1 Tê-sa-lô-ni-ca 1

1Yaz, Phao-lô cloon Si-la cloon Ti-mô-tai, pungx phunz Tê-sa-lô-ni-ca nyăngz Jiux Pangx yămz Zâu Tênb-Huungh, six Pha cloon Zâu Yê-su Jix-Tuz cah njaf. Cloo Zâu nyăngz pôz, cloon peengh oonz yămz nyâuh cah njaf.

2Buz muif dlih wâyc nyâuh tinyh đoih bix sâuf hâuđ Zâu Tênb-Huungh, yâuc đamv tauv nyâuh max setc tiny yămz buz cloo Zâu nyăngz săngx huđ, 3wâyc săngx tauv nyâuh zen bix ayx nyăngz cumh pâuz, cloon nyâuh stăngz bix ayx cumh pâuz zâuđ nyăngz jau, nzof nyâuh yâuc stâuđ tăngđ mungc yămz pănh nyăngz Zâu Yê-su Jix-Tuz, yămz Zâu Tênb-Huungh nyăngz cah đangc, six pănh nyăngz Pha; 4wâyc pâyz coong nyâuh six tuz Zâu Tênb-Huungh stăngz nyăngz munh, yâuc tuz Zâu Tênb-Huungh sên nyâuh taih, 5wâyc zuc buz nzônh Cuđ Jenx phunz nyâuh six max zâyf cungb nongc wac coong cuungv, yâuc năngx nongc cloon Zâu Singx-Lingh nyăngz jab, cloon senz zen tingc — cayx năngđ nyâuh phătc buz săngh yămz nyâuh mungh tongx bix ayx nyăngz nâyx, wâyc phunz nyâuh tuz gongx. 6Nyâuh yâuc ayx âyz buz nyăngz gao cloon Zâu nyăngz gao, bix stipx Zâu nyăngz gâyf max cun pongh đuungx huungđ zâuđ nanc, yâuc naih Zâu Singx-Lingh nyăngz numđ nyađ. 7Ayx tuz, nyâuh săngh gao gongx phunz yetx stong zen Zâu nyăngz munh yămz wa Ma-si-đô-ni cloon wa A-ca-ya stâyz phangz. 8Wâyc Zâu nyăngz gâyf, tuz tăng nyâuh setb ninyh, max zâyf cungb yămz wa Ma-si-đô-ni stâyz phangz cloon A-ca-ya stâyz phangz cuungv, six nyâuh zen caođ Zâu Tênb-Huungh nyăngz jau yâuc tuz lănv nzônh ninyh pong muif đoif nzuf. Năngđ nây, buz max zâuđ năngx zuc coong luungđ nzof gôh. 9Wâyc zuc laiv zanyf đamv tauv buz, stiz yâuc lănv tauv nyâuh stipx buz ayx năngđ laix nyăngz jau, yâuc coong tauv nyâuh quanyf miuc hanyh, bix lauf lov Zâu Tênb-Huungh, nongc bongc stâyv quâyx săngh yâuc senz nyăngz wax tauh Zâu Tênb-Huungh, 10yâuc zu Nănh nyăngz Toonz, six Zâu Yê-su tăng wa guungh taih — senz Nănh ayx phunz tăng tayc săngh taih wax Tauh, Nănh yâuc njâuv pănh tuz gâyh đutb đangz phanx zuc tingc stoif nyăngz jau.