मत्ती 27

येशुजन पिलातस ल्योङ रालाङौ

लूका २३:१-५; यहुन्ना १८:२८-३८

1छकाल्या घलज, सोगल मुख्या पुजाउरोयाङ सनर जन्ताङल नेताङै येशुजन सएन्या सजाय यांन्या लेस्यु ओलं बिरोदत सड्यन्त्र रांढोव। 2ओटन नकाङै येशुजन साङ्गलले पोअस्यु रालाङौ, ओटन हाकिम पिलातस ल्योङ राबुझाहौ।

यहूदा आसिन्या

प्रेरित १:१८-१९

3तब येशुजन कोलोकौपरिङन्या यहूदाले ओलजन सजाय आताइन्या रङस्यु पस्ताहौ, ओटन मुख्या पुजाउरोयाङ सनर नेताङजन चान्दील तिस सिक्का होलस्यानाऔ,1 4ओटन नकाले ऐआढोवाङ, “ङा निर्दोस रुजन धोखा यांस्यु पाप ढोदुङा।” तर नकाङै ऐराढोव, “गेजन नै मतलब? नङजै सन्ते।”

5तब नकाले चान्दील नका सिक्काङ मन्दिरलं क्याइनिइस्यु हिनौ, ओटन केप्सिस्यु आत्महत्या आढोव। 6तर मुख्या पुजाउरोयाङै चान्दील नका सिक्काङ चिनास्यु ऐलेवाङ, “ईका आराधना झिमला ढुकुटील नाएन्या ठिक माङडी, दानाङभन्या ईका जील येए हो।” 7नकाङै रारांल सल्ला ढास्यु ना पैसाले परदेसीयाङ रींनन्या कुमाल्याल येङ रालङौ। 8नका येङ आछिम समन बै लिज्याया जोजन जील येङ ऐढासिया।

9तब यर्मिया अगमबक्ताले आपानन्या छेन ऐलेस्यु पुरा ताहौ, “नकाङै ओ चान्दील तिस सिक्का राहोनौ, नकाई येएल हिसापत, जो येए इस्राएललं ज़ायाङै नकाल रुल नाल्ट राटुकिऊ,2 10ओटन परमप्रभुले ङाजन आदेस आयांन्या अनुसार कुमाल्याल येङ नकाङै रालङौ।”

पिलातसले येशुजन आगिनौ

मर्कुस १५:२-५; लूका २३:३-५; यहुन्ना १८:३३-३८

11येशुजन रोमला घिन्या हाकिमल हाक सच्यानसिऊ, ओटन नकाले ऐलेस्यु आगिनौ, “नैति नङ यहूदीयाङल रय रों?” येशुले ऐआढोव, “नङजै ऐलिज्याना।” 12ओटन मुख्या पुजाउरोयाङ सनर नेताङै येशुजन दोस रांलाहौ, तर ओले नैज जबाक मायोढुऊरा। 13तब पिलातसले ऐआढोव, “न बिरोदल नकाङै गोटागोटा छेनल बयन यांज्यारा, नैति नङ नमाठएनु?”

14तर येशुले नकाजन तोलोअ बै आरोपल जबाक मायोदा। नैताइस्यु हाकिम ईका छेनत भ्याई हलाअ ताहौ।

येशुजन सएन्या सजायल फैसला

मर्कुस १५:६-१५; लूका २३:१३-२५; यहुन्ना १८:३९; १९:१६

15रोमी शासक हाकिमले निस्तार-पर्ब छिम्क रुयाङ हुलले आचाहिन्या अनुसार तोलोअ कैदीजन राइस्यान्या चलन लेऊ। 16नवाए बेला नल येशु सकाए बारब्बा मिनला तोलोअ मिनथइन्या कैदी बै लिज्याऔ। 17जब रुयाङ दुउसिवाङ, पिलातसले नकाङजन आगिन्वाङ, “जे नै जेचाहिचिऊ? ङा जे नाल्ट काङ्काजन राहङ? बारब्बा सन् ख्रीस्ट ऐढासिन्या येशुजन?” 18दानाङभन्या नकाङै येशुजन खिईले नैराजाटौ ऐलेन्या पिलातसले सनस्यु लेऊ।

19तब नियाल आसनतं आचुङज्याऔक पिलातसल मेएमाले ऐलेस्यु थाई आपरिङौ, “नका धर्मि रुजन कैज ताढो, दानाङभन्या आछिम ङामङल नकाल कारनले ङा भ्याई दुख ङाडोएङु।”

20तर मुख्या पुजाउरोयाङ सनर नेताङै बारब्बाजन राइन्या सनर येशुजन सएन्या सजाए यांन्या माग ढान्या लेस्यु रुयाङजन रामच्चाइवाङ। 21तर रोमी शासकले फरि नकाङजन आगिन्वाङ, “ङा जे नाल्ट ईका नेंलोअ मध्य काङ्काजन राहङ ऐलेन्या जेचाहिचिऊ?” नकाङै मच्चाईस्यु ऐराढोव, “बारब्बाजन।”

22पिलातसले नकाङजन ऐआढोवाङ, “तब ङा ख्रीस्ट ऐढासिन्या येशुजन कैढोङवन?” नकाङ स्वाट्टैले जबाक रांयोव, “नकाजन क्रूसतं केपचिते।”

23पिलातसले आगिन्वाङ, “दानाङ? नकाले नैति अपराद आढोव का?” तर नकाङ झनज भ्याईज जोरसै ऐलेस्यु कलिऊवाङ, “नकाजन क्रूसतं केपचिते।” 24जब पिलातसले ओलजन बचाइन्या नैज उपाय आमारङौ, भ्याई खैलाबैलादी मच्चिकान्देए ऐलेन्या छ्याहै बरु नकाले री होनस्यु रुयाङल हुलल सामन्दी आकुई हुरस्यु ऐलेऊ, “जे जेईज सन्चिते, ङा ईका रुल जीतन निर्दोस लेङा।”3

25ओला सोगल रुयाङै जबाक रांयोव, “नकाजन सएसिन्या जील दोस गे सन्तानयाङयर्त ग्यापरित्या ऐलेरापाइना।” 26पिलातसले नकाङल नाल्ट बारब्बाजन आराइस्योवाङ, ओटन येशुजन कोर्ला स्वापस्यु सिपाइयाङ कुईत सुम्पिस्यु क्रूसतं केपौ आपरिङवाङ।

सिपाइयाङ येशुजन रांगिलल्याइन्या

मर्कुस १५:१६-२०; यहुन्ना १९:२-३

27तब पिलातसल सिपाइयाङै येशुजन शासकलं दरबारल रालाङौ, ओटन सोगल पल्टनजन ओलं चारवरङन दुउसिवाङ। 28नकाङै ओलं क्वा फिरस्यु ओलजन धुङल्याइन्या क्वा रांक्वाटौ। 29नकाङै ज़ुल मुकुट लएस्यु आङएत राजाएस्यौ, ओटन दाइन्या आकुईत सरा रांयोव, ओटन आहाक घुन्डा टिकिस्यु ओलजन ऐलेस्यु गिलल्याहौ तअसिवाङ, “औ यहूदीयाङल रय, जडौ, लेस्यु तबर बान्चिन रांढोव।” 30तब नकाङै ओलजन रांठिलौ, ओटन नकाई सरा न्हानस्यु आङएत रा:स्वापस्यौ। 31नकाङै आक्वा फिरस्यु, रांगिलल्याहौ ओटन छिन्ट आक्वाईज क्वाएस्यु ओलजन क्रूसतं राकेपनाङौ।

येशु क्रूसतं

मर्कुस १५:२१-३२; लूका २३:२६-४३; यहुन्ना १९:१७-२७

32नकाङ राहिनज्याऔक कुरेनी सहरला तोलोअ सिमोन मिनला रुसकाए डोएसिवाङ, ओटन नकाङै ओजन येशुल क्रूस वुरन्या कर रांलाहौ। 33जब नकाङ गलगथा ऐढासिन्या पोल तापवाङ, जोल अर्थ “खप्परल पो” 34तब नकाङै येशुजन काअ बराएसिन्या अङ्गुरल रस ओव रांपरिङौ, तर ओले नका दारस्यु माओदा।4 35नकाङै येशुजन क्रूसतं केपरापाइना, चिठ्ठा झोअस्यु ओलं क्वायाङ रारांल राभाकौ।5 36तब नकाङै ओलै चुङस्यु ओलजन वुटौ तअसिवाङ। 37येशु, यहूदीयाङल रय “नकाङै आबिरोदत ऐटान्या दोस-पत्र आङएल टङ्ङन राचप्काइस्यौ।” 38ओलसं नेंलोअ गोएनेंजन बै क्रूसतं केप्स्यु रांनाटौ, तोलोअ आमि दाइन्याङन ओटन छुट्टै दाबऱ्याङन।

39नका यमलन बान्याङै रां ढेङ फन्दाइस्यु ओलजन रांगिलल्याहौ,6 40ओटन ऐराढोव, “ऐ मन्दिर थाएस्यु तिन दिनक निब्जाइन्या, नङ परमेस्वरलं ज़ा ताहनकन, क्रूसतन वान्ल लांइस्यु रांन्ते, ओटन नङझन्जै बचाइते।”7

41मुख्या पुजाउरोयाङै बै शास्त्रीयाङ सनर सेरयाङ सकाए बोलोङ ओलजन रांगिलल्याहौ, 42“इकाले अपुऱ्याङजन आबचाहौ, तर ओलझन्जै बचाहौ माढुदुज्यादी। आब क्रूसतन लांइस्यु वान्ल ग्यारांत्या, ओटन याएज गे ईका इस्राएलला रय ज्या लेस्यु। बल्ल बिस्वास ढोया। 43इकाले परमेस्वरतं भरोसा ढोवकन। परमेस्वरले इकाजन निज्यास्यु ओले इकाजन आकै छुटकारा ग्यायोंवत्या, दानाङभन्या इकाले ‘ङा परमेस्वरलं ज़ा ज्या,’ ऐलेऊ।”8

44ओटन ओलसं क्रूसतं केप्सिन्या नका गोएनेंले बै ऐलेस्युई आमि अपमान नेंढोव।

येशु आसिन्या

मर्कुस १५:३३-४१; लूका २३:४४-४९; यहुन्ना १९:२८-३०

45लाअका याएबेलाकन तिन बजे समन नका सोगलै देसलं च्युकौ। 46लाअका तिन बजेदेए येशु ऐलेस्यु घिन्या ग़ाले कलिकौ, “इलोई9, इलोई, लामा सबखथनी?” अथाबा, “औ ङा परमेस्वर, औ ङा परमेस्वर, नङ ङाजन दानाङ राहङ?”10 47नल च्याङज्यान्याङ मध्य ख्वाएयाएले ईका थएस्यु ऐलेवाङ, “ईका रुले एलियाजन खुलज्याऔ ताहाहोला।” 48नकाङ मध्य तोलोअले चोएनास्यु ओचोएटै तोलोअ रुवा11 होनस्यु सरात12 पोअस्यु सिर्काल13 बुदाइस्यु ओव रांपरिङौ।14

49तर अपुऱ्याङै ऐलेवाङ, “राइचिते ब्याएन्या, एलिया इकाजन बचाइन्या रांऔ सन्?” 50येशु फरि बै घिन्या ग़ाले कलिऊस्यु आपरान आराहौ। 51नवाए बेला मन्दिर पर्दा टुप्पातन आटुङ समन नेभा ताइस्यु चिहौ, ओटन रनबन वुकौ तअसिऊ, ओटन चमयाङ बै पाकौ तअसिवाङ।15 52ऊईयाङ फएसिवाङ, ओटन तबर सिन्याङ प्रभुल पबित्र रुयाङ जो जिङदा ताइस्यु सोवाङ, 53ओटन नकाङ ऊईजिऊलन पलिइवाङ, ओटन सिन्याङतन येशुल पुनरुत्थान आताहौ छिन्ट नकाङ पबित्र सहरल पसिवाङ, ओटन भ्याई ल्योङ रंन्वाङ।

54कप्तान सनर येशुजन वुइज्यान्याङै जब भुईचाल सनर ओलं ताइज्यान्या घटना रांरङौ, तब भ्याईज छ्याएस्यु नकाङै ऐलेवाङ, “मछ्युजै, ईका ता परमेस्वरलं ज़ा रैस।”

55नल गालीलङन रांन्या तबर मेएमाङ बै लेवाङ, नकाङै लोएतन नका स्वाट्टै ब्याएज्यावाङ। नकाङ ओलं सेवा ढाऔयन गालीलङन येशुल छिनछिन रांवाङ।16 56नकाङ मध्य मरियम मग्दलिनी, सनर याकूब ओटन योसेफल आमा मरियम, ओटन जब्दियाल आज़ानेल आमा बै लेऊ।

येशुजन रारीनन्या

मर्कुस १५:४२-४७; लूका २३:५०-५६; यहुन्ना १९:३८-४२

57ओइ ताहापाइना अरिमाथिया सहरला योसेफ मिनला तोलोअ साहू रु रांऔ। नका ओल बै येशुल सिइ हो। 58योसेफले पिलातस ल्योङ हिनस्यु येशुल सिन्या बुल नीऊ, ओटन पिलातसले ओलजन यांन्या हुकुम आयोवाङ। 59योसेफले सिन्या बुल होनस्यु सफा मलमललं क्वाले आमलिङौ, 60ओटन नकाले चमजन खुलिस्यु आजाएन्या आमिईज छार ऊईल आनाटौ, ओटन ऊईल याह्‌त तोलोअ घिन्या लुङ गरकाइस्यास्यु हिनौ। 61ऊईल लेऊक मरियम मग्दलिनी सनर छुट्टै मरियम बै चुङज्याऊने।

ऊईल चौकिदारयाङ

62तयोअका छिम्क, अथाबा तयारील दिनल हाकाछिम, मुख्या पुजाउरोयाङ सनर फरिसीयाङ पिलातस ल्योङ हिन्वाङ, 63ओटन ओजन ऐराढोव, “सायब, गे यांका ऐढाज्याया, कि नका ठकले जिङदा आलेऊक, ‘तिन दिन छिन्ट ङा फरि सोन्यालेङा’ ऐलेस्यु लेऊ।17 64नैताइस्यु तिस्रा दिन समन ना ऊईजन जोगाहौ नाल्ट हुकुम यांसिन्ते, मानकन्ता नकाल सिइयाङै रा:स्यु ना कुस्यु लाङरा कर, ‘आका ता सिन्याङतन जिङदा ताइस्यु सिदा’ ऐलेस्यु रुयाङजन ऐढान्या लेरा, ओटन नका छिन्ङ ताइन्या धोखा हादेएङातन अझै माचान्या ताइन्यालेया।”

65पिलातसले नकाङजन ऐआढोवाङ, “जेमियाङज वुइन्याङ लिज्यारा। हिन्चिते, जे जेढुदुऊ समन जोगाइस्यु नाएचिते।”

66तब नकाङ हिनस्यु लुङत छाप रांलाहौ, ओटन चौकिदारयाङ खटाइस्यु ऊईजन जोगाइस्यु रांनाटौ।