Sheshi Kham
मर्कुसं 1
बप्तिस्मा यांन्या यहुन्नाले यम तयार जाएवा,
मत्ती ३:१-१२; लूका ३:१-१८; यहुन्ना १:१९-२८
परमेस्वरलं ज़ा येशु ख्रीस्टल चान्याथाईल, सुरुवाट। यशैया अगमबक्ताल किटापल ऐटाइन्या सरसिन्या लेऊ, “थएचिते, ङा ङामि स्वर्गदुतजन जेहाजेहा परिङ्ङा, नाले जेयम तयार जाएवा।”1 “हरहर ताइन्या पोल तोलोअ कलिऊन्याल ग़ा, ‘परमप्रभुल यम तयार जाएचिते, ओलं यमयाङ सोझा जाएचिते।’”2
ओटन रुयाङजन प्रचार ढाऔयन यहुन्नाले ऐआढोवाङ, पाप छेमाल नाल्ट पस्चातापल बप्तिस्मा होन्चिते। सोगल यहूदिया प्रदेस सनर यरुशलेम सहरला सोगल रुयाङ यहुन्ना ल्योङ रांवाङ। नकाङै राढान्या पापल नाल्ट पस्चाताप रांढोव ओटन यहुन्ना ल्योङन यर्दन भईल3 बप्तिस्मा राहोनौ।
यहुन्नाले ऊटल भूत्लाल रअसिन्या क्वा क्वाएसिस्यु लेऊ, ओटन आकम्बरल छालाल पिटी पोअवा। नाले सोलो कोस्योअ सनर बनमह ज्योवा।4 यहुन्नाले ऐलेस्यु रुयाङ ल्योङ प्रचार आढोव, “जो ङाछिन्ट तोलोअ रु रांन्या लेया, ओ ङातन सक्तिशाली लेया। ङा गोम लेस्यु ओलं जुताल तना पलाअन्या लायकला मालेङदी। ङा ता जेजन रीले बप्तिस्मा यांच्या, तर ओलेता जेजन पबित्र आत्माले बप्तिस्मा यांचिवा।”
येशुल बप्तिस्मा सनर आअल्चिन्या
मत्ती ३:१३; ४:१-११; लूका ३:२१-२२; ४:१-१३
तचिइ दिन छिन्ट येशु गालील प्रदेसला नासरतङन रांऔ। ओटन यहुन्ना ल्योङन यर्दन भईल बप्तिस्मा आहोनौ। जब येशु रीलन बाहेर पलिहौ, तब ओचोएटै स्वर्ग आफएसिन्या सनर पबित्र आत्माजन कचिकुरल अनवारमन आयर्त आलाइरांन्या आरङौ। नमतन ऐलेन्या ग़ा थहौ, “नङ ङा निज्युन्या ज़ा हो, नङसं ङा भ्याई हेसाङस्यु लेङा।”5
तब पबित्र आत्माले येशुजन ओचोएटै हरहर ताइन्या पोल आलाङौ। ओङ येशु चालिस दिन समन लिज्याऔ, सैतानले येशुजन परिक्छ्या ढाज्याऔ, ओटन ओलं बनला जनावरयाङसं लिज्याऔ, ओटन स्वर्गदुतयाङै आसेवा रांढोव।
येशुले चार गोटा जलाहारीयाङजन आखुल्वाङ
मत्ती ४:१२-२२; लूका ४:१४-१५; ५:१-११
यहुन्ना कोलोअसिया पाइनाई येशुले गालील प्रदेसलं रा:स्यु, परमेस्वरलं चान्याथाई प्रचार आढोव। ओले ऐलेऊ कि “समाय पुरा ताइस्यु लेया, परमेस्वरलं राज्य नेराक तापरादा6, पस्चाताप ढोचिते ओटन चान्याथाईल बिस्वास ढोचिते।”7
येशु गालील प्रदेसला समुन्दरल8 आवङवङ ताइस्यु आहिनज्याऔक, ओले सिमोन सनर आभाई अन्द्रियासजन समुन्दरल जाल नेंहोरज्यान्या आरङौने, दानाङभन्या नकाने जलाहारी लेऊने। येशुले नकानेजन ऐआढोवने “ङाछिन्ट राचिन्ते, ङा झेनजन परमेस्वरलं राज्यल रुयाङजन कढाई होनन्या ना ह्युउचिना।” नानेले ओचोएटै नें जालजन राइस्यु, येशुल छिन्ट लागिऊने। ओटन तचिइ हुदिन्देए रांहिनौक, येशुले जब्दियाल आज़ाने याकूब सनर यहुन्नाजन डोङ्गाल चुङस्यु जाल नेंपएज्यान्या आरङौने। येशुले ओचोएटै आखुलौने ओटन नकानेले नेंबौ जब्दियाजन ध्यारी ढान्याङसं डोङ्गाल बनाएस्यु ओलं छिन्ट लागिऊने।
दुस्टआत्माले भरिसिन्या रु,
लूका ४:३२-३७
येशु सनर आ सिइयाङ कफर्नहुम सहरल रांवाङ, ओटन शबाथ दिनल तयोअका छिम्क यहूदीयाङ आराधना झिमल9 हिनस्यु ओचोएटै ओले सिक्छ्या यांऔ तअसिऊ। जो जोले ओलं सिक्छ्या राथटौ नकाङ अचम्म ताइवाङ, दानाङभन्या ओले नकाङजन शास्त्रीयाङमन माङडी तर अढिकार डोटौ जोरसं आह्युउवाङ।10
नकाए बेला नका यहूदीयाङ आराधना झिमल तोलोअ रु लेऊ, जोल्योङ दुस्टआत्मा लेऊ, ओटन ओ भ्याई जोर जोरसै चिचच्याइज्याऔ। “औ नासरतला येशु, गे ङन नै नचाहिनु? नैति नङ गेजन नस्ट नजाएरानु? ङा नङजन ऐशईना, नङ परमेस्वरलं पबित्र रु ज्या।”11
येशुले नाजन ऐलेस्यु आसज्याकौ, “छपक्कै दिङन्ते, ओटन नका ल्योङन बाहेर देए पलिहन्ते।” नका रुजन लछार पछार जाएस्यु ना दुस्टआत्मा चोएसै कलिऊस्यु नका रु ल्योङन पलिईस्यु हिनौ।
ओटन सोगल अचम्म रामानिऊ कि नकाङ ऐलेस्यु रारां छ्योङौ तअसिवाङ, “इकाता छार सिक्छ्या दी रैस। इकाले ता घिन्या अढिकार सकाए दुस्टआत्माङजन आग्या दी योंवर, ओटन नकाङै इकाल आग्या मानिरा रैस।” तब ओचोएटै येशुल मिन गालीलला हुङआङा सोगलै पोल फैलिऊ।
येशुले तबर रुयाङजन आसबेल्वाङ
मत्ती ८:१४-१७; लूका ४:३८-४१
येशु सनर आ सिइयाङ ओचोएटै आराधना झिमलन पलिईस्यु याकूब सनर यहुन्नासकाए सिमोन सनर अन्द्रियासलं झिमल रांवाङ। सिमोनल माइज्यू आनाएबोरले थलिस्यु रुउज्याऔ, ओटन नाल बारेल ओचोएटै येशुजन रापानस्यौ। ओटन येशु नकाल नेराक रा:स्यु जब नकाल आकुई कोलोअस्यु नकाजन आसचोटौ, तब ना नाएबोरतन बेलौ, ओटन नकाले येशुल सेवा ढाऔ तअसिऊ।
ओईका बेला जब नम्युउ बुदिउ, रुयाङै सोगलै नाएबोरन्याङ ओटन ओयाङ जो जोल दुस्टआत्मा लागिन्याङजन येशु ल्योङ राहोन्वाङ। ओटन सोगल बजारला रुयाङ, झिमल मासुनस्यु झलाप वङ समन लेवाङ। नकाङै दुस्टआत्माङन भ्याई दुख डोएज्यावाङ, ओटन तबर किसिमला नाएबोरन्याङजन येशुले आसबेल्वाङ, नैताइस्यु दुस्टआत्माङजन छ्योङौ आमायोवाङ, दानाङभन्या ओलजन नकाङै शईस्युलेवाङ।
गालीलल येशुल प्रचार
लूका ४:४२-४४
छकाल्या “नम आमारनौ हादेए सोस्यु येशु आबाठएक पोल हिनौ, ओटन ओङ प्रार्थना ढाऔ तअसिऊ। तर सिमोन सनर आन्हाएयाङ येशुजन रोअन्या लेस्यु बाहेर पलिइवाङ। ओटन जब येशुजन रांडोटौ, तब नकाङै ऐराढोव, सोगलैले नङजन रोअज्यारा।”
तब येशुले नकाङजन ऐआढोवाङ, “रांचिते गे नेराजिऊला नङ्गरल हिन्या, ओटन नङं बै ङा प्रचार ढोङा, दानाङभन्या ङा इकाल नाल्टै ङारांङु हो।” ओटन गालीलला सोगल आराधना झिमल हिनस्यु प्रचार आढोव ओटन दुस्टआत्माङजन पलिईस्यु येशु नलन हिनौ।12
येशुले तोलोअ कुरीजन आसबेलन्या
मत्ती ८:१-४; लूका ५:१२-१६
ओटन तोलोअ कुरी येशु ल्योङ रांऔ, ओटन ओलं सामन्दी घुन्डा टिकिस्यु बिन्ति आढोव “नङ इच्छ्या ढोनकन ङाजन सबेलौ ढुदुना।”
येशुले दया मानिस्यु कुई आपारिउ ओटन नकाजन छुस्यु ऐआढोव, “ङा ऐढाना नङ बेलन्ते।” नवाए बेलाईज नाल कोर बेलौ, ओटन ना बेल्दा। तब येशुले नाजन कडा आग्या यांस्यु ओचोएटै आपरिङौ, ओटन नाजन ऐआढोव, “खिम्ते, नङ काङ्काईजन तापानस्यौर, तर नङजै हिनस्यु पुजाउरो ल्योङ थनसिन्ते, ओटन नङ नबेलन्या रुयाङल प्रमानल नाल्ट मोशाले आपानन्या अनुसार भिटी चराइते, जो रुयाङल नाल्ट साची ग्याताइत्या।”13 तर नकाले बाहेर रा:स्यु खुलमखुल्ला प्रचार ढाऔ तअसिऊ, ओटन येशु फरि खुलमखुल्ला बजारल थनसिस्यु हिनौ माढुदुडा, तर आबाठए पोल लिज्याऔ। ओटन रुयाङ चारवरङन आल्योङ दुउसिवाङ।
Source notes (13)
- Cross-reference मलाकी ३:१
- Cross-reference यशैया ४०:३
- Footnote यर्दन भईल पछिम एशियाल म्रित सागरल बगिज्यान्या २५१ किलोमिटर (१५६ मायिल) ल्होन्या भई हो।
- Cross-reference २राजा १:८; मत्ती ३:४
- Cross-reference उत्पत्ति २२:२; भजनसङ्ग्रह २:७; यशैया ४२:१; मत्ती ३:१७; मर्कुस ९:७; लूका ३:२२
- Footnote परमेस्वरलं राज्यला चान्याथाई प्रचार ढान्या सनर ओलं राज्यल थनन्या नाल्ट छेलन्या समाय रा:स्यु लेया।
- Cross-reference मत्ती ३:२
- Footnote गालीलला ईका समुन्दर इस्राएललं उत्तर-पुर्बङन यर्दन हाल चिराल लेया।
- Footnote सिनागोग=यहूदीयाङ दुउसिन्या झिम
- Cross-reference मत्ती ७:२८-२९
- Cross-reference भजनसङ्ग्रह १६:१०; यशैया ४१:१४-१६; २०; प्रेरित ३:१४
- Cross-reference मत्ती ४:२३; ९:३५
- Cross-reference लेवी १४:१-३२
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.