Skip to content
BibleKenya

Sheshi Kham

यहुन्ना 15:5

Verse 5 is marked below, with the whole chapter around it. Read from the start

अङ्गुर टुङ सनर हाङ्गाङ

“ङा मछ्युका अङ्गुर टुङ ङा हो, ओटन ङा बौ किसान लेया। ओटन ङात लेन्या सोगल हाङ्गा जोले जाए माशशहौ ओले नकाजन छेल्वा ओटन शई शशैन्या सोगल हाङ्गाजन झन्जै भ्याई शई ग्याशैत्या लेस्यु ओले छान्टिवा। ङा जेजन ङापानस्यान्या बचनले जे हादेए जै चोखा ताइस्यु लेच्या। जे ङात लिज्याचिते, ओटन ङा जेत लिज्याङा। जोमनलेस्यु अङ्गुर टुङत आहाङ्गा मालिज्याकन नकाले ओलजै शई शशहौ माढुदुऊदी, नैताइस्यु जे बै ङात मालेच्योकन माढुदुचिदी।”

“ङा अङ्गुर टुङ हो, जेकने हाङ्गाङ हो। यदि काङ्काई ङात लिज्यादा भन्या, सनर ङा नकात लिज्यादुङा भन्या, नकाले तबर शई शशैवा, दानाङभन्या ङातन बाठए ताइस्यु जे नैज ढाऔ माढुदुचिदी। काङ्काई रु ङात मालज्यादा भन्या, नका हाङ्गामन बाहेर मिल्काइसिया, ओटन ना ऐराङ। नैताइन्या हाङ्गाङ रुयाङै दुउरा ओटन मील क्याइरा, ओटन नकाङ हिप्सिरा। जे ङात लिज्यादुच्या भन्या, सनर ङा बचन जेल्योङ लिज्यादा भन्या, जेजन जो इच्छ्या लागि नीचिते, ओटन ना जे नाल्ट ढान्यालेसिया। जे तबर शई शशैस्यु ङा सिइयाङ ज्या ऐलेन्या प्रमानित जाएच्योकन आकातै ङा बौल महिमा ताइन्यालेया।”

“बौले जोमनलेस्यु ङाजन प्रेम आढाङु, ङा बै जेजन प्रेम ढास्यु लेङा। जे ङा प्रेमत लिज्याचिते। यदि ङा आग्या पालन ढोच्योकन जे ङा प्रेमत लिज्याच्या, जोमनलेस्यु ङा बौल आग्या पालन ङाढोङु, ओटन ओलं प्रेमतै लिज्याङा।”

ङा ईका छेन जेजन आकाई कारन ङापानस्याचिऊ, कि ङामि आनन्द जेत ग्यालिज्यात्या, ओटन जेमि आनन्द परिपुर्न ग्याताइत्या।

ङा आग्या ईकाइ ज्या, कि ङा जेजन जोमनलेस्यु प्रेम ङाढाचिऊ, जे बै तोलोअले-छुट्टैजन नैलेस्युजै प्रेम ढोचिते।1 ज्योङ न्हाएयाङल नाल्ट ज्योङ परान अर्पन ढाऔ भन्या प्रेम ढान्या याए घिन्या अपुर नैज माताइदी। ङा जेजन जो आग्या यांच्यो, जे नका पालन ढोच्योकन, जे ङा न्हाएयाङ ज्या। आबकन ङा जेजन नोक्कर ऐमाढाचिदी, दानाङभन्या नकाल साहूले नै आढोव नोक्करले मासनौदी। तर ङा जेजन न्हाए ऐढादुच्या, दानाङभन्या जो ङा बौल्योङन ङा थएङु, ङा ना सोगलै जेजन पानस्युई लेङा। ङाजन जे जेमाछेलङचिऊ, तर ङा जेजन ङाछेल्चिऊ ओटन जेजन ङाखटाइचिऊ, कि जे हिन्चिते, ओटन शई शशैचिते, ओटन जे शई ग्यालिज्यात्या। नैताइस्यु जे बौसकाए ङा मिनत जो नीच्यो, ओले जेजन नाइज यांन्या लेया। ङा जेजन प्रेम ढाच्या, कि जे तोलोअले छुट्टैजन प्रेम ढोचिते, लेस्यु आग्या ङा यांच्या।

सङ्सारलं सुजिइ

“यदि सङ्सारले जेजन सज्युचिरकन, जे सन्चिते कि जेजन सज्युउ हादेए नकाले ङाजन आसज्युङु हो। यदि जे ईका सङ्सारला ताइच्योकन सङ्सारले जेजन आरु यिङस्यु प्रेम ढाचिवा होला। तर जे ईका सङ्सारलाङ माङडी। जेजन ङा सङ्सारलन ङाछेल्चिऊ, नैताइस्यु सङ्सारले जेजन सज्युचिवा। ङा जेजन ङापानस्यान्या बचन यांका नाएच्यो, ‘सेवाऱ्या झिमल साहूतन घिन्या माताइदी।’ नकाङै ङाजन सताहङरकन जेजन बै सताइन्यालेरा। नकाङै ङा बचन पालन धोरकन जे बचन बै पालन ढोरा।2 तर नकाङै ईका सोगल छेन ङा मिनल कारनले जेजन ढाचिरा, दानाङभन्या नकाङै ङाजन परिङन्याजन माशईरदी। ङामारांन्या ताहकन सनर नकाङजन ङामापानस्यान्या ताहकन नकाङ पापल दोसी माताइरदी होला, तर आब ता रांमि पापल नाल्ट नकाङ सकाए नैज बाहाना माल्दी। जोले ङाजन सज्युङु, नकाले ङा बौजन बै सज्युवा। यदि अपुर काङ्काईले रांमाढान्या काम ङा नकाङल खार्ल ङामाढान्या ताहकन नकाङ पापल दोसी माताइन्याङ हो। तर आब नकाङै ङाजन सनर ङा बौ नेंलोअझन्जै रङस्यु लेरा ओटन सज्युन्यालेरा। तर, ब्यबस्थाला नियामल सरसिन्या ईका बचन पुरा ताहौ नाल्ट ईका ताहौ हो, ‘नकाङै ङाजन बिनाशब्दै रासज्युङु।’”3

“जब सल्लाकार रां, जो ङा बौल तरफङन जेल्योङ परिङन्या लेङा, अथाबा सत्यला आत्मा, जो बौङन रांज्याऔ, ओले जै ङा बारेल बयन यांन्या लेया। जे सुरुकन्जै ङासं जेलेऊकाले, जे बै ङा साचीयाङ हो।”

Source notes (3)
  1. Footnote यहुन्ना १३:३४; १५:१७; १यहुन्ना ३:२३; २यहुन्ना ५
  2. Cross-reference मत्ती १०:२४; लूका ६:४०; यहुन्ना १३:१६
  3. Cross-reference भजनसङ्ग्रह ३५:१९; ६९:४

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.