Cumh Pâuz 12

1Wax zanyf, yămz wax dlapc, Hê-lôtx huungh quef coonz ayx đokc hoiđ ah đomc jiux pangx nyăngz munh. 2Wax zanyf, nănh nongc nzuc đao tayx Ya-coopc, Yô-hanx nyăngz tah. 3Tăng wa, phătc nâyx đomc dlayc hoopđ Yu-tai munh nyăngz nyâuđ, nănh zef ninyh zoz Pi-tê lauf clăngđ (nâyx đomc dlayc setb taih yâuc toix Nzu Max Ănz Piny nyăngz stêtz), 4nănh zoz Pi-tê clăngđ ănz nzauh, phunz pyâyz peob peengz jămđ leđ nănh, cayx ta zu tauv blătc Pyenv Mengc Stêtz mănc ênz nănh taih tongx songx stămđ. 5Năngđ nâyx, Pi-tê hănđ zuc clăngđ ănz wa nzauh, six yâuc naih jiux pangx munh nzac jab huungv staox Zâu Tênb-Huungh ninyh, cloo Zâu phunz nănh. 6Wax zanyf, toix Hê-lôtx cayx ta ênz nănh setb taih stămđ, cah đangc wax munf, Pi-tê jinh đangh phâyx yămz iz lanh peengz mungh tongx congv, zuc iz stinz njab langb stayb, yâuc naih wax đomc jămđ nzauh peengz, yămz wa nzauh jeengh cah đangc jămđ nzauh. 7Phanv mangc, naih ah tauh Zâu nyăngz stinz munh taih stâuđ nănh wa cah sinh, gwăngz eeng pong nzuf wax nomz nzauh njaf. Wax zanyf stinz munh beb Pi-tê wa lah tam, êu nănh điub, bux coong: “Coonx nyoongz quef gôh,” nzof wax đomc njab langb, songđ setc gâyh nănh nyăngz puf nzuf. 8Wax zanyf, stinz munh coong ănz nănh: “Stayb quav langb bix tapc mâyh nyăngz stub buyx gôh.” Tăng wa, nănh songđ âyz ayx. Stinz munh zef coong ănz nănh: “Zuz mâyh cungh ngwaic byenđ guyz bix lêpc yaz ninyh gôh.” 9Nănh lêpc stinz munh setb cungh ngwaic ninyh, six Pi-tê max pâyz coong stinz munh ayx nyăngz cumh pâuz six senz nyăngz, wâyc nănh cungb nyâyh coong nănh phătc hinđ yangh nyăngz jau. 10Stiz ninyh pitb wax đomc jămđ nzauh peengz, zetx tab, tauv nyâyc tab, zef ninyh tauv nzac dlanyh wax tauh jab jeengh, jeengh yâuc cănh coib phunz stiz. Setb cungh ngwaic ninyh, stiz yăngh jămc ah stinz jau, stinz munh songđ taux wa gâyh nănh. 11Pi-tê songđ điub taih, yâuc coong: “Nâyx zanyf, yaz songđ senz pâyz coong, Zâu paiđ Nănh nyăngz stinz munh taih, nongc njâuv yaz gâyh đutb Hê-lôtx nyăngz puf đi, cloon Yu-tai munh oix hoiđ yaz wax đomc muif huungđ dlayc.” 12Wax zanyf, nănh pâyz tuz năngđ nâyx, nănh songđ ninyh Yô-hanx hipđ ayx Ma-cô nyăngz nzif, Ma-li-ya nyăngz pyau, yămz wa naih đuungx lanh zen Zâu nyăngz munh jinh đangh căpx dlonf cloo Zâu. 13Nănh nzoz wa cungh ngwaic wax tungđ jeengh, naih ah lanh sab pâuz, bux hipđ ayx Lô-đa, taih tauz wac. 14Wâyc saz tuz Pi-tê nyăngz wac stingb, yâuc wâyc numđ nyađ, nănh max săngx tauv coib jeengh, zef tiuv muf wa pyau njaf, bux coong: “Pi-tê jinh đangh stâuđ yămz wa jeengh cah đangc.” 15Six stiz coong ănz wax tauh sab coong: “Mâyh max sting lêc stah.” Six nănh njinh luh coong senz naih nef. Tăng wa, stiz coong: “Ha six Pi-tê nyăngz stinz munh lêc.” 16Six Pi-tê yâuc njinh luh nzoz wa jeengh, tauv stiz ninyh coib jeengh phătc Pi-tê, songđ numđ nyâyh ganc. 17Wax zanyf, nănh hangb puf êu stiz gâyf nyaoc, nănh songđ lănv tauv Zâu ênz nănh setb nzauh taih ayx năngđ laix. Nănh yâuc bux stiz coong: “Oix zuc lănv nâyx đomc dlayc phunz Ya-coopc cloon wax đomc yâuf pez.” Nănh songđ setb, quaix pitc nomz tinc ninyh. 18Tăng wa, tauv guungh gwăngz, wax đomc jămđ nzauh peengz songđ naih lunc max jenz, wâyc max pâyz Pi-tê quaix laiv ninyh. 19Hê-lôtx songđ êu stiz năngx cayb lov Pi-tê, six lov max pongh, nănh zah naic wax đomc peengz tuz songđ setb lanyf tayx stiz. Nănh yâuc tăng Yu-đê stâyz phangz nzac wa Si-sa-li-ya dlanyh muf, songđ yămz wa.

20Wax zanyf, Hê-lôtx huungh jinh đangh hănđ Tai-lapx munh cloon Sai-đoon munh. Tăng wa, stiz songđ tinyh ênz ninyh pongh Hê-lôtx, stiz hox Ba-la-sa-tat, nănh six Hê-lôtx huungh nyăngz stinb sinh quanz, stiz taih joođ coong hoopđ, wâyc zuc stiz nyăngz stâyz phangz, six păngc tăng Hê-lôtx huungh, stâyz phangz nyăngz nhlinc hopb. 21Tauv beengc stiz cănđ taih nyăngz noib, Hê-lôtx songđ zuz huungh guyz, taih stâyv wa huungh tinc, yămz stiz cah đangc coong wac. 22Songx munh songđ hamv stingb lub coong: “Lâyc six ah tauh stinz nyăngz wac max zâyf bamh munh nyăngz wac!” 23Songđ lênh dlih naih ah tauh Zâu nyăngz stinz munh bopc nănh, wâyc zuc nănh max stungx gwăngz eeng phunz Zâu Tênb-Huungh, nănh songđ zuc jeengz zâuz, bix siv setc.

24Six Zâu Tênb-Huungh nyăngz Cuđ Jenx, yâuc tuz nzônh ninyh cun ayx cun quăng.

25Tăng wa, Ba-na-batc cloon Sau-lô lauf tauv Yê-lu-sa-lem, stiz ayx soongb stiz nyăngz cumh pâuz, songđ ênz cloon Yô-hanx hipđ ayx Ma-cô wax tauh ninyh.