Cumh Pâuz 9

1Six Sau-lô yâuc njinh luh huukb mađ, yâuc oix tayx Zâu nyăngz stayb sây, songđ ninyh pongh stayb munh pyây, 2joođ nănh ayx stâub pungx ninyh phunz wa Đa-mat dlanyh nyăngz muif nomz huyđ toongh, phunz năngđ coong nănh ninyh lov tinyh phanv pongh laiv lanh lêpc Zâu nyăngz munh, njinh munh nzif munh pha, nănh six stayb stiz ênz lauf wa Yê-lu-sa-lem. 3Nănh jinh đangh setb jau ninyh, cayx tauv wa Đa-mat dlanyh wax zanyf, lênh dlih naih gwăngz eeng tăng wa guungh siux nzac nănh ninyh, 4nănh songđ glinyf wa nib, yâuc numđ naih wac stingb coong ănz nănh coong: “Sau-lô lex, Sau-lô, săngh laix mâyh bix ayx huđ ănz yaz?” 5Nănh songđ coong: “Zâu lex, Mâyh six mănv heh?” Zâu coong: “Yaz six Yê-su mâyh jinh đangh ayx huđ ănz wax tauh; 6six mâyh phanv nyoongz quef bix nzac wa dlanyh ninyh gôh, mâyh oix zuc ayx luungđ, six cănh naih munh bux phunz mâyh ayx.” 7Nzof cloon nănh ninyh wax đomc munh, yâuc stâuđ wa max coong tuz wac, stiz numđ wac stingb six max phătc mănv. 8Sau-lô songđ tăng wa nib nyoongz quef, six nănh goib mâyc nănh yâuc max phătc luungđ tiny. Tăng wa, stiz songđ nzauf nănh nyăngz puf, jinb nănh nzac wa Đa-mat dlanyh ninyh. 9Tuz pôz noib nănh max phătc luungđ tiny, nănh yâuc max nhlinc max hopb.

10Wax zanyf yămz wa Đa-mat dlanyh naih ah lanh stayb sây hipđ ayx A-na-ni. Phătc hinđ yangh nyăngz jau, Zâu coong ănz nănh, coong: “A-na-ni lex!” Nănh songđ coong: “Zâu lex, yaz yămz nây!” 11Zâu songđ coong ănz nănh: “Nyoongz quef, bix ninyh tauv wa hipđ ayx jau zac wax stinz jau, lov ah lanh Ta-sat munh hipđ ayx Sau-lô yămz Yu-đa nyăngz pyau, wâyc nănh jinh đangh cloo Zâu, 12Yămz hinđ yangh nyăngz jau, nănh phătc ah lanh munh bux hipđ ayx A-na-ni, nzac taih tăpx puf ănz nănh, phunz nănh nyăngz mâyc tuz phătc jau.” 13Six A-na-ni tauz coong: “Zâu lex, yaz numđ naih munh đuungx coong tauv nâyx tauh munh, nănh six ayx bah laiv săngb huđ ănz Mâyh wax đomc đăngb zeengh munh yămz wa Yê-lu-sa-lem. 14Nzof nâyx zanyf, nănh yâuc tuz tăng wax đomc stayb munh pyây jaoz lanyf phunz, nongc ninyh zoz stayb, zen caođ Mâyh nyăngz manyh wax đomc munh.” 15Six Zâu coong ănz nănh: “Phanv ninyh gôh, wâyc nâyx lanh munh six lauf Yaz sên taih nyăngz munh, nongc nzâyz Yaz nyăngz manyh ninyh nzônh phunz wax đomc pitc stingx munh, njinh cloon wax đomc huungh stix, cloon I-sa-la-ên nyăngz munh; 16nzof Yaz six phunz nănh pâyz tuz, nănh oix zuc wâyc Yaz nyăngz manyh, bix zuc tanyđ zâuđ đuungx ayx năngđ laix.” 17Tăng wa, A-na-ni songđ setb jau ninyh nzac wax sênz pyau ninyh. Tăpx puf ănz Sau-lô yâuc coong: “Sau-lô lex, Zâu paiđ yaz taih — six Zâu Yê-su, senz mâyh taih nây bix hinđ setb taih pongh mâyh yămz wa bah đamx jau wax Tauh — nongc phunz mâyh hayh tuz mangc phătc yâuc tuz Zâu Singx-Lingh pong nyâuđ.” 18Songđ lênh dlih, naih ah huungđ cayx năngđ jix nâyx tăng nănh wa mâyc tuih nzac taih, nănh songđ hayh mangc tuz phătc, nănh nyoongz quef taih, songđ ayx quaix-gâyf; 19Nănh nhlinc hopb songđ tuz huih jab lauf.

Wax zanyf, nănh cloon wa Đa-mat dlanyh wax đomc stayb sây yămz batz noib. 20Nănh songđ yămz wax đomc huyđ toongh, nzônh Zâu Yê-su coong, Zâu Yê-su six Zâu Tênb-Huungh nyăngz Toonz. 21Munh tinyh đoih mungv songđ numđ nyâyh ganc, yâuc coong: “Lâyc max zâyf ayx huđ ănz zen caođ nâyx nomz manyh wax đomc munh, yămz wa Yê-lu-sa-lem dlanyh wax tauh haz? Nzof nănh max zâyf lauf wâyc wax huungđ cumh pâuz bix taih nây, nongc zoz wax đomc zen nyăngz munh nongc stayb ênz muf phunz wax đomc stayb munh pyây haz?” 22Six Sau-lô yâuc cun ayx cun njoongh staox, ayx phunz yămz wa Đa-mat dlanyh nyăngz Yu-tai munh numđ nyâyh ganc, wâyc nănh ayx zanyx manyf coong Yê-su six Zâu Jix-Tuz.

23Tăng wa, tuz đuungx noib cah đangz, Yu-tai munh songđ tinyh đoih ta zux ix tayx nănh. 24Six stiz wax đomc zux ix yâuc tuz bux phunz Sau-lô pâyz. Ayx tuz munh lôx năngx yămz wax đomc dlanyh jeengh, zu quaix noib quaix munf nongc tayx nănh. 25Tăng wa, Sau-lô songđ njinh nzămc setb ninyh, nănh wax đomc stayb sây pungx nănh ănz ah nomz zongf cah njaf, pungx nănh quaix wa dlanyh bah stab cungh ngwaic ninyh.

26Six ninyh tauv wa Yê-lu-sa-lem, nănh oix cloon stayb sây buz songc yămz, six stiz yâuc tinyh đoih cumh nzav nănh, max zen coong nănh six stayb sây. 27Tăng wa, Ba-na-batc songđ ênz nănh ninyh pongh wax đomc cumh pâuz munh, yâuc lănv phunz stiz tauv Sau-lô tuz pâyz Zâu ayx năngđ laix, yămz wa bah đamx jau, cloon Zâu coong ănz nănh wax đomc, yâuc lănv tauv nănh yămz wa Đa-mat dlanyh, bix pungx stimz tim Zâu Yê-su nyăngz manyh nzônh gâyf. 28Tăng wa, nănh songđ cloon stiz yămz, yâuc setb ninyh setb lauf yămz wa Yê-lu-sa-lem, pungx stimz tim Zâu nyăngz manyh nzônh gâyf. 29Nănh cloon coong Hi-lapc wac wax đomc Yu-tai munh cun coong yâuc cun nzeengz gâyf, six stiz lov jau tayx nănh. 30Six wax đomc yâuf pez pâyz tuz nâyx đomc, songđ ênz nănh nzac wa Si-sa-li-ya dlanyh muf, zef stungx nănh ninyh wa Ta-sat.

31Năngđ nâyx, lomc Yu-đê stâyz phangz, cloon Ga-li-lê stâyz phangz, cloon Sa-ma-đi stâyz phangz nyăngz jiux pangx tuz naih peengh oonz yămz; wâyc tuz tinyh đoih zanyb Zâu staox taih, yâuc tuz Zâu Singx-Lingh oonz nyâuđ, jiux pangx songđ tuz phutx hongđ staox. 32Tăng wa, Pi-tê songđ ninyh nzêux muif nomz stâyz phangz, yâuc nzac wa Lit-đa dlanyh ninyh, pongh yămz wa wax đomc zen Zâu nyăngz đăngb zeengh munh. 33Yămz wa nănh pongh ah lanh munh, bux hipđ ayx Ai-nê-atc, quac phâyx wa zâuv tuz yetc nyăngv, nây six ah lanh munh quac munh. 34Pi-tê coong ănz wax tauh munh pha coong: “Ai-nê-atc lex, Zâu Yê-su Jix-Tuz zany gongx phunz mâyh. Nyoongz quef bix nzâyz mâyh nyăngz zâuv muf gôh,” nănh songđ toongx sangf nyoongz quef. 35Muif lanh yămz wa Lit-đa, cloon Sa-lôn nyăngz munh, phătc nănh gongx, stiz songđ tinyh đoih taih lêpc Zâu.

36Wax zanyf, yămz wa Yăp-pha dlanyh, yămz stayb sây buz, naih ah lanh munh nzif bux hipđ ayx Ta-bi-ta, wax nomz bux, phanv taih, six hipđ ayx Đô-cat. Nănh six ayx đuungx huungđ cumh pâuz gongx, nănh yâuc ayx đuungx huungđ stăngc munh nyăngz cumh pâuz. 37Yămz wax đomc noib, nănh săngh gumc, yâuc tayc. Tăng wa, munh songđ đaox nănh nyăngz stayđ, yâuc tăpx nănh ănz wa cah zâyc tab pyau nyăngz bôngh njaf. 38Wâyc Lit-đa six yămz stătx wa Yăp-pha dlanyh, Wax đomc stayb sây numđ coong Pi-tê jinh đangh yămz wa, stiz songđ paiđ iz lanh munh ninyh pongh nănh, zăpx coong: “Êu nănh coonx taih buz nây.” 39Tăng wa, Pi-tê songđ nyoongz quef cloon stiz muf, muf tauv tinc, stiz songđ ênz nănh staox wa cah zâyc tab pyau ninyh, nzof wax đomc munh nzif qua, yâuc tinyh đoih taih stâuđ nănh wa cah sinh haoh, zef nuz phunz nănh mangc wax đomc guyz lub cloon đuungx huungđ guyz, tăng Đô-cat năngx jinh cloon stiz yămz bix ayx phunz wax đomc. 40Pi-tê êu munh tinyh đoih setb cungh ngwaic ninyh nzuf, songđ quâyc nzac cloo Zâu, nzof nănh songđ winb muf wax tauh munh tayc, yâuc coong: “Ta-bi-ta, nyoongz quef gôh.” Tăng wa, Ta-bi-ta songđ goib mâyc, mangc phătc Pi-tê, nănh songđ nyoongz quef. 41Pi-tê songđ nongc puf tanyđ nănh nyoongz quef, yâuc êu wax đomc đăngb zeengh munh, cloon wax đomc au qua nzac lauf, phunz stiz mangc wax tauh munh nzif năngx jinh săngh. 42Nâyx đomc dlayc tuz lănv ninyh pong nzuf wa Yăp-pha dlanyh, munh đuungx songđ taih zen Zâu. 43Blătc wa, Pi-tê năngx yămz wa Yăp-pha dlanyh đuungx noib, cloon ah lanh munh bux hipđ ayx Si-môn, ayx đupx stangc nyăngz munh.