Dao Ao Dai Literal Text
Ê-phê-sô 4
Năngđ nây, yaz six ah lanh nzauh munh yămz Zâu, joođ nyâuh oix zuc yămz năngx payh cloon nyâuh tuz êu taih nyăngz jau, oix zuc yămz manf dlayc nhlimc cănh ayx jenz, yâuc ayx nyâuđ dlênc, ayx nyâuđ đao, lanh nyangc lanh yămz stăngz cah njaf, nzac jab leđ phunz naih Singx-Lingh hoopđ stimz tongh âyx nyăngz jau. Cungb naih ah nomz stinb cloon ah tauh Singx-Lingh cuungv, lauf cayx năngđ nyâuh tuz sên taih songc ah huungđ njih mungc yămz nyâuh tuz sên taih nyăngz jau, cungb ah tauh Zâu, ah huungđ zen stimz, ayx ah huungđ quaix-gâyf, cungb naih ah tauh Zâu Tênb-Huungh, six tinyh đoih nyăngz pha, senz yămz năngx njăngb quaix muif lanh wax Tauh, yămz muif lanh mungh tongx, yâuc yămz muif lanh cah njaf. Six pănh muif lanh tuz sađ phunz nyăngz pôz six cănh âyz Zâu Jix-Tuz sađ phunz nyăngz jau. Wâyc nây, naih wac ja coong:
“Nănh staox njăngb nyăngz tinc ninyh,
ênz cloon sax panc tauh nzauh munh,
yâuc sađ muif huungđ pôz phunz bamh munh.”
Nzof coong, “Nănh staox njăngb” âyz gâyf six ayx laix, ha max zâyf Nănh lauf nzac taih nây nib hav nyăngz tinc haz? Nzac taih wax Tauh six lauf staox ninyh yămz năngx njăngb quaix muif tab guungh wax Tauh, phunz Nănh hayh ayx tuz muif huungđ clăkx clunh nzuf. Nănh oonz ah phanx ayx cumh pâuz munh, ah phanx ayx tâuc wac munh, ah phanx ayx nzônh Cuđ Jenx nyăngz munh, ah phanx ayx stênx steengb cloon nzaox gâyf stênx steengb, nongc bênc phunz wax đomc đăngb zeengh munh naih cumh pâuz ayx clăkx clunh nzuf, nongc zâyv Zâu Jix-Tuz nyăngz stinb, ayx tuz tauv laiv zanyf pănh tinyh đoih naih hoopđ stimz tongh âyx yămz zen stimz, yâuc pâyz Zâu Tênb-Huungh nyăngz Toonz, săngh munh lub munh, yâuc tuz clăkx clunh cayx năngđ Zâu Jix-Tuz, phunz pănh max zâyf cayx năngđ munh sây, zuc munh hox yâuc ênz ninyh lêpc munh cănh stuv taih nyăngz jau, nongc cux quaiz nyăngz zux ix puv maoh jaf munh wax đomc. Six oix pănh nongc stăngz nyăngz jau coong senz gâyf setb taih, pănh nzăngđ hayh lub taih yămz muif stinz jau huungv staox Nănh ninyh, senz ayx pyây wax Tauh, six Zâu Jix-Tuz, yâuc tăng Nănh bix lomc stinb sangc tuz căpx taih tinyh blaz păngc muif nomz taux, âyz mănv cănh naih mănv nyăngz phănc cumh pâuz ayx, nongc phunz stinb tuz lub staox taih yâuc cănh hayh zâyv staox yămz stăngz cah njaf.
Năngđ nây, yaz coong nâyx đomc jau quinb nyâuh yămz Zâu nyăngz manyh, gâyf năngx yămz ayx cayx năngđ max zen nyăngz munh gôh, stiz cungb âyz cănh nyăngz pyây lâyđ nyâyh ayx max săngh nyăngz jau. Wâyc stiz nyăngz pyây lâyđ nzămc meengh, gâyh Zâu Tênb-Huungh nyăngz săngh mengc côz, wâyc stiz oongx nzongf yâuc nyâuđ nhlengc. Stiz yâuc max pâyz luungđ, songđ cungb nyâyh nyađ, bix âyz stimz ninyh ayx longđ muif huungđ naih wâyx nyăngz jau max pâyz tuz ngăngc. Six nyâuh tuz hoođ pâyz Zâu Jix-Tuz six max năngđ nâyx, wâyc nyâuh six tuz numđ lănv quaix Nănh yâuc tuz hoođ pâyz Nănh, cayx năngđ Zâu Yê-su nzaox nyăngz senz gâyf nâyx, coong oix zuc quanyf nzuf cah đangc nyâuh ayx nyăngz jau, senz nyâuh nyăngz lôx mengc zuc huđ ninyh wâyc zuc jaf âyz cănh nyăngz nyâuđ ayx wax đomc, yâuc oix zuc păngc Singx-Lingh bix coi nyâuh nyâyh nyăngz jau pênx săngb nyăngz taih, yâuc oix zuc pênx săngb nyăngz munh, senz tuz zuyx taih âyz năngđ Zâu Tênb-Huungh nyăngz munh — yămz peengh stimz nyăngz jau cloon đăngb zeengh yămz senz gâyf nyăngz jau.
Năngđ nây, muif lanh munh oix zuc quanyf coong puv maoh nyăngz jau, oix zuc coong senz nyăngz wac ănz pănh nyăngz cah sinh munh, wâyc pănh tinyh đoih six songc ah nomz stinb. Năngđ coong nyâuh siv nhlenx six năngx gâyf ayx longđ stoif. Năngx gâyf phunz nyâuh siv nhlenx tauv bah noib mutc zâyc, yâuc năngx gâyf ayx phunz manđ naih congv nzac. Ayx stac nimc nyăngz munh gâyf năngx ayx stac nimc gôh. Nănh six oix zuc nongc cănh nyăngz puf ayx gongx nyăngz cumh pâuz, phunz naih luungđ tungh zăngc, bix tanb phunz cloon munh zâuđ munh, six năngx gongx têx. Năngx gâyf phunz laiv zâux wac zokb tăng nyâuh nyăngz nzetx setb taih, six oix zuc coong wax đomc wac gongx hayh stăngc tuz pongh zuc zâuđ nanc wax đomc munh, phunz wax đomc wac hayh stăngc tuz phunz mungv nyăngz munh, yâuc năngx gâyf ayx phunz Zâu Tênb-Huungh nyăngz Singx-Lingh stauh, păngc Nănh nyâuh bix tuz tăpb yenx zu tauv tuz njâuv wax noib. Nyâuh oix zuc quanyf nzuf muif huungđ imz byatc, siv lub, siv nhlenx, tinyh panx, coong peo munh, cloon muif huungđ okx nyăngz jau. Nzof, nyâuh six oix zuc lanh ayx gongx ănz lanh, lanh hâuđ lênh lanh, lanh quanyf stoif phunz lanh cayx năngđ Zâu Tênb-Huungh quanyf stoif phunz nyâuh yămz Zâu Jix-Tuz nâyx.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.