Dao Ao Dai Literal Text
Yô-hanx 18
Coong wax đomc wac tuz, Zâu Yê-su songđ cloon Nănh wax đomc stayb sây quaix wax nganđ leepz Citc-lôn wăngx nof ninyh, yămz wa naih ah nomz lauf winb, Zâu Yê-su songđ cloon Nănh wax đomc stayb sây nzac wa ninyh. Wax zanyf, maic Nănh wax tauh Yu-đatc, lauf pâyz wax cuib tinc, wâyc Zâu Yê-su yađ cloon Nănh wax đomc stayb sây ninyh căpx dlonf yămz wa. Wâyc nây, Yu-đa, ênz ah peob peengz, cloon stayb munh paiđ taih wax đomc, cloon wax đomc Pha-li-si munh paiđ taih nyăngz munh, ninyh tauv wax cuyb tinc, yâuc nzauf toongz tâuf pa, cloon bopc zax tungh zăngc ninyh. Wâyc Zâu Yê-su pâyz tuz Nănh cayx pongh nyăngz muif huungđ dlayc, Nănh songđ japc staox taih, naic stiz coong: “Nyâuh lov mănv heh?” Stiz tauz Nănh coong: “Yê-su, Na-sa-leetx munh.” Nănh coong ănz stiz: “Six yaz gôh.” (Wax zanyf, maic Nănh wax tauh, Yu-đa năngx jinh cloon nănh stiz stâuđ wa.) Wax zanyf, Zâu Yê-su ah yac coong ănz stiz: “Six yaz gôh,” stiz songđ toiv phunz đangz yâuc glinyf nzac nib ninyh. Tăng wa, Zâu Yê-su zef naic stiz: “Nyâuh lov mănv heh?” Stiz songđ coong: “Yê-su, Na-sa-leetx munh.” Zâu Yê-su zef coong: “Yaz six bux nyâuh coong zâyf yaz gôh nâyx nzec. Six, năngđ coong nyâuh lov yaz, bix phunz nâyx đomc munh muf.” (Nây six phunz setb taih toix nzuf Nănh coong quaix nyăngz wac coong: “Pha jaoz phunz Yaz wax đomc munh, Yaz max ayx stiz gaih lanh tiny.”) Wax zanyf, Si-môn Pi-tê naih ah zuungz nzuc đao, nănh songđ luutz nzuc setb taih, bopc stayb munh pyây nyăngz pâuz, yâuc pătb wax tauh pâuz byaoh wax phanx bah noomh setc. Wax tauh pâuz bux six hipđ ayx Man-zu. Tăng wa Zâu Yê-su coong ănz Pi-tê coong: “Oix zuc zaub nzuc ănz nzac nuih ninyh! Pha jaoz phunz yaz nyăngz zan, yaz bix max hoopđ zuc hopb naz?”
Tăng wa, wax đomc peengz cloon wax tauh peengz pyây cloon Yu-tai munh paiđ taih wax đomc munh, songđ zoz Zâu Yê-su yâuc stayb Nănh. Tah yetx, stiz ênz Nănh ninyh tauv An-natx wa, wâyc An-natx six Ca-ya-phatx nyăngz pha taz, wax nyăngv Ca-ya-phatx six ayx stayb munh pyây. (Nâyx tauh Ca-ya-phatx six cah đangc coong ănz Yu-tai munh coong, phunz ah lanh munh tayc tayv pec stingx six senz năngx gongx têx.)
Wax zanyf, Si-môn Pi-tê cloon pitc tauh stayb sây ninyh lêpc Zâu Yê-su. Six wax tauh stayb sây cloon stayb munh pyây tinyh quênx, nănh songđ tuz cloon Zâu Yê-su nzac stayb munh pyây nyăngz pyau peengh cah njaf ninyh. Six Pi-tê lauf stâuđ yămz wa jeengh cungh ngwaic, năngđ nâyx wax tauh stayb sây, six cloon stayb munh pyây tinyh quênx wax tauh, setb ninyh coong ănz jămđ jeengh wax tauh munh sab pâuz, songđ ênz Pi-tê nzac ninyh. Tăng wa, jămđ jeengh wax tauh sab pâuz, coong ănz Pi-tê: “Mâyh max zâyz lauf wax tauh munh nyăngz stayb sây haz?” Pi-tê tauz: “Yaz max zâyf.” Wax zanyf, wax đomc pâuz cloon paiđ ninyh wax đomc munh stâuđ yămz wa, wâyc guungh song stiz songđ căpx ah đauc tâuf, yâuc poc wa siz tâuf. Pi-tê lauf cloon stiz stâuđ yămz wa siz tâuf.
Wax zanyf, stayb munh pyây naic Zâu Yê-su tauv Nănh wax đomc stayb sây cloon Nănh nzaox nyăngz jau. Zâu Yê-su tauz nănh: “Yaz toongx songx coong phunz muif lanh nzuf. Yaz muif dlih yămz huyđ toongh cloon yămz bongc Zâu Tênb-Huungh nyăngz pyau nzaox, six Yu-tai munh tinyh đoih căpx dlonf nyăngz tinc, yaz max pinyx coong toix laiv huungđ. Săngh laix mâyh bix naic yaz? Phanv naic wax đomc munh numđ yaz coong ănz stiz đomc munh. Six, wax đomc munh pâyz tuz yaz coong huungđ.” Zâu Yê-su jinh đangh coong năngđ nâyx, songđ naih ah tauh paiđ ninyh wax đomc stâuđ wa beb Zâu Yê-su ah đitb, yâuc coong: “Mâyh tauz stayb munh pyây ayx năngđ nâyx naz?” Zâu Yê-su tauz nănh: “Năngđ coong yaz coong max toix, phanv nuz tauv max toix wax zâux wac geh. Six năngđ coong yaz coong toix, săngh laix mâyh bix bopc yaz?” Tăng wa, lauf năngx jinh zuc stayb wax zanyf, An-natx phunz ênz Nănh ninyh stayb munh pyây Ca-ya-phatx wa.
Wax zanyf, Si-môn Pi-tê lauf năngx jinh stâuđ yămz wa siz tâuf. Tăng wa, munh coong ănz nănh: “Mâyh max zâyf lauf wax lanh munh nyăngz stayb sây haz?” Pi-tê songđ pyenv coong: “Max zâyf yaz.” Stayb munh pyây wax đomc pâuz naih ah lanh six cloon Pi-tê pătb bah noomh setc wax tauh tinyh jenb, coong: “Max zâyf yaz phătc mâyh cloon wax lanh munh yămz wa lauđ winb haz?” Six Pi-tê zef pyenv ah hâyđ timb, zayz songđ lênh dlih ayx caix.
Tăng wa, stiz ênz Zâu Yê-su tăng Ca-ya-phatx nyăngz pyau ninyh Lô-ma quanz pâu nyăngz tinc. (Wax zanyf, guungh năngx jinh njâub njâu, stiz max nzac Lô-ma quanz pâu nyăngz tinc cah njaf ninyh phunz stiz nzăngđ max zuc wâyx, năngđ nâyx stiz nzăngđ hayh nhlinc Pyenv Mengc Stêtz.) Năngđ nâyx, Phi-latx songđ setb ninyh pongh stiz yâuc coong: “Nyâuh zoz luungđ wac taih cooux nâyx lanh munh heh?” Stiz tauz ănz nănh coong: “Năngđ coong nâyx lanh munh max ayx luungđ huđ dlayc, buz six max jaoz nănh phunz quanz.” Wâyc năngđ nâyx, Phi-latx coong ănz stiz: “Nyâuh phanv ênz nâyx lanh munh muf bix âyz nyâuh nyăngz gâyf njanh stămđ nănh.” Yu-tai munh tauz Phi-latx coong: “Buz max naih gâyf tayx toix laiv lanh munh.” (Năngđ nâyx six phunz setb taih toix nzuf Zâu Yê-su coong nyăngz wac, six cah đangc Nănh coong tauv Nănh cayx zuc tayc ayx năngđ laix.)
Tăng wa Phi-latx zef nzac wa quanz pâu tinc cah njaf ninyh, yâuc êu ênz Zâu Yê-su taih Phi-latx songđ naic Nănh coong: “Mâyh zâyf Yu-tai munh nyăngz Huungh max?” Zâu Yê-su zef tauz: “Mâyh cănh coong ayx nâyx, max six naih mănv coong yaz nyăngz jau bux mâyh?” Phi-latx tauz: “Yaz max zâyf Yu-tai munh nhlenz? Cănh mâyh nyăngz munh cloon wax đomc stayb munh jaoz mâyh phunz yaz lec. Ha mâyh ayx laiv huungđ heh?” Zâu Yê-su tauz: “Yaz nyăngz côkz max săngh nây bamh canz nyăngz. Năngđ coong yaz nyăngz côkz săngh nây bamh canz nyăngz, yaz nyăngz pâuz six bopc zax max phunz yaz zuc jaoz phunz Yu-tai munh. Six Nâyx zanyf yaz nyăngz côkz max zâyf yămz nây.” Tăng wa Phi-latx coong naic Nănh: “Ha mâyh six ayx huungh yah?” Zâu Yê-su tauz: “Mâyh cănh coong yaz six huungh. Yaz tuz steengb taih six wâyc nâyx đomc, yaz nzac bamh canz taih six lauf wâyc nâyx đomc, six nongc ayx zanyx manyf phunz senz gâyf, Laiv lanh săngh senz gâyf nyăngz munh six mungv yaz nyăngz wac.” Phi-latx naic Nănh coong: “Senz gâyf six luungđ heh?” Coong nâyx zâux wac tuz, nănh zef setb ninyh pongh Yu-tai munh yâuc coong ănz stiz: “Yaz zah nănh max phătc naih luungđ stoif tiny. Six, âyz nyâuh nyăngz gâyf tauv quaix Pyenv Mengc Stêtz yaz six pungx ah tauh stoif munh phunz nyâuh. Năngđ nâyx, nyâuh oix yaz pungx Yu-tai munh nyăngz Huungh phunz nyâuh max?” Tăng wa stiz zef hamv, coong: “Max zâyf pungx nâyx tauh, six pungx Ba-la-batc lêc.” Wax zanyf, Ba-la-batc six ah tauh ayx stac munh.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.