yê-su jađ, senz zâyf Ga-li-lê munh max. 7Tauv pâyz tuz coong Zâu Yê-su yămz Hê-lôtx nyăngz lanyf cah đi, nănh songđ jaoz Zâu Yê-su phunz Hê-lôtx, toix wax đomc noib Hê-lôtx huungh lauf jinh đangh yămz wa Yê-lu-sa-lem.

8Hê-lôtx phătc Zâu Yê-su wax zanyf, nănh senz numđ nyađ nzongf, wâyc nănh oix pongh Zâu Yê-su lauh yongb nzof, tăng nănh numđ coong tauv Zâu Yê-su, nănh yâuc nyâyh mungc, oix tuz phătc Zâu Yê-su ayx jix caox njingc nyăngz dlayc. 9Tăng wa, nănh naic Zâu Yê-su đuungx zâux wac, six Zâu Yê-su max tauz nănh zâux tiny. 10Six wax đomc stayb munh cloon nzaox gâyf stênx steengb stâuđ wa njinh luh cooux Zâu Yê-su. 11Wax zanyf Hê-lôtx cloon nănh wax đomc peengz pib mađ nănh, pib jetx Nănh tuz, yâuc zoz guyz quai zuz phunz Nănh, Hê-lôtx songđ jaoz Nănh muf phunz Phi-latx. 12Cah đangc Hê-lôtx cloon Phi-latx, stiz iz lanh six săngh yônz zaz, six tăng wax noib stiz songđ săngh lah pyeoz toic.

13Tăng wa, Phi-latx êu wax đomc stayb munh, cloon wax đomc ayx côx munh cloon songx munh taih căpx dlonf, 14Phi-latx coong ănz stiz: “Nyâuh ênz nâyx lanh munh taih jaoz phunz yaz, coong six nănh lungz songx munh, six, yămz nyâuh nyăngz cah đangc zah naic nănh tuz, yaz max phătc nâyx lanh munh naih laiv huungđ stoif, năngđ nyâuh cooux nănh nyăngz jau nâyx. 15Nzof Hê-lôtx lauf max zah tuz setb luungđ, nănh songđ zef jaoz nâyx tauh munh phunz yaz, mangc jađ, nâyx tauh munh max naih ayx laiv huungđ hoopđ zuc tayc. 16Wâyc nây, phanv bopc nănh tuz, yaz six pungx nănh.” 17[Six, muif hâyđ tauv stêtz, Phi-latx six zuc pungx ah tauh nzauh munh phunz pec stingx] 18Wâyc nây stiz songđ tinyh đoih hamv lub, coong: “Tingz jămz ănz nănh, bix pungx Ba-la-batc phunz buz!” 19(Nâyx tauh Ba-la-batc zuc clăngđ ănz nzauh, six wâyc naih ah hâyđ sêu lunc yămz dlanyh cah njaf bix tayx munh.) 20Wax zanyf, Phi-latx oix pungx Zâu Yê-su, songđ coong ănz songx munh ah hâyđ timb. 21Six stiz hamv coong: “Tingz jămz nănh ănz săpc đăngc zax! Tingz jămz nănh ănz săpc đăngc zax!” 22Tăng wa Phi-latx zef coong ănz stiz tah stamz hâyđ: “Nâyx tauh munh ayx luungđ huđ heh? Yaz zah nănh max phătc naih laiv luungđ stoif hoopđ zuc tayc. Wâyc nây, bopc tuz, yaz six pungx nănh.” 23Six stiz njinh luh hamv nhlitb nhlitb têx coong, zuc tingz Nănh ănz săpc đăngc zax, nzof stiz hamv nyăngz stingb songđ tuz hingh. 24Phi-latx songđ setb lanyf âyz stiz coong nyăngz wac ayx. 25Tăng wa, Phi-latx songđ pungx zuc clăngđ ănz nzauh wax tauh, wâyc nănh pamf stêu lunc cloon tayx munh nyăngz stoif, six songx munh êu pungx wax tauh, Phi-latx songđ jaoz Zâu Yê-su phunz âyz stiz nyăngz âyx.

26Munh ênz Zâu Yê-su ninyh wax zanyf, stiz phađ yac ah lanh Sai-lin munh, bux hipđ ayx Si-môn tăng njăngv lanyc taih, nănh stiz zoz săpc đăngc zax ănz staox nănh ninyh phunz nănh đamz, lêpc Zâu Yê-su nyăngz cah đangz ninyh.

27Naih ah peob songx munh hongđ nzongf ninyh lêpc Nănh, yâuc naih ah phanx munh nzif tô cah lapc haoh wâyc Nănh. 28Six Zâu Yê-su winb quaix stiz wa lauf, coong: “Yê-lu-sa-lem nyăngz sab lex, năngx gâyf haoh wâyc yaz, six, oix zuc haoh wâyc nyâuh nyăngz stinb cloon nyâuh nyăngz sây. 29Wâyc zuc, tauv naih ah noib, munh six coong: ‘Max hayh naih sây, cloon taib max naih sây, cloon max zeengx phunz sây hopb nu nyăngz munh nzif, senz naih oonz looc gôh.’ 30Tauv wax zanyf, munh six coong ănz wax đomc zoongz zâyc coong, ‘Lakb nzac taih đăpx buz gôh,’ yâuc coong ănz wax đomc zoongz coong, ‘Oix zuc plopx buz gôh.’ 31Wâyc năngđ coong njăngx meengz munh bix năngx ayx năngđ nâyx ănz, njăngx caođ bix laiv ayx laix?”

32Wax zanyf, naih iz tauh stoif munh timb lauf zuc ênz ninyh, nongc tayx cloon Zâu Yê-su ayx ah hâyđ.

33Stiz ninyh tauv ah cuyb tinc hipđ ayx “Pyây Mo Zoongz,” stiz songđ tingz jămz Nănh ănz wa, cloon iz tauh stoif munh — ah tauh yămz byaoh phanx, ah tauh yămz staix phanx. 34Six Zâu Yê-su coong: “Pha lex, joođ quanyf stoif phunz stiz, wâyc stiz max pâyz stiz ayx nyăngz jau.” Nzof stiz songđ nyupx tăm tinyh phunz Nănh nyăngz guyz đao. 35Songx munh stâuđ wa mangc, six wax đomc ayx côx munh lauf pib jetx Nănh, coong: “Nănh njâuv tuz munh, bix cănh njâuv nănh mangc geh, năngđ coong nănh six Zâu Jix-Tuz, Zâu Tênb-Huungh sên taih nyăngz munh.” 36Wax đomc peengz lauf pib jetx Nănh, taih stătx stungx tiu stuib phunz Nănh, 37yâuc coong: “Năngđ coong mâyh six Yu-tai munh nyăngz Huungh, bix cănh njâuv mâyh geh.” 38Yămz Zâu Yê-su nyăngz cah zâyc lauf naih ah hangh đăngc coong: “Nây six Yu-tai munh nyăngz Huungh.”

39Wa iz tauh stoif munh zuc tingz jămz yămz wa săpc đăngc zax, naih ah tauh pib Nănh, coong: “Mâyh max zâyf Zâu Jix-Tuz haz? Phanv njâuv mâyh cloon buz mangc geh.” 40Six năngx naih wax tauh stoif munh tauz, yâuc mađ nănh coong: “Mâyh lauf max pâyz cumh nzav Zâu Tênb-Huungh, wâyc pănh tinyh đoih zuc tingc stoif tayc haz? 41Pănh zuc năngđ nâyx six hoođ, wâyc pănh ayx nyăngz six payh tuz năngđ nâyx, six nâyx tauh munh max ayx luungđ longđ tinyh.” 42Nănh yâuc coong: “Zâu Yê-su lex, tauv mâyh muf nzac mâyh nyăngz côkz, joođ săngx tauv yaz bex.” 43Zâu Yê-su coong ănz nănh: “Yaz coong senz bux mâyh, nâyx noib mâyh six tuz cloon yaz yămz wa Pa-đa-đi.”

44Wax zanyf six cox săpc nyâyc săngx huđ, lomc wax nomz stâyz phangz nzămc meengh nzuf, ayx tuz tauv pôz săngx huđ. 45Bah noib nzămc meengh nzuf. Nzof yămz bongc Zâu Tênb-Huungh nyăngz pyau wax leepz buyx zuc byaif ayx iz phanx. 46Zâu Yê-su songđ hamv stingb lub coong: “Pha lex, Yaz jaoz yaz nyăngz mengc hoonh yămz Pha nyăngz puf.” Tăng wa, coong năngđ nâyx tuz, Nănh songđ siv setc. 47Wax zanyf, naih ah lanh peengz pyây phătc nâyx đomc dlayc setb taih, nănh songđ tanv Zâu Tênb-Huungh coong: “Nâyx lanh munh senz peengh stimz nyăngz munh.” 48Songx munh tinyh đoih ninyh yămz wa mangc, phătc nâyx đomc dlayc ayx nâyx, stiz songđ tô cah lapc phunb đangz. 49Six wax đomc pâyz Zâu Yê-su nyăngz munh, cloon tăng Ga-li-lê, ninyh lêpc Nănh wax đomc munh nzif, stiz tinyh đoih stâuđ yămz côz côz mangc wax đomc dlayc.

50Phanv mangc, naih ah lanh munh bux hipđ ayx Yô-sepx, nănh six ah lanh pob dlayc munh, ah lanh munh gongx yâuc peengh stimz, 51(nănh yâuc max tac wax đomc pob dlayc munh cloon stiz ayx nyăngz cumh pâuz) nănh six yămz A-li-ma-tê, A-li-ma-tê six Yu-tai munh nyăngz ah nomz dlanyh, nănh six ah lanh munh, jinh đangh zu Zâu Tênb-Huungh nyăngz côkz. 52Nănh ninyh pongh Phi-latx, joođ Zâu Yê-su nyăngz stayđ. 53Zoz Zâu Yê-su nyăngz stayđ nzac taih wax zanyf, nănh songđ nongc đôc buyx pêuz stayđ, yâuc zaub Zâu Yê-su ănz ah nomz stâu, stuc njauz pyây ayx taih, wax cuyb tinc yâuc max zeengx plopx mănv ănz. 54Wax noib six Bênc Cumh Pâuz nyăngz noib, yâuc cayx tauv tingc congz noib. 55Wax đomc munh nzif, six tăng Ga-li-lê ninyh lêpc Nănh wax đomc, stiz lêpc đangz ninyh, stiz yâuc phătc plopx Zâu Yê-su nyăngz stayđ wax nomz stâu. 56Tăng wa stiz songđ phunb đangz muf, bênc mađ đangz cloon yâuh đangz.

Tauv tingc cumh pâuz noib, stiz songđ âyz gâyf njanh sec hitb conv.