Ya-coopc 4

1Yămz nyâuh cah njaf naih wax đomc tinyh panx, tinyh nzeengz nyăngz jau six tăng laiv taih heh, ha max zâyf tăng nyâuh nyăngz stimz nyâuđ nyâyh oix setb taih, nzăngđ naih tinyh nzeengz yămz nyâuh nyăngz stinb sangc haz? 2Nyâuh oix nongc six yâuc max tuz, nyâuh tayx munh. Nyâuh oix nongc six zab max tuz, nyâuh songđ tinyh panx tinyh bopc. Nyâuh max naih six wâyc nyâuh max joođ. 3Nyâuh joođ yâuc max tuz stipx six wâyc nyâuh joođ max toix jau, cungb nzâyz taih nongc ayx âyz cănh nyăngz stimz nyâuđ. 4Văngf munh nyăngz munh lex! Nyâuh max pâyz tuz coong cloon bamh canz ayx toic six căn Zâu Tênb-Huungh ayx yônz zaz haz? Wâyc nây, tinyh phanv laiv lanh oix cloon bamh canz ayx toic, wax lanh munh six săngh Zâu Tênb-Huungh nyăngz yônz zaz. 5Max six nyâuh nyâyh coong Canyx Stâub coong nyăngz wac max naih luungđ stuyh heh: “Zâu Tênb-Huungh phunz yămz pănh nyăngz nyâuđ cah njaf wax tauh Singx-Lingh, Nănh oix pănh ayx tuz numđ nhlenx”? 6Six, Nănh zef sađ pôz phunz pănh năngx lub têx, năngđ nâyx Canyx Stâub nzăngđ coong: “Zâu Tênb-Huungh nzeengz cloon ayx lub nyăngz munh, six Nănh sađ pôz phunz nhlimc ayx jenz nyăngz munh.” 7Wâyc nây, oix zuc buc Zâu Tênb-Huungh. Bix tămx cloon manđ huungh, nzof nănh songđ gâyh goib nyâuh. 8Oix zuc taih yămz stătx Zâu Tênb-Huungh, nzof Nănh nzăngđ taih yămz stătx nyâuh. Pamf stoif nyăngz munh lex, oix zuc đaox dlăngc cănh nyăngz puf, naih iz tiuh nyâuđ nyăngz munh lex, oix zuc stav đăngb cănh nyăngz nyâuđ. 9Oix zuc pâyz tuz numđ stauh, bix yônx mengc haoh! Nyâuh jetx oix zuc coi pênx haoh, nzof nyađ nyăngz jau oix zuc coi pênx numđ stauh. 10Oix zuc nhlimc cănh ayx jenz yămz Zâu nyăngz cah đangc, nzof Nănh six pâuh nyâuh staox.

11Yâuf pez lex, năngx gâyf lanh coong huđ ănz lanh. Laiv lanh coong huđ ănz cănh nyăngz yâuf pez, max six tingc yâuf pez nyăngz stoif, wax lanh six coong huđ ănz gâyf njanh, nzof yâuc tingc gâyf njanh. Nzof năngđ coong mâyh tingc gâyf njanh, mâyh six max zâyf ayx âyz gâyf njanh nyăngz munh, six săngh tingc gâyf njanh nyăngz munh. 12Cungb naih ah Tauh njăpc gâyf njanh taih yâuc cungb naih ah Tauh stămđ stoif cuungv, six senz naih lanyf hayh njâuv tuz yâuc hayh mêtc tuz wax Tauh. Năngx naih mâyh six mănv, bix năngx nzađ stămđ cănh nyăngz cah sinh munh heh?

13Coong nâyx đomc wac nyăngz munh lex, oix zuc mungv bex, nyâuh coong: “Nâyx noib max six sangx đoomz buz six ninyh tauv wax nomz dlanyh, yămz wa ayx ah nyăngv cumh pâuz, maif maic yâuc tuz gâyc.” 14Six nyâuh yâuc max pâyz tuz sangx đoomz nyâuh nyăngz mengc six năngđ laix? Wâyc nyâuh six cayx năngđ bungc đay nâyx setb tix cay ah zanyf yâuc zuc đanv ninyh nzuv. 15Nyâuh six hoopđ zuc coong: “Năngđ coong Zâu oix, bix yaz năngx săngh, yaz six ayx nâyx huungđ cumh pâuz max six ayx wax huungđ cumh pâuz.” 16Six, nyâuh yâuc cănh ayx nzetx lub tanv cănh nyăngz stinb. Tinyh phanv cănh ayx nzetx lub năngđ nâyx six huđ nzongf. 17Wâyc nây, laiv lanh pâyz tuz hoopđ zuc ayx gongx nyăngz jau bix max ayx, wax lanh munh six naih stoif.