3 Yô-hanx 1

1Yaz, jiux pangx nyăngz munh côx pungx phunz senz stăngz nyăngz Gai-atc, six yaz stăngz yămz senz gâyf nyăngz munh.

2Senz stăngz nyăngz tah lex, yaz cloo zâu phunz mâyh yămz manf dlayc hayh tuz yămz gongx, njinh cloon stinb a lauf tuz naih yămz zoongx, cayx năngđ mâyh nyăngz mengc hoonh tuz yămz gongx nâyx. 3Yaz senz numđ nyađ nzongf, wâyc naih yâuc pez taih nây, yâuc ayx senz nyăngz zanyx manyf coong tauv mâyh, coong mâyh senz neetb stimz ayx âyz senz gâyf. 4Yaz numđ coong yaz nyăngz sây ayx âyz senz gâyf, senz max naih laiv huungđ ayx phunz yaz năngx numđ nyađ têx nây gôh.

5Stăngz nyăngz tah lex, mâyh jinh đangh âyz zen stimz, bix ayx nyăngz muif huungđ cumh pâuz, phunz wax đomc yâuf pez, mâyh yâuc năngx ayx wax đomc phunz cloon wax đomc zeb njingc nyăngz munh, 6wax đomc yâuf pez, yămz jiux pangx munh nyăngz cah đangc, ayx zanyx manyf coong tauv mâyh nyăngz stăngz. Mâyh yâuc stăngc phunz stiz setb jau ninyh, payh tuz cloon Zâu Tênb-Huungh, 7stiz six wâyc Zâu nyăngz manyh bix setb jau ninyh, stiz yâuc max stipx tăng pitc stingx munh nyăngz laiv huungđ. 8Wâyc nây pănh six oix zuc stăngc wax đomc munh năngđ nâyx, phunz pănh tuz naih phănc songc cloon wax đomc ayx cumh pâuz phunz senz gâyf nyăngz munh.

9Yaz ja cay tix zâux wac phunz jiux pangx, six Đi-ô-tê-phêt, oix ayx pyây wax tauh, max oix stipx buz. 10Wâyc nây, năngđ coong yaz ninyh tauv wa, yaz six clunđ nzuf nănh ayx nyăngz jau, wâyc nănh nongc wac đokc bix nzeengz cloon buz wax đomc. Ayx năngđ nâyx nănh lauf max zeengx numđ caux, nănh zef lauf max stipx wax đomc yâuf pez, nzof laiv lanh oix stipx, nănh yâuc cangđ, luiđ stiz setb jiux pangx ninyh.

11Stăngz nyăngz tah lex, năngx gâyf ayx âyz huđ nyăngz jau, six oix zuc ayx âyz gongx jau. Laiv lanh ayx gongx six săngh Zâu Tênb-Huungh nyăngz munh, laiv lanh ayx huđ six max zeengx phătc quaix Zâu Tênb-Huungh.

12Muif lanh munh ayx gongx nyăngz zanyx manyf tanv Đê-mêt-li-atc, senz gâyf lauf ayx zanyx manyf. Nzof, buz lauf cănh ayx zanyx manyf, mâyh yâuc pâyz tuz coong, buz ayx nyăngz zanyx manyf six senz nyăngz.

13Yaz năngx naih đuungx huungđ oix ja phunz mâyh, six yaz max oix nongc măkc nongc pătx ja phunz mâyh. 14Yaz numđ oix tuz pongh mâyh căn, phunz pănh tuz minb toix minb coong wac. 15Joođ peengh oonz cloon mâyh yămz. Yâuf pez tinyh đoih yămz nây lauf săngx tauv mâyh. Joođ pungx wac đeh tauv yămz wa nyăngz yâuf pez, săngx lanh săngx lanh têx.