1 Ti-mô-tai 3

1Nâyx zâux wac six senz nyăngz: “Năngđ coong laiv lanh oix ayx jiux pangx nyăngz munh côx, wax lanh munh oix ayx nyăngz cumh pâuz six gongx nzongf.” 2Năngđ nây, ayx jiux pangx nyăngz munh côx six oix zuc max naih tinc nzêmh, cungb nongc ah lanh au cuungv, pâyz bôngh stimz, hayh cun tuz cănh, wăn stimz, naih nyâuđ stipx zeb, hayh nzaox tuz munh, 3max blaz tiu, max sêu lunc, six zuc dlênc, yâuc gongx, yâuc max mauh nyanh, 4hayh cun tuz gongx cănh nyăngz pyau munh, hayh nzaox sây mungv wac yâuc pâyz gâyf clăkx clunh nzuf, 5(wâyc năngđ coong laiv lanh munh max hayh cun nănh nyăngz pyau munh, nănh ayx laix hayh jămđ tuz Zâu Tênb-Huungh nyăngz Jiux Pangx?), 6ah yac săngđ zen nyăngz munh max hoopđ zuc ayx jiux pangx nyăngz munh côx, wangb nănh hayh ayx lub bix zuc tingc stoif cayx năngđ manđ nâyx. 7Ayx jiux pangx nyăngz munh côx yâuc zuc naih jiux pangx cungh ngwaic nyăngz munh ayx gongx nyăngz zanyx manyf, nănh nzăngđ max zuc munh hib yâuc max zuc manđ nyăngz ploz lopb.

8Lauf tinyh năngđ, wax đomc pangx pôx munh oix zuc wăn stimz, max tuz coong iz zâux wac, max tuz blaz tiu, max mauh tax huungđ, 9oix zuc nongc đăngb zeengh nyăngz stimz nyâuđ jămđ gongx nây plongx yangh nyăngz zen stimz. 10Nzof yâuc, oix zuc stâyv stiz mangc đangc, phătc max naih tinc nzêmh, nzof mănc phunz stiz ayx cumh pâuz.

11Wax đomc au lauf tinyh năngđ, oix zuc wăn stimz, max tuz coong wac huđ, hayh cun tuz cănh, yămz manf dlayc yâuc ayx nyâuđ zanyx.

12Wax đomc pangx pôx munh oix zuc cungb nongc ah lanh au cuungv, hayh cun tuz gongx cănh nyăngz sây cloon pyau njaf munh. 13Wâyc wax đomc ayx cumh pâuz gongx nyăngz munh, six tuz naih manyh tauh gongx, yâuc tuz pungx zen stimz yămz Zâu Yê-su Jix-Tuz.

14Yaz ja tix cay nâyx đomc wac phunz mâyh, senz numđ oix tuz ninyh pongh mâyh năngx căn, 15six năngđ coong yaz max tuz ninyh căn, mâyh yâuc hayh pâyz tuz oix zuc ayx năngđ laix yămz Zâu Tênb-Huungh nyăngz pyau, senz stâyv quâyx săngh wax Tauh Zâu Tênb-Huungh nyăngz Jiux Pangx, six senz gâyf nyăngz njâuh cloon coonz tay. 16Nâyx đomc hinđ yangh yămz zen gongx nyăngz jau senz lub nzongf:

“Senz tuz hinđ setb taih săngh tauh bamh munh wax Tauh,

tuz Singx-Lingh stunx ayx peengh stimz,

yâuc tuz stinz munh mangc phătc,

tuz nzônh yămz manf stingx munh mungh tongx,

tuz guungh đi munh zen mungc,

tuz ênz muf yămz gwăngz eeng cah njaf.”