Skip to content
BibleKenya

Sheshi Kham

मत्ती 11

येशु सनर बप्तिस्मा यांन्या यहुन्ना

लूका ७:१८-३५

जब येशुले बारैं गोटा सिइयाङजन थाकौरा पाइना ओल नका पो राइस्यु, ओलं नेराजिऊला सहरजिऊल ह्युउन्या सनर चान्याथाई प्रचार ढाऔ नाल्ट हिनौ। बप्तिस्मा यांन्या यहुन्नाले येशु ख्रीस्टल कामल बाएबिइ झ्यालखानाल आथटौ, ओटन सिइयाङजन नका ल्योङ ईका छेन गिननाऔ आपरिङवाङ, नकाङै रा:स्यु येशुजन रांगिनौ “नैति यहुन्नाले आपानन्या अनुसार गेजन मुक्ति यांन्यावाला नङज, सन् गे छुट्टैजन वुटै?” येशुले नकाङजन ऐआढोवाङ, “जे जेथएन्या सनर जेरङन्या छेन यहुन्नाजन पानस्योचिते, अन्ढलाङै नजर डोएरा, ओटन लुलाङ बारा। कोर लागिन्याङ चोखा जाएस्युनाएसिरा। ना भैराङ थटौ ढुदुन्या ताइस्युलेरा। सिन्याङ जिङदा ताइस्यु सोस्यु लेरा, ओटन गरिबयाङजन चान्याथाई प्रचार ढाज्यासिया।1 नका बअचान्या रु हो जोले ङाजन सङ्का माढाङुदी।”

यहुन्नाल सिइयाङ राहिनज्याऔक येशुले रुयाङ हुलजन आबारेङन ऐआढोवाङ, “जब जे यहुन्नाजन खिमौ नाल्ट हरहर पोल जेहिन्चिऊ तब जे नै जेरङचिऊ? नैति घूईकाले आहल्लाइज्यान्या चलजन?” वन नै जेखिम्नाचिऊ वन? नैति चान्या क्वा क्वाएसिन्या रुजन जेखिम्नाचिऊ? चान्या क्वा क्वाएसिन्याङ ता रययाङल दरबारलदी चुङर। “जे दानाङ हिनच्योवन? नैति अगमबक्ताङजन खिमौ नाल्ट? ङा जेजन ऐढाच्या अगमबक्ताङतन बै घिन्या रुजन। यहुन्ना नका रु हो, जोल बारेल पबित्रशास्त्रलं सरसिज्याऔ, ‘खिम्चिते, ङा ङादुतजन जे हा-हा परिङ्ङा, जोले जे हार्मै जे यम तयार जाएवा।’”2 ङा मछ्यु, जेजन पानस्याच्या, मेएमाङन जर्मिन्याङ्ङन बप्तिस्मा-यांन्या यहुन्नातन घिन्या अपुर काङ्काई ताइस्यु माल्दी। तर बै स्वर्गला राज्यल जो सोगलैतन इङन्या ले, ना ईका तन घिन्या हो।

बप्तिस्मा यांन्या यहुन्नाल प्रचारल बेलाकन आकअ समन स्वर्गल राज्य चोएसै हादेए बदिस्यु लेया, ओटन बलल्याङै नकाजन जोरसकाए कोलोअरा।3 दानाङभन्या यहुन्नाल पालासमन मोशा अगमबक्ताल ब्यबस्था सनर स्वर्ग राज्यल बारेल सोगल भबिस्यबानी ढास्युलेरा। जे नकाङ रापानन्या छेन कोनच्योकन नकाङै रांया ऐरालन्या एलिया आकाई ज्या।4 जोल थएन्या ना ले, नकाले ग्याथटौत्या। “ङा ईका पुस्ताला रुयाङजन नैस दान्जिङर? ईका ता बजारल रेएसिन्या इङइङन्या लुलल्याङ बराबर ज्या, जोयाङै रांमि न्हाएयाङजन खुल्स्यु ऐढोरा, ‘गे जे नाल्ट बाङसुली गेतपयिउ, तर जे मास्यांदुच्या। गे दुखला रेए गेरेएसियिउ, तर जे सोक मामनाईदुच्या।’ दानाङभन्या यहुन्ना ज्यास्यु सनर ओस्यु मारा:दा, ओटन नकाङ ओजन भूत लागिदा ऐराढोव। जब रुल ज़ा ज्यास्यु सनर ओस्यु रांऔ, ओटन नकाङ ऐढोरा, ‘खिम्चिते, हापस्या, मंङवा, तिरो उठाइन्याङ सनर पापीयाङल न्हाए ज्या!’ परमेस्वरलं बुद्दि ठिकै ज्या, ऐलेन्या छेन नकाल कामयाङतन आशई ताइन्यालेया।”

अबिस्वासी सहरयाङ

लूका १०:१३-१५

येशुले जो-जो सहरल भ्याई अचम्मला कामयाङ आढोव, तर नला रुयाङै पस्चाताप रांमाढाऔकाले ओले नकाङजन आसज्याअवाङ। “आक्याई खोराजीन, आक्याई नङ बेथसेदा! दानाङभन्या जेल्योङ ढासिन्या अचम्मला कामयाङ टुरोस सनर सीदोनल ढासिन्या ताहकन, नकाङै ऐकैज भोङग्रा क्वाएसिस्यु सनर धुलिइ ठिइसिस्यु पस्चाताप ढान्या लेवाङ।5 तर ङा जेजन ऐढाच्या, नियाल दिन छिम्क जेतन टुरोस सनर सीदोनल हालत भ्याई सहिउतारका ताइन्यालेया। ऐ, कफर्नहुम, ओक्या नङ नम समन छेन्सिना का? नङ पतालसमन सतेइसिना। दानाङभन्या नल्योङ ढासिन्या अचम्मला कामयाङ सदोमल ढासिन्या ताहकन ना आछिम समन लिज्यान्या लेऊ।6 तर ङा नङजन ऐढाना, नियाल दिनक न दशातन ता सदोम सहरल दशा भ्याई सहिउतारका ताइन्यालेया।”7

ङाल्योङ रांचिते ओटन नानसिचिते

लूका १०:२१-२२

नवाए बेला येशुले ऐलेऊ, “औ बौ, स्वर्ग सनर पिरथ्बीला प्रभु, ङा नङजन धन्याबाद यांना, दानाङभन्या नङ ईका छेन बाठोयाङ सनर बुद्दिमान सितछित रुयाङतन गोप्य नाएस्यु, बालअयाङजन ना नठनस्योनवाङ।” औ ओज्या, बौ, दानाङभन्या नङजन ईकाइ चान्या लागिऊ।

“ङा बौले स्वाट्टै जन्तु ङाजन यांस्यु नाटङवा। नैताइस्यु बौ बाहेक ज़ाजन काङ्काईले मासहौदी, नामन्जै ज़ाले बाहेक बौजन काङ्काईले मासहौदी, नैताइस्यु नकाङ बै ऐशईरा, जोजन ज़ाले बौ थनन्या इच्छ्या ढोव।”8 “ऐ सोगल थाकिन्याङ सनर वुरले आहराइन्याङ, ङाल्योङ रांचिते, ङा जेजन नानसिऊ यांच्या। ङा कुम जेयर्त नाएचिते, ओटन ङासकाए ह्युउसिचिते, दानाङभन्या ङा नरम सनर दयालु यिङला लेङा, ओटन जे जेआत्माल नानसिऊ डोएन्यालेच्या।9 दानाङभन्या ङा कुम सजला लेया, ओटन ङा वुर बुङन्या लेया।”

Source notes (9)
  1. Cross-reference यशैया ३५:५-६; ६१:१
  2. Cross-reference मलाकी ३:१
  3. Cross-reference लूका १६:१६
  4. Cross-reference मलाकी ४:५; मत्ती १७:१०-१३; मर्कुस ९:११-१३
  5. Cross-reference यशैया २३:१-१८; इजकिएल २६:१-२१; योएल ३:४-८; आमोस १:९-१०; जकरिया ९:२-४
  6. Cross-reference यशैया १४:१३-१५; उत्पत्ति १९:२४-२८
  7. Cross-reference मत्ती १०:१५; लूका १०:१२
  8. Cross-reference यहुन्ना ३:३५; १:१८; १०:१५
  9. Cross-reference यर्मिया ६:१६

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.