Sheshi Kham
मत्ती 3
बप्तिस्मा-यांन्या यहुन्नाल प्रचार
मर्कुस १:१-८; लूका ३:१-१८; यहुन्ना १:१९-२८
नकाए बेला बप्तिस्मा यांन्या यहुन्ना यहूदिया प्रदेसला हरहरताइन्या पोल रा:औ, ओटन ऐलेस्यु प्रचार ढाऔ तअसिऊ, “ओले ऐआढोवाङ, पस्चाताप ढोचिते, दानाङभन्या स्वर्गला राज्य नेराकै रा:स्यु लेया।”1 आका नकाई ज्या, जोल बारेङन यशैया अगमबक्ताङन ऐटाइन्या पानस्यु लेसिऊ:
“हरहरताइन्या पोल तोलोअ कलिऊन्याल ग़ा,
‘परमप्रभुल यम तयार जाएचिते,
ओलं नाल्ट जेयिङ सोझा जाएचिते’।”2
यहुन्नाले ऊटल भूत्लाल क्वा क्वाएसिन्या ढोवा, ओटन आकम्बरत छालाल पिटी पोअसिया। नकाले सोलो3 सनर बनमह ज्यान्या ढोवा।4 यरुशलेम सहर सनर यहूदिया भरि, ओटन यर्दन भईल नावङजिऊला स्वाट्टै रुयाङ नका ल्योङ रांवाङ, ओटन रा: पाप सुइकार ढास्यु यर्दन भईल नका ल्योङन बप्तिस्मा होनौ तअसिवाङ।
तर जब यहुन्नाले फरिसीयाङ सनर सदुकीयाङ मध्य तबर जनाले बप्तिस्मा होन्ङालेस्यु राराज्यान्या आरङवाङ तब ओयाङजन ऐआढोवाङ, “ऐ डाङल पुङयाङ, रांङालेन्या परमेस्वरलं रिईतन बचिच्यालेस्यु जेजन काङ्काले चेताउनी आयांचिऊ?5 नैताइस्यु जे पस्चाताप ढास्यु सुवाइसिन्या जाए शशैचिते। अब्राहाम जै गे बौ ज्या ऐलेस्यु जे जेल ऐतालेच्यो। दानाङभन्या ङा जेजन ऐढाच्या, परमेस्वरले आका लुङयाङतन, अब्राहामल नाल्ट सन्तान सिर्जाहौ ढुदुवा।6 आकैज रवा सिङल रिंनल परीस्यु लेया। नैताइस्यु चान्या शई माशशैन्या सोगलै टुङजन पलस्यु ढलाइसिया, ओटन मील क्याइसिया।”7 “ङाता जेजन पस्चातापल नाल्ट रीले बप्तिस्मा यांच्या, तर ङाछिन्ट रांन्या ङातन अझै सक्तिशाली लेया, ङा ओलं जुता वुरन्या लायकला मालेङदी। ओले जेजन पबित्र आत्मा सनर मीले बप्तिस्मा यांन्या लेया। ओलं च्यापन्या नाङ्गला आकुईतै लेया, ओटन ओले आखलाए पुरै सफा ढान्यालेन्या, ओटन आमि पलीमा धन्सारल दुउन्यालेया, तर पुलजन खकै मासिन्या मील हिपन्यालेया।”
येशुल बप्तिस्मा
मर्कुस १:९-११; लूका ३:२१-२२
नवाए बेला येशु गालीलङन यर्दन भईल यहुन्ना ल्योङ बप्तिस्मा होन्रांऔ। तर यहुन्नाले येशुजन ऐलेस्यु रुकिऊ आरोकौ दानाङ नङ ङाल्योङ रांन, “बरु ङादी नल्योङन बप्तिस्मा होनन्या आबस्यक लेऊ?”
तर येशुले नाजन ऐआढोव, “आकअल नाल्ट ऐज ग्याताइत्या, दानाङभन्या गे सोगलैले ऐलेस्युजै परमेस्वरलं इच्छ्याला काम पुरा ढान्याताहा, ऐढोवा पाइना” बल्ल यहुन्ना भनौ। ओटन येशुले बप्तिस्मा हिनस्यु रीलन आपलिहौ चोएटै, स्वर्ग फएसिऊ, ओटन ओले आयर्त परमेस्वरलं आत्माजन कचिकुरमन्जै आलाइरांज्यान्या आरङौ।
तब स्वर्गतन ऐआलन्या ग़ा थहौ, “ईका ङायिङ्का ज़ा हो, जोश ङा भ्याई खुशी लेङा।”8
Source notes (8)
- Cross-reference मत्ती ४:१७; मर्कुस १:१५
- Cross-reference यशैया ४०:३
- Footnote कोस्योअ=सोलो
- Cross-reference २राजा १:८
- Cross-reference मत्ती १२:३४; २३:३३
- Cross-reference यहुन्ना ८:३३
- Cross-reference मत्ती ७:१९
- Cross-reference उत्पत्ति २२:२; भजनसङ्ग्रह २:७; यशैया ४२:१; मत्ती १२:१८; १७:५; मर्कुस १:११; लूका ९:३५
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.