Hipđ-lu 9

1Tah yetx hâyđ nyunc nyăngz nhlengc wac lauf naih ayx gâyf paix nyăngz gâyf, cloon ah cuyb đăngb zeengh tinc yămz nây nib, 2wâyc ah nomz njiuh tamf tuz ayx taih, zetx hoongv, six naih toongz jax cloon đah mâyf, cloon congx nyăngz nzu, wax cuyb tinc six tuz hipđ ayx “Đăngb Zeengh Tinc”, 3nzof nzac wa buyx cah đangz muf tah nyâyc wax hoongv six njiuh tamf, wax cuyb tinc six tuz hipđ ayx “Đăngb Zeengh Quaix Nyăngz Tinc”, 4naih ah nomz sămz đah mâyf nongc pu huungb, cloon wax nomz nyunc nhlengc wac nyăngz hoomh nongc sămz pêuz nzêux nzuf, yămz wa cah njaf six naih ah nomz sămz eengz ănz ma-na, cloon A-lôn nyăngz pya byac săngh phăngh, cloon wax đomc nyunc nhlengc wac nyăngz njauz peen, 5wa hoomh cah zâyc, six wax đomc zê-lu-bim gwăngz eeng coomx nzuf hoomh gaix, six nâyx zanyf yâuc mayv coong tuz wax đomc săngh huungđ yox nzuf. 6Nzof tauv wax đomc muif huungđ tuz năngđ nâyx ayx săngh wax zanyf, wax đomc stayb munh six njinh leox nzac tah yetx wax hoongv njiuh tamf ninyh, ayx stiz stayb munh nyăngz cumh pâuz; 7six yămz tah nyâyc wax hoongv six cungb stayb munh pyây nzăngđ tuz nzac cuungv, ah nyăngv nzac ah hâyđ, yâuc max naih laiv hâyđ coong max zuc nzâyz samđ nongc phunz nănh stungx tayv nănh nyăngz stoif cloon songx munh nyăngz stoif. 8Zâu Singx-Lingh păngc wax đomc dlayc bix hinđ manyf coong, tinyh phanv laiv zanyf tah yetx wax nomz njiuh tamf năngx jinh naih têx, six nzac đăngb zeengh quaix nyăngz tinc wax stinz jau lauf max zeengx tuz hinđ setb taih, 9nzof wax đomc yâuc nongc pây tauv nâyx yenh stâyv, âyz năngđ wa, njinh jax dlaih cloon stanyb lanyh tuz stungx nyăngz, six max hayh ayx phunz canyx bongc nyăngz munh naih clăkx clunh nyăngz stimz nyâuđ, 10wax đomc six cungb stinb a njăpc taih nyăngz gâyf, năngđ nhlinc, hopb, cloon wax đomc đaox dlăngc nyăngz stêtz, six tuz njăpc taih nongc zu tauv săngx huđ tuz coi wănc.

11Six Zâu Jix-Tuz taih ayx ah tauh stayb munh pyây phunz muif huungđ gongx nyăngz jau tuz tauv tauh, yămz năngx lub quaix yâuc năngx gongx quaix nyăngz njiuh tamf, max zâyf tăng bamh munh nyăngz puf ayx taih, yâuc max zâyf săngh nâyx nomz zuyx taih nyăngz nib minc nyăngz, 12Yâuc max zâyf nongc yuungh congz cloon ngoongh wăngh jenz nyăngz samđ, six nongc Nănh cănh nyăngz samđ, Nănh nzac năngx đăngb zeengh quaix nyăngz tinc ninyh ah hâyđ đokc bix caux nzuf, yâuc tuz stâyv quâyx nongc stav stoif. 13Wâyc năngđ coong yuungh congz cloon ngoongh wăngh câu nyăngz samđ, cloon plauf ngoongh wăngh janx nyăngz saiđ ănz wax đomc naih wâyx nyăngz munh bix năngx hayh tuz stav đăngb, yămz stav stiz nyăngz stinb a, 14năngđ nâyx, Zâu Jix Tuz nyăngz samđ, Nănh six păngc stâyv quâyx yămz nyăngz Singx-Lingh bix stungx cănh nyăngz stinb nongc ayx stanyb lanyh, max naih paz max naih tinc nzêmh phunz Zâu Tênb-Huungh, six nongc stav nyâuh nyăngz stimz nyâuđ ayx tuz tauv laiv zanyf gâyh đutb wax đomc tayc nyăngz cumh pâuz jau, bix nongc bokc dlic stâyv quâyx săngh nyăngz Zâu Tênb-Huungh! 15Wâyc nây, Nănh six ayx Mungh Tongx Munh yămz nây săngb nhlengc wac, Nănh zuc tayc nongc suc ayx longđ yămz lôx nhlengc wac wax đomc stoif, phunz laiv lanh tuz êu taih six hayh tuz stipx nyunc phunz wax đomc stâyv quâyx nyăngz phănc. 16Wâyc yămz laiv tix naih njăpc jaoz jax toongx nyăngz tanz, yămz wa six oix zuc zu tauv njăpc jaoz jax toongx nyăngz tanz wax tauh munh quaix stâyv. 17Wâyc cungb wax tauh munh tayc blătc wax cuyb tanz nzăngđ tuz nongc sen, wâyc nây năngđ coong njăpc tanz wax tauh munh năngx jinh săngh wax cuyb tanz six max zeengx tuz nongc sen. 18Nzof, hănđ njinh tah yetx cuyb nhlengc wac lauf zuc nongc samđ njăpc taih. 19Wâyc Mô-sê coong muif tiuh gâyf njanh nyăngz lanyf phunz yetx stong songx munh wax zanyf, nănh zoz ngoongh wăngh jenz cloon yuungh congz samđ, cloon womz cloon stâyz buungb stib, cloon baih hâng njăngx quah, plauf ănz njinh wax glonc stâub cloon yetx stong songx munh, 20yâuc coong: “Nây six njăpc nhlengc wac nyăngz samđ tăng Zâu Tênb-Huungh zăpx phunz nyâuh.” 21Yâuc lauf tinyh năngđ, nănh zoz samđ plauf ănz wa njiuh tamf cloon muif huungđ nongc ayx stayb munh cumh pâuz wax đomc tungh zăngc tauv laiv. 22Âyz năngđ gâyf njanh, muif huungđ six tuz nongc samđ stav nzuf, nzof năngđ max naih samđ njâuc setb six max hayh tuz quanyf stoif.

23Wâyc nây, yămz wa, six cungb jangx pây wa cah zâyc guungh senz nyăngz nyăngz tax huungđ cuungv bix năngx tuz stav đăngb tăng nâyx đomc stanyb lanyh, six yămz nây, senz yămz wa cah zâyc guungh nyăngz tax huungđ lauf zuc nongc năngx gongx quaix nyăngz stanyb lanyh stav đăngb, 24wâyc Zâu Jix-Tuz six max zâyf nzac tăng bamh munh nyăngz puf ayx taih nyăngz đăngb zeengh tinc — six cungb jangx pây wa senz nyăngz wax đomc — yâuc senz tuz nzac wa tênb-toongh cah njaf ninyh, nongc phunz nâyx zanyf yămz Zâu Tênb-Huungh nyăngz cah đangc wâyc phunz pănh, 25yâuc max zâyf coong nongc stungx Nănh đuungx hâyđ, cayx năngđ wax đomc stayb munh pyây zuc muif nyăngv nzac wa đăngb zeengh tinc cah njaf ninyh stungx samđ yâuc max zâyf stiz nyăngz; 26wâyc năngđ coong max zâyf nâyx têx, Nănh six sămv zuc tanyđ zâuđ đuungx hâyđ tăng ah yac zuyx guungh zuyx nib wax zanyf. Six nâyx zanyf, yămz nây stâyz phangz đany, Nănh bix tuz hinđ setb taih ah hâyđ đokc, stungx Nănh nongc ayx stanyb lanyh, wâyc tayv stoif. 27Âyz năngđ tingc taih, bamh munh six zuc tayc ah hâyđ, nzof quaix đangz yâuc zuc stămđ stoif, 28lauf tinyh năngđ, Zâu Jix-Tuz cănh stungx Nănh ah hâyđ đokc nongc tayv đuungx lanh munh nyăngz stoif, Nănh zef năngx taih tah nyâyc hâyđ timb max zâyf wâyc nongc tayv stoif nzof, six nongc sađ njâuv pôz phunz wax đomc sâub sâuđ zu Nănh nyăngz munh.