Skip to content
BibleKenya

Sheshi Kham

मत्ती 20

अङ्गुर बारील काम ढान्याङल आहान

“स्वर्गला राज्य तोलोअ येङल खसममन हो, जो छकाल्या घलज आमि अङ्गुरल बारील कामदारयाङजन ध्यारील काम लाहौ नाल्ट बाहेर पलिहौ।” कामदारयाङल तयोअका ध्यारी तोलोअ चान्दील सिक्का यांन्या छेन पक्का जाएस्यु ओले नकाङजन आअङ्गुर बारील आपरिङवाङ। “जब छकाल्याका नौ बजे बाहेर पलिहौ, ओले अपुऱ्याङजन द्वाहात बिनाकाम राच्याङज्यान्या आरङवाङ, ओटन ओले नकाङजन ऐआढोवाङ, ‘जे बै अङ्गुर बारील हिन्चिते, ओटन ज्वाए ठिक ले, ङा जेजन यांच्या।’” नैताइस्यु नकाङ हिन्वाङ, “फरि नकाले बारं बजे सनर तिन बजेदेए बाहेर पलिईस्यु नैज लेऊ। नकाले पास बजे बाहेर आपलिहौक अपुऱ्याङजन राच्याङज्यान्या आडोएवाङ, ओटन नकाङजन आढोवाङ, ‘जे दानाङ इल दिनभरि बिनाकाम च्याङज्याच्यो?’”

“नकाङै ओजन ऐराढोव, ‘काङ्काईले गेजन कामल मालाईयिउदी नैताइस्यु।’ ओले नकाङजन ऐआढोवाङ, ‘जे बै अङ्गुर बारील हिन्चिते ओटन काम ढोचिते।’” “जब ओई ताहौ, तब अङ्गुर बारील खसमले आबैदारजन ऐआढोव, ‘कामदारयाङजन खुल्स्यु छिन्ट रांन्याङतन रएस्यु हादेए रांन्याङजन रां ध्यारी यौंरते।’”1 पास बजे कामल लागिन्याङ रांवाङ, ओटन नकाङ सोगलैले पुरा तयोअका ध्यारी रांडोटौ। जब हादेए कामत लागिन्याङ रांवाङ, तब नकाङै भ्याई डोएया ऐलेन्या बिचार रांढोव, तर नकाङ सोगलैले तयोअका ध्यारी रांडोटौ। डोटौ परिन्या ध्यारी डोएरा पाइना येङल खसमलं बिरोदत नकाङ गनगन लेऊ तअसिवाङ। “नकाङै ऐलेऊ तअसिवाङ, ‘ईका छिन्ङाङ त घन्टा याएज काम रांढोव, तर नङ नकाङजन गे दिनभरि बअ दुख डोएन्याङ सनर चर्को घाम सहिन्याङमन नजातनवाङ।’” “तर साहूले नकाङ मध्य तोलोअजन जबाक आयोव, ‘ऐ न्हाए, ङा नयर्त नैज अनिया ढास्यु मालेङदी। नैति नङ ङासं पुरा तयोअका ध्यारील काम ढान्या कबुल नमाढोनु?’ नङ नडोएन्या ध्यारी लाङस्यु न हिनन्ते। आका छिन्ङाङजन बै नङजन ङायान्यायाए जै योंङरा। ङामि ज्वाए ले, नका ङा ङाचाहिन्या अनुसार ढाऔ ङामाढुदुङु का? ङा भलाई ङाढाऊक नैकाम न म्युउ तुउज्याऊ का?” “नैताइस्यु छिन्ङाङ हादेए ताइन्यालेरा ओटन हादेएङाङ छिन्ङ ताइन्यालेरा।”2

येशुले सिइकालल बारेल तिन पालाक आपानन्या

मर्कुस १०:३२-३४; लूका १८:३१-३४

यरुशलेम देए राहिनज्याऔक येशुले बारं जना आ सिइयाङजन अलक्कै लाङस्यु यमल नकाङजन ऐआढोवाङ, “गे यरुशलेम देए गेहिनज्यायिउ। आब ङा रुल ज़ाजन मुख्या पुजाउरोयाङ सनर शास्त्रीयाङल कुईत सुम्पिङरा, ओटन नकाङै ङाजन सएन्या दन्डल दोसी ठहऱ्याहङरा। ङाजन गिलल्याहङरा, कोर्ला लाहङरा, ओटन नकाङै क्रूसतं केपौ नाल्ट ङाजन गैरयहूदीयाङल कुईत सुम्पिङरा, ओटन तिन दिनक ङा जिङदा ताइस्यु सोन्यालेङा।”

तोलोअ आमाल बिन्ति

मर्कुस १०:३५-४५

जब्दियाल मेएमाले नेंलोअ ल्हेपाज़ानेंजन ओलसं होनस्यु येशुल हाक घुन्डा टिकिस्यु बिन्ति आढोव। येशुले नकाजन आगिनौ, “नङ नै नचाहिनु?” नकाले ओलजन ऐआढोव, “आग्या ढोते ओटन न राज्यल, ईका नेंलोअ ङाज़ानें मध्य तोलोअ नदाइन्याङन, ओटन छुट्टै नदाबऱ्या कुईङन चुङौ ग्याडोएनेत्या।” तर येशुले जबाक आयोवाङ, “जे नै जेनीज्याचिऊ ना मासन्चिदी। ङा जो कटौरा ओङा ङालज्याङु, नैति ना जे ओव जेढुदुचिऊ?” नकाङै ऐराढोव, “ऐढुदुया।” तब येशुले ऐआढोवाङ, “ङा कटौरा जे ऐओदुच्या, तर ङादाइन्या सनर ङादाबऱ्याङन चुङौ यांन्या छेन ङा कुईत माल्दी। ईका पो नकाङल हो, जोल नाल्ट ङा बौले तयार जाएस्युलेऊ।” आका थएस्यु दसगोटा सिइयाङस ना दुईभाईसं रायिङचोव। येशुले सोगलैजन आलेऊदेए खुल्स्यु ऐआढोवाङ, “जेजन थाहै लेया, कि गैरयहूदीयाङल शासकयाङै नकाङयर्त निरङकुस शासन ढोरा, ओटन घि-घिन्या हाकिमयाङै नकाङयर्त अढिकार जमाइरा।3 जे खार्ल ऐताटाइत्या, तर जोले जेतन घिन्या ताहौ रोंकौ, नका जे सेवाऱ्या ताइन्या ताहा।4 जोले जेमध्य हादेए ताहौ रोंकौ, ना जे सेवाऱ्या ताइन्या ताहा, जोमनलेस्यु रुल ज़ा बै सेवा डोटौ नाल्ट माङडी, तर सेवा ढान्या सनर तबर रुयाङल जिबनल छुटकाराल येएल नाल्ट परान याराऔ।”

येशुले नेंलोअ अन्ढलानेजन आसबेलौने

मर्कुस १०:४६-५२; लूका १८:३५-४३

येशु सनर आ सिइयाङ यरीहोङन राहिनज्याऔक, तोलोअ घिन्या रुयाङल हुल ओयाङल छिन्ट लागिवाङ। यमल वङल चुङज्यान्या नेंलोअ अन्ढलाने येशु नका यम हिनज्याऔ, ऐरालज्यान्या नेंथटौ ओटन ऐलेस्यु कलिकौने, “औ प्रभु, दाऊदल ज़ा, घेनजन दया ढासिन्ते।” रुयाङै नानेजन छपक्कै दिङचिन्ते लेस्यु राहप्काहौ, तर नकाने ऐलेस्यु चोएसै कलिकौने, “औ प्रभु, दाऊदल ज़ा घेनजन दया ढासिन्ते।” तब येशु अदिउ ओटन नकानेजन खुल्स्यु ऐआढोवने, “झेन नै झेनचाहिचिनु? ङा झेन नाल्ट नै ढास्याचिन?” नकानेले ओलजन ऐनेढोव, “औ प्रभु, घोन म्युउ फएस्यासिन्ते।” येशुले यीङताए मानिस्यु नानेल म्युउ आछुस्यौने ओटन ओचोएटै नकानेले नेंरङौ ओटन आछिन्ट लागिऊने।

Source notes (4)
  1. Cross-reference लेवी १९:१३; ब्यबस्था २४:१५
  2. Cross-reference मत्ती १९:३०; मर्कुस १०:३१; लूका १३:३०
  3. Cross-reference लूका २२:२५-२६
  4. Cross-reference मत्ती २३:११; मर्कुस ९:३५; लूका २२:२६

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.