Sheshi Kham
यहुन्ना 2
काना सहरल ब्याहा
तिस्रा दिन छिम्क गालील प्रदेसला काना1 सहरल तोलोअ ब्याहा लेऊ। येशुल आअमा मरियम ओलं लिज्याऔ। येशु सनर आसिइयाङजन बै ब्याहाल रांखुल्वाङ। अङ्गुरल रस आखेमौ छिन्ट, येशुल आअमाले ओलजन ऐआढोव, “नकाङ ल्योङ अङ्गुरल रस खेम्दा2।” येशुले आअमाजन ऐआढोव, “औ स्त्री, ङा नै ढान्याताहौ ङाजन ऐताढाङ। ङा बेला3 अझै मारांडी।” ओलं आअमाले काम ढान्याङजन ऐआढोवाङ, “जे नकाले आपरिमन्या अनुसार ढोचिते।” आब यहूदीयाङल चोखाइन्या चलन अनुसार नल छ्योअ त सय लितर सुनन्या लुङल छ गोटा घारीयाङ नाएसिन्या लेऊ।
येशुले नोक्करयाङजन ऐआढोवाङ, “घारीयाङ री ले आयां समन फाङजाएचिते।” नकाङै घारील आयां समन रीले फाङ रांजाटौ। येशुले नकाङजन ऐआढोवाङ, “तचिठक्क री वापस्यु ब्याहाला मुख्या सेर ल्योङ लाङस्योचिते।” नकाङै ना रा:लाङस्यौ। ब्याहाला सेरले ना री आदारौ, जो आब अङ्गुर रस ताइस्यु लेऊ। ना, काङन राहोनौ नाजन थाहै माताइदा, तर री रेंपन्याङजन याएज थाह लेऊ। तर ब्याहाला मुख्या सेरले दुलाहाजन खुल्स्यु ऐआढोव। “ख्वाए रुयाङै हादेए चान्या अङ्गुर नुम्सिन्या पारिरा ओटन रुयाङै तबर रांओव छिन्ट माचान्या अङ्गुर नुम्सिन्या योंरा। नङ ता अझ समन चान्याई अङ्गुरल रस नुम्सिन्या नाएस्यु नल्नुरैस।” ओले अचम्मला कामयाङ ङन ईका पहेला अचम्मला कामयाङ येशुले गालील प्रदेसला काना सहरल आढोव। ऐलेस्यु ओले आमहिमा आथनौ, ओटन आसिइयाङै ओजन बिस्वास रांढोव। ओलं छिन्ट येशु, आअमा, आभाईयाङ सनर आसिइयाङसं कफर्नहुमलं हिन्वाङ, ओटन तचिइ दिन समन नलै चुङवाङ।4
येशु यरुशलेम मन्दिरलं हिनौ
मत्ती २१:१२-१३; मर्कुस ११:१५-१७; लूका १९:४५,४६
यहूदीयाङल निस्तार5-पर्ब नेराक रा:स्यु लेऊ, ओटन येशु यरुशलेम मन्दिरलं हिनौ।6 येशुले मन्दिरलं यीङयाङ, शान्ढाङ सनर कचिकुरयाङ लङन्या यएन्याङ सनर रुप्या फिरिन्याङजन राचुङज्यान्या आडोएवाङ। ओटन तोलोअ छिङल कोर्ला जाएस्यु येशुले यीङयाङ, शान्ढाङ, सोगलैजन मन्दिरलन आचाहारवाङ, ओटन नकाङल देस्क पल्ताइस्यु बागस फलुपस्यास्यु रुप्या फिरिन्याङल रुप्या आग्वाएस्योवाङ। परेवा यएन्याङजन येशुले ऐआढोवाङ, “इलन ईका सोगलै लाङस्यु हिन्चिते। ङा बौल झिमजन बैपारल झिम ताजाएच्यो।” नवाए बेला आसिइयाङै पबित्रशास्त्रलं सरसिन्या छेन यांका रांढोव, “औ परमेस्वर नझिमल नाल्ट जोशले ङाजन हिप्जिया।”7 यहूदी अढिकारीयाङै ऐलेस्यु रांगिनौ, “नङजन ईका काम ढान्या नै अढिकार लेऊ, नैति नङ अचम्मला काम ढाऔ नढुदुनु?” येशुले ओयाङजन जबाक आयोवाङ, “ईका मन्दिरजन थाएचिते, ओटन ङा तिन दिनक इकाजन सच्यान्ङा।”8 तब यहूदीयाङै ऐराढोव, “ईका मन्दिर निब्जाइन्याता छेयालिस बर्स लागिऊ, ओटन ओक्या नङ ईका तिन दिनक ऐयाङ सच्यानौ ढुदुना का?” तर जो मन्दिरलं बारेल येशुले आपानौ, ना आबुलल बाए हो। जब येशुले सिस्यु जिङदा ताइस्यु सोङा लेस्यु आपानन्या छेन आ सिइयाङ यांका रांढोव, तब नकाङै पबित्रशास्त्रलं यर्त सनर येशुले आछ्योङन्या बचनत बिस्वास रांढोव।
येशुले रुल यिङ सन्वा
जब येशु निस्तार-पर्बल भोसलं बेला यरुशलेम सहरल लिज्याऔ, तब ओले आढान्या अचम्मला काम रङस्यु तबरले आ मिनङन बिस्वास रांढोव। तर येशुले नकाङल भर मामानिदा, दानाङभन्या ओलं सोगलैजन सहौरा। रु नैति ऐलेस्यु, येशुजन रुल बारेङन काङ्काईले बयन यांन्या आबस्यक माल्दी, दानाङभन्या रुल यिङल नैति लेऊ, ना येशुले ओलजै सन्वा।
Source notes (8)
- Footnote ईका लगभग १५ मायिल तिबेरियाल उत्तर पछिमदेए सनर ६ मायिल नासरतलं उत्तर पुर्ब देए तोलोअ इङन्या ठक्क बजार लेऊ।
- Footnote अङ्गुर नुम्सिन्या माल्दी ईका थाह माल्दी कि मरियमले दानाङ येशुजन ऐआढोव। इकाल मतलब ईका प्रमानित ताहा कि ओलजन बिस्वास लेऊ कि येशु अभाबल परिपुर्न जाएन्या सक्छेम लेऊ।
- Footnote इकाल मतलब अचम्मला काम ढान्या बेला माराऔ माङडी, कि रुयाङ री ओइन्या बेलाक अचम्मला काम रङन्या सनर बिस्वास ढान्या बेला माराऔ हो।
- Cross-reference मत्ती ४:१३
- Footnote इस्राएलीयाङ मिस्र देसलन रापलिहौ छिम्क रांमानिन्या पर्ब=निस्तार चाड
- Cross-reference प्रस्थान १२:१-२७
- Cross-reference भजनसङ्ग्रह ६९:९
- Cross-reference मत्ती २६:६१; २७:४०; मर्कुस १४:५८; १५:२९
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.