Hipđ-lu 11:1

1Zen stimz six senz zen tingc yămz pănh sâub sâuđ zu wax đomc, nây six ayx zanyx manyf phunz pănh mangc max phătc tuz wax đomc. 2Wâyc zen stimz, bix lôx noib wax đomc munh tuz săngh gongx nyăngz zanyx manyf. 3Yâuc wâyc zen stimz pănh bix pâyz tuz coong nâyx nomz guungh nib tuz ayx săngh six păngc Zâu Tênb-Huungh coong nyăngz wac — phunz mangc phătc nyăngz muif huungđ six max zâyf tăng tuz mangc phătc nyăngz ayx taih. 4Wâyc zen stimz A-bên bix stungx stanyb lanyh phunz Zâu Tênb-Huungh năngx gongx quaix Ca-in nyăngz, păngc nây nănh bix tuz stunx ayx peengh stimz, nzof Zâu Tênb-Huungh yâuc stipx nănh congx nyăngz tax huungđ nongc ayx zanyx manyf, yâuc wâyc zen stimz A-bên bix lauf năngx jinh coong wac max cun nănh tayc. 5Wâyc zen stimz Ê-nokx bix tuz ênz muf, max zâuđ zuc tayc, nzof “munh yâuc lov nănh max phătc, wâyc Zâu Tênb-Huungh ênz nănh muf.” Nănh max zeengx tuz ênz muf wax zanyf, yâuc tuz stunx coong nănh ayx hoopđ Zâu Tênb-Huungh nyăngz nyâuđ. 6Wâyc nây, max naih zen stimz six max hayh ayx tuz hoopđ Zâu Tênb-Huungh nyăngz nyâuđ, wâyc laiv lanh taih lov Zâu Tênb-Huungh six oix zuc zen coong Nănh six senz naih, nzof Nănh six sađ sâuđ nyâyc phunz taih lov Nănh wax đomc munh. 7Wâyc zen stimz, Nô-ya tuz Zâu bux tauv max zeengx tuz phătc nyăngz jau wax zanyf, songđ cumh nzav, bix ayx ah saz đangđ lub nongc njâuv nănh nyăngz pyau munh, wâyc nây nănh songđ tingc bamh canz, yâuc tuz pênx ah lanh peengh stimz munh păngc yămz zen stimz. 8Wâyc zen stimz, Apx-la-ham tuz Zâu êu songđ mungv wac bix ninyh tauv nănh tuz stipx nyăngz nib tâyc wax nomz tinc, nănh setb ninyh yâuc max pâyz tuz nănh jinh đangh ninyh laiv. 9Wâyc zen stimz nănh bix ninyh yămz wa nyunc phunz nyăngz nib tâyc ayx cayx năngđ pitc stingx munh, yâuc cungb yămz đupx njiuh nzof I-sakx cloon Ya-côpx, yâuc tuz cloon nănh stipx ah cuyb nyunc nyăngz wac, 10wâyc nănh sâub sâuđ zu ah nomz dlanyh naih coonz tay, tăng Zâu Tênb-Huungh cănh ayx stăngc yâuc ta zux ix zâyv taih nyăngz dlanyh. 11Wâyc zen stimz max cun Sa-la hănđ côx tuz blătc toongv lauf năngx hayh tuz naih sây, wâyc nănh pâyz tuz nyunc wac wax Tauh six senz neetb stimz. 12Wâyc nây, lauf tăng ah lanh munh — max cun hănđ tayc nzof — six wax đomc sây stunz lauf tuz steengb taih đuungx hongđ cayx năngđ wa guungh wax đomc stingz tau, yâuc cayx năngđ coiđ sinh nyăngz njăuz staiz max hayh stauđ tuz tongf. 13Yămz zen stimz nyăngz jau, wax đomc muif lanh munh yâuc tayc nzof six max zeengx tuz stipx wax đomc nyunc nyăngz wac, cungb tuz mangc phătc tăng côz yâuc numđ nyađ stipx, songđ cănh stunx coong stiz six pitc nomz stâyz phangz taih nyăngz munh, yâuc ayx quaix jau nyăngz munh yămz nây nib minc. 14Nzof wax đomc coong nâyx đomc wac năngđ nâyx nyăngz munh, six tuz hinđ manyf coong stiz six jinh đangh lov senz stiz nyăngz stâyz phangz. 15Năngđ coong stiz săngx tauv stiz tăng wa setb ninyh nyăngz stâyz phangz, stiz six năngx hayh tuz naih săngx huđ nongc phunb đangz muf. 16Six nâyx zanyf stiz oix nongc ah nomz tinc năngx gongx quaix, nây six yămz wa cah zâyc guungh nyăngz stâyz phangz. Năngđ nây Zâu Tênb-Huungh songđ max numđ nyayz nănh stiz, yâuc coong Nănh six ayx stiz nyăngz Zâu Tênb-Huungh, wâyc Nănh bênc săngh ah nomz dlanyh phunz stiz. 17Wâyc zen stimz, Apx-la-ham songđ stungx I-sakx yămz nănh zuc stâyv nyăngz săngx huđ, max cun nănh tuz stipx nyunc nyăngz wac blătc, nănh cungb ah lanh đokc toonz nănh yâuc nzâyz ninyh stungx, 18nzof yămz wax tauh toonz, yâuc tuz naih wac coong: “Tăng I-sakx, mâyh nyăngz sây stunz six tuz nongc mâyh nyăngz bux êu,” 19wâyc pâyz coong Zâu Tênb-Huungh hayh ayx phunz munh tăng tayc săngh taih, nzof nănh yâuc tuz stipx nănh nyăngz toonz lauf, pây năngđ tăng tayc nyăngz tinc. 20Yâuc wâyc zen stimz I-sakx bix poou wac phunz Ya-côpx cloon Ê-sau coong tauv wax đomc cayx setb taih nyăngz dlayc. 21Wâyc zen stimz, Ya-côpx cayx quaix stâyv wax zanyf songđ poou wac phunz Yô-sepx nyăngz toonz săngh lanh săngh lanh têx, nănh songđ quâyc nzac bix cumf yămz nănh nyăngz pya pyac đanyf canyx bongc. 22Wâyc zen stimz, Yô-sepx tauv nănh cayx quaix stâyv songđ coong tauv I-sa-la-ên munh setb ninyh nyăngz jau, yâuc zăpx stiz tauv nănh nyăngz stung. 23Wâyc zen stimz, Mô-sê steengb stâyv taih, songđ tuz nănh nyăngz nzif pha ênz ninyh pinyx tuz pôz lav cah njaf, wâyc stiz phătc tauh sây quai, stiz yâuc max cumh nzav huungh nyăngz lanyf. 24Wâyc zen stimz, tauv lub taih, Mô-sê max songđ nyenc phunz hipđ ayx Pha-la-ôn huungh sab nyăngz toonz. 25Nănh yâuc noođ cloon Zâu nyăngz pec stingx songc tanyđ zâuđ, bix max noođ stipx tuz nyađ cay ah dlapc yămz stoif nyăngz jau. 26Nănh pâyz tuz coong zuc tanyđ nyayz yămz Zâu Jix-Tuz six puv quâyx yâuc năngx saix quaix yămz wa I-yipx wax đomc jax dlaih, wâyc nănh cungb sâub sâuđ zu mungc tuz stipx nănh nyăngz sâuđ nyâyc. 27Wâyc zen stimz nănh songđ tiuv I-yipx max cumh nzav huungh nyăngz siv totc, nănh yâuc nzac jab tanyđ ayx cayx năngđ cayx nănh phătc mangc max phătc wax Tauh. 28Wâyc zen stimz, nănh songđ ayx Pyenv Mengc Stêtz cloon hâuh samđ, phunz ninyh mêtc wax đomc sây coonz wax tauh max hoiđ tauv I-sa-la-ên munh. 29Wâyc zen stimz, songx munh songđ clăngv quaix Coiđ Stib cayx năngđ yăngh quaix nib gaib, nzof I-yipx munh coonx ninyh clăngv songđ zuc naz nzuf. 30Wâyc zen stimz, Yê-li-cô wax đomc dlanyh tongc songđ lakb, wâyc nănh zuc ninyh quib tuz nhlic noib. 31Wâyc zen stimz, maic stinb wax tauh munh nzif La-hapx songđ max zuc tayc cloon wax đomc max zen nyăngz munh, wâyc nănh nongc nyâuđ stipx wax đomc tungh seetx munh. 32Yaz zef năngx zuc coong luungđ timb heh? Wâyc săngx huđ max caux nongc phunz yaz coong tauv Gi-đê-ôn, Ba-lak, Sam-sôn, Yep-ta, Đa-witx, cloon Sa-mu-ên cloon wax đomc tâuc wac munh, 33Stiz six wax đomc păngc zen stimz bix hingh tuz manf côkz, ayx peengh stimz nyăngz jau, yâuc tuz stipx nyunc nyăngz wac, pongz njanh zongh nyăngz nzetx, 34bopc tayc tâuf lâuh nyăngz jab, pyăux đutb nzuc đao minb, tuz hingh staiz gumc, tuz njoongh yămz panx peengz nyăngz jau, ayx phunz wax đomc pitc nomz côkz nyăngz peengz zuc puc stauc. 35Naih đuungx lanh munh nzif tuz stipx stiz nyăngz pyau munh lauf six tayc bix tuz săngh taih wax đomc, six naih đuungx lanh munh zuc wâyb, yâuc max mungc coong oix nongc tuz pungx, phunz stiz hayh tuz stipx năngx gongx quaix yămz săngh taih nyăngz jau; 36nzof naih ah phanx yâuc pongh zuc stâyv nyâuđ, zuc munh coong pib yâuc zuc pya stătb, yâuc năngx zuc njab langb stayb zef zuc yămz nzauh. 37Stiz zuc zoz njăuz ôx, zuc tungh đoouf đoouf ayx iz phanx, stiz zuc tanyđ stâyv nyâuđ, zuc nzuc đao tayx tayc, stiz zuz pax jiz yuungh đupx, cloon yuungh đupx quaix sâuz quaix gwênc, zuc zâuđ max naih luungđ, zuc munh wâyb, zuc munh ayx đokc; 38(bamh canz max payh tuz phunz stiz yămz), zuc ninyh yămz wa stâyz phangz blănf, yămz zoongz zâyc, yămz wax đomc njăuz ngamh, cloon nib cotb. 39Stiz tuz naih zanyx manyf gongx wâyc stiz nyăngz zen stimz, six nâyx đomc munh yâuc max zeengx tuz stipx nyunc phunz stiz nyăngz wac, 40wâyc Zâu Tênb-Huungh bênc săngh năngx gongx quaix nyăngz jau taih phunz pănh, phunz năngđ max naih pănh, stiz six max hayh tuz clăkx clunh.