Dao Ao Dai Literal Text
Ga-la-ti 5:22
Verse 22 is marked below, with the whole chapter around it. Read from the start
Zâu Jix-Tuz zay phunz pănh tuz pungx goib. Wâyc nây, oix zuc stâuđ năngx tăngđ yâuc gâyf năngx ninyh đamz ayx nâuh nyăngz bănx tanz gôh.
Oix zuc mungv năngx gongx, yaz, Phao-lô, coong ănz nyâuh coong, năngđ coong nyâuh numđ sămv zuc ayx quaix catz, têx Zâu Jix-Tuz six max hayh stăngc tuz nyâuh laiv huungđ ax tiny. Yaz coong ah hâyđ timb phunz wax đomc ayx quaix catz nyăngz munh tauv laiv, stiz senz oix zuc ayx âyz muif tiuh gâyf njanh năngx nzuf. Nyâuh laiv lanh oix păngc gâyf njanh phunz tuz stunx ayx peengh stimz songđ zuc gâyh goib Zâu Jix-Tuz, yâuc pungx đutb Zâu nyăngz pôz gôh. Nzof năngx naih pănh six păngc Singx-Lingh, păngc zen stimz, pănh bix sâub sâuđ zu naih njih mungc tauv peengh stimz nyăngz jau. Wâyc yămz Zâu Yê-su Jix-Tuz cah njaf, nongc sen nyăngz six max zâyf ayx quaix catz max six max ayx, nongc sen six oix zuc naih zen stimz bix zef naih lanh stăngz lanh. Nyâuh six jinh đangh tiuv gongx tuz nâyx lec. Mănv tăng ayx phunz nyâuh max buc senz gâyf heh? Stiz hox nyăngz jau six max zâyf tăng êu nyâuh taih wax Tauh! Tix cay piny ayx phunz njinh săngh tungđ văn phutx nzuf. Yămz Zâu cah njaf, yaz zen coong, nyâuh six max cănh nyâyh njingc ninyh. Six, laiv tauh ayx phunz nyâuh nyâuđ lunc songđ zuc tingc stoif, max cun wax tauh munh six mănv. Six, yâuf pez lex, năngđ coong yaz năngx jinh nzônh ayx quaix catz nyăngz gâyf ha săngh laix yaz bix năngx zuc ayx huđ heh? Năngđ nâyx têx wâyc săpc đăngc zax bix pamf nyăngz jau six tuz quanyf nzuf nzec. Yaz oix nongc loou ayx phunz nyâuh nyâuđ lunc wax đomc munh, wănh cănh imz stiz zef.
Yâuf pez lex, nyâuh tuz sên taih six nongc ayx pungx goib nyăngz munh, nzof tuz pungx goib nyăngz jau six max zâyf phunz pănh taih nongc ayx âyz stinb a oix nyăngz jau, plănc taih, six oix zuc lanh stăngc lanh yămz stăngz nyăngz jau. Wâyc muif tiuh gâyf njanh nyăngz lanyf six tuz ayx clăkx clunh nzuf yămz ah tiuh lanyf, coong: “Mâyh oix zuc stăngz mâyh nyăngz cah sinh munh cayx năngđ cănh nyăngz stinb nâyx.” Six năngđ coong nyâuh lanh zef tăpc lanh yâuc lanh naz lanh, six oix zuc năngx cayb, sangx nyâuh cănh lanh ayx phunz lanh zuc stutc nzuf.
Năngđ nây, yaz bux coong, oix zuc phunz Singx-Lingh yenv, nyâuh nzăngđ max ayx âyz stinb a oix nyăngz jau. Wâyc stinb a oix nyăngz jau six nzeengz cloon Singx-Lingh, nzof Singx-Lingh oix nyăngz jau yâuc nzeengz cloon stinb a. Wâyc iz leepb six tinyh tămx tinyh nzeengz, wâyc nây six max naih coong bix tinyh phanv nyâuh oix ayx laiv huungđ, bix ayx. Năngđ coong nyâuh tuz Singx-Lingh yenv, nyâuh six max yămz gâyf njanh cah đi. Stinb a oix nyăngz jau six hinđ manyf taih năngđ nây nâyx, wax đomc six: pongz lauh, max đăngb zeengh, loongh cloongb, paix miuc hanyh, ayx papz, tinyh panx, tinyh nzeengz, stâyx munz, siv totc, tinyh hănđ, max hoopđ stimz, phunz goib ayx sax peob, numđ hănđ, tiu binz, nyađ nhlinc hopb cloon đuungx huungđ năngđ nây nâyx, yămz wax đomc jau, yaz quinb bux nyâuh, cayx năngđ cah đangc yaz quinb bux nyâuh nâyx, coong laiv lanh ayx wax đomc jau năngđ nâyx six max tuz stipx Zâu Tênb-Huungh nyăngz côkz. Nzof Singx-Lingh nyăngz cumh pâuz jau, six lanh stăngz lanh, numđ nyađ, peengh oonz, nyâuđ đao, wăn, dlênc, ayx nyâuđ zanyx, dlênc stimz dlênc âyx, hayh cun tuz cănh; max naih laiv tiuh gâyf njanh bix nzeengz cloon nâyx đomc jau. Nzof, laiv lanh săngh Zâu Yê-su Jix-Tuz nyăngz munh, six zoz stinb a oix nyăngz jau cloon stâyx munz oix nongc tauv laiv wax đomc tingz ănz săpc đăngc zax nzuf.
Năngđ coong pănh mungc Singx-Lingh săngh, pănh six oix zuc phunz Singx-Lingh yenv pănh. Năngx gâyf cungb tâuh cănh tuz gongx bix lanh ayx peo lanh yâuc lanh hănđ lanh.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.