1 Pi-tê 4

1Năngđ nây, wâyc Zâu Jix-Tuz nyăngz stinb zuc tanyđ zâuđ, nyâuh lauf oix zuc nyâyh năngđ nây nâyx nongc zoongz stinb, wâyc laiv lanh nyăngz stinb zuc tanyđ zâuđ songđ tuz gâyh đutb stoif gôh, 2wâyc nây năngx săngh yămz stinb a nyăngz săngx huđ, nyâuh năngx gâyf âyz bamh munh nyăngz stimz nyâuđ gôh, six oix zuc âyz Zâu Tênb-Huungh nyăngz zux ix ayx. 3Wâyc quaix taih nyăngz săngx huđ nyâuh ayx cayx năngđ max zen nyăngz munh nâyx caux gôh, wax zanyf cungb âyz cănh nyăngz nyâuđ nyâyh ayx, mauh tax huungđ, tiu binz, nzoomf hopb tiu, sêu lunc, yâuc paix miuc hanyh cuyb hănđ nzongf, 4nzof yămz nâyx đomc jau, stiz phătc nyâuh max ninyh cloon stiz songc ah peob, ayx loongh cloongb nyăngz jau, songđ numđ nyâyh ganc, yâuc coong peo nyâuh; 5nănh stiz six zuc coong manyf nănh stiz ayx nyăngz dlayc setb taih phunz bênc săngh stămđ munh săngh cloon munh tayc wax Tauh. 6Wâyc năngđ nâyx, Cuđ Jenx lauf tuz nzônh phunz tayc ninyh nyăngz munh, max cun nănh stiz zuc stămđ âyz bamh munh nyăngz stinb a, stiz nyăngz mengc hoonh yâuc tuz săngh âyz Zâu Tênb-Huungh.

7Muif huungđ nyăngz stêtb mâyv noib taih tauv stătx gôh. Wâyc nây, oix zuc sting điub yâuc bôngh stimz jab cloo Zâu; 8tah yetx six oix zuc joomz nyâuđ lanh stăngz lanh, wâyc stăngz nyăngz jau six hayh plopx tuz đuungx huungđ stoif; 9oix zuc naih nyâuđ lanh stipx lanh ayx zeb yâuc năngx gâyf yônx; 10âyz năngđ mănv tuz stipx mănv nyăngz sâuđ nyâyc, oix zuc nongc wax đomc stâuđ nyâyc lanh stăngc lanh, cayx năngđ wax đomc munh yoiz cun Zâu Tênb-Huungh nyăngz sax săpc huungđ pôz nâyx. 11Năngđ coong laiv lanh nzaox gâyf — oix zuc nzaox cayx năngđ cay coong Zâu Tênb-Huungh nyăngz wac nâyx; năngđ coong laiv lanh ayx cumh pâuz bokc dlic — oix zuc ayx cayx năngđ cay nongc Zâu Tênb-Huungh sađ phunz nyăngz jab nâyx, phunz yămz manf dlayc, Zâu Tênb-Huungh bix tuz munh tanv yămz Zâu Yê-su Jix-Tuz, senz hoopđ zuc tuz gwăngz eeng cloon tômx jab tauv banc stâyv banc đaic wax Tauh. A-meen.

12Stăngz nyăngz yâuf pez lex, năngx gâyf numđ nyâyh ganc tauv sac yămz nyâuh cah njaf nongc pu sinx nyâuh wax đauc tâuf, cayx năngđ six nyâuh pongh ah huungđ njingc nyăngz dlayc nâyx, 13six, nyâuh oix zuc numđ nyađ, wâyc nyâuh tuz cloon Zâu Jix-Tuz songc tanyđ zâuđ, nongc phunz tauv Nănh nyăngz gwăngz eeng tuz hinđ setb taih wax zanyf, nyâuh songđ tuz naih numđ nyađ, yâuc oonz looc nzongf. 14Năngđ coong nyâuh wâyc Zâu Jix-Tuz nyăngz manyh bix zuc hib jetx, senz naih oonz looc gôh, wâyc Zâu Tênb-Huungh gwăngz eeng nyăngz Singx-Lingh, cloon nyâuh yămz. 15Năngx gâyf phunz nyâuh laiv lanh wâyc tayx munh, ayx stac, ayx okx dlayc, max six ninyh zomv munh nyăngz dlayc, bix zuc tanyđ zâuđ, 16six năngđ coong laiv lanh wâyc ayx Jix-Tuz nyăngz munh bix zuc tanyđ zâuđ, six năngx gâyf numđ nyayz, yâuc oix zuc tanv Zâu Tênb-Huungh yămz wax nomz manyh. 17Wâyc stămđ stoif nyăngz săngx huđ tauv nzof quef coonz tăng Zâu Tênb-Huungh nyăngz pyau; six năngđ coong tah yetx tăng pănh đangc, nâyx max zen Zâu Tênb-Huungh nyăngz Cuđ Jenx wax đomc munh tauv stêtb mâyv six năngđ laix? 18Nzof

“Năngđ coong peengh stimz nyăngz munh tuz njâuv bix năngx zâuđ,

max zen nyăngz munh cloon naih stoif nyăngz munh bix năngđ laix heh?”

19Năngđ nây, âyz Zâu Tênb-Huungh nyăngz zux ix six zuc tanyđ zâuđ nyăngz munh, yâuc oix zuc ayx gongx nyăngz dlayc, yâuc stungx cănh nyăngz mengc hoonh phunz Zuyx Guungh Zuyx Nib neetb stimz wax Tauh.