Skip to content
BibleKenya

Sheshi Kham

प्रेरित 27

पावल रोमदेए हिनौ

जब ईका निर्नय ताहौ कि गे री जाहसतन इटालिया हिन्‌या, तब नकाङै पावल सनर कोबाअ अपुर कैदीयाङ राझन्ज बै युलियस मिनला अगस्तसल सैनिक दलला कप्तानल कुईत रा:सुम्पिऊ। एड्रामिटेनोसलन एशिया प्रदेसला छुटाछुट्टै बन्दरगाहयाङ ताइस्यु हिनन्या तोलोअ री जाहसलं छिरिस्यु गे काम सुरु गेढोयिउ। अरिस्तार्खस मिनला थेसलोनिकेला तोलोअ माकेडोनि गेसकाए बोलोङ लेऊ। गे छिन्का छिम्क गे सीदोनल गेतापयिउ। युलियसले पावलजन दया थनस्यु नकाल न्हाएयाङ ल्योङ हिनस्यु चाहिन्या व्एन्या होनन्या अनुमति आयोव। नङंन घूईका आढाऔकाले री जाहस फएस्यु गे साइप्रस टापुल वङ्ङन ताइस्यु गेहिन्यिउ। किलिकिया सनर पामफिलिया नेराका समुन्दर ताइस्यु गे लुकिया सहरल माइराल गेलाइयिउ। नङ कप्तान अलेक्जेन्ड्रियाला तोलोअ री जाहस इटालिया हिन्ङाआल्ज्यान्या गेडोएयिउ ओटन ओले गेजन ओलं अलेक्जेन्ड्रियाल तोलोअ री जाहस गेडोएयिउ ओटन पटवाराले गेजन नकाल आचराइयिउ। जब गे भ्याई दिन समन माठो माठो बअ दुखसकाए क्नीडसल सामन्दी गेतापरायिउ, ओटन घूईकालेगर्दा अझै हादेए बाऔ आमायांचिऊ नैताइस्यु क्रेट ताइस्यु गे सालमोनेल वङल गेहिन्यिउ। बअ दुखसकाए नकाल वङवङ बास्यु गे सुन्दर बन्दरगाह ऐढासिन्या पोल गेराइयिउ। नङंन लासिया सहर नेराकै लेऊ।

जब भ्याई दिन बितिऊ, ओटन समुन्दर रीला यमल गारोला लेऊ, नैताइस्यु कि बर्तल दिन आब खिमस्यु लेऊ, ओटन पावलले नकाङजन ऐआढोवाङ, “ऐ भाईयाङ, ङाजन ऐटाइन्या सनौज परिया कि ईका यमल बिपत्ता सनर भ्याई नोक्सान याएज समान ओटन जाहसलं मानकन गेमि परान बै हिनौढुदुवाङ।” तर सुबिदारले पावल आछ्योङन्याल भन्या री जहास चलाइन्या कप्तान सनर जहासलं खसमले नेंछ्योङन्या छेनत बिस्वास आढोव। ईका बन्दरगाहल हिउदा कटाइन्या सुबिदा आलेऊकाले जोमनलेस्यु बै फोनिक्सलं ज ताप्स्यु झिमौ साहा कटाइन्या ताहा ऐलेस्यु भ्याउयाएले नङंन जाहस चलाइन्या सल्ला रांयोव। फोनिक्स क्रेटला तोलोअ बन्दरगाह ज्या, जो दच्छिन-पछिम सनर उत्तर-पछिमदेए फर्किस्यु लेऊ।

समुन्दरल आन्ढी

जब दच्छिनङा घूईका ततार सकाए आढोव, नकाङै रायिङौ कि नकाङजन जो आबस्यक लेऊ नका रांल्योङ लेऊ, नैताइस्यु लङ्गर रांछेनौ ओटन क्रेटल वङवङ समुन्दरल लेऊक गेहिन्यिउ। तर तचिइ समाय छिन्ट ना टापुलन घिन्या आन्ढील बेगत उत्तर-पुर्बी ऐढासिन्या मिनला घूईका चलिउ। जब री जाहस आन्ढील चपेटाल परिऊ, नाले घूईकाजन थामिऊ माढुदुडा, ओटन गे ओजन बगिऊ गेयोंयिउ ओटन चलिज्यान्या हावासै गेराइयिउ ओटन ना हिनौ। तब क्लौडा ऐढासिन्या तोलोअ इङन्या टापुल वङ्ङन बगिस्यु हिनौ, ओटन गे बअ दुख सकाए जाहसला डोङ्गाजन जोगाहौ गेढुदुयिउ। नकाजन छेन्स्यु गोटागोटा उपाय ढास्यु जाहसजन वान्ङन रांपोकौ, ओटन सिरटिस ऐढासिन्या बाल्वाल बुदिया ऐलेन्या छ्याइले तिरपाल सनर समानजन रांउतारिऊ ओटन जहास ओलजै बगिऊ लागिऊ। आब आन्ढीले गेजन भ्याईज छेनन्या सनर पछारिऊ लागिऊ, ओटन तयोअछिम्क नकाङै री जाहसला सामान क्याहौ लागिवाङ। ओटन तिस्रा दिन नकाङै राकुईले जाहसला समान बै रामिल्काहौ। जब तबर दिन समन नम्युउ सनर हरवए नैज रङौ माडोएज्यावाङ, नवाए बेला भ्याई आन्ढी चलिज्याऔ, आखिरीत गे सोगल बान्चिन्या आसज गेमाढोयिउ।

तबर दिन समन नकाङ ज्यान्या समन माज्यास्यु चुङस्यु लेवाङ। तब पावल नकाङ लेऊक च्याङस्यु ऐलेऊ, “ऐ न्हाएयाङ, जे ङा सल्ला मानिस्यु क्रेटलन जाहस माचलाहौ परिन्या हो, ओटन ऐटाइन्या दुख ङा कारनले नोक्सान ब्याहारिऊ परिऊ। तर आब ङा आकअ जेजन बिन्ति ढाच्या, साहस ढोचिते। जे काङ्काईल सिन्या माल्चिदी, तर जाहस नस्ट ताहा। दानाङभन्या ङा जो परमेस्वरलं हो, ओटन जोल आराधना ङा ढोङ, ओलं तोलोअ स्वर्गदुत जेईक रिउल ङालेऊक च्याङस्यु छ्योङौ। ओले ङाजन ऐआढाङु, ‘पावल, ताछ्यातन, नङ कैसरलं लेऊक निस्सिबै च्याङौपरिया, ओटन खिम्ते, नङसं जहासलं चरिन्या सोगलैजन परमेस्वरले नकुईत यांस्यु नाटन्वा।’ नैताइस्यु न्हाएयाङ, साहस ढोचिते। ङा परमेस्वरजन बिस्वास ढोङा, ङाजन जो पानस्याङु, ठिक्कै नैज ताहा। तर गे काङ्का तोलोअ टापुल बजारसिन्या लेया।”

तर जब चौध रिउ ताहौ, ओटन अन्द्रियास भुमध्य सागरल गेहुत्तिज्यायिउ, तब तपाअ रिउल नाबीयाङै गे काङा नामल नेराक गेतापराज्यायिउ ऐलेस्यु अनुमान रांढोव, ओटन गैराई मानस्यु रांखिमौक नकाङै चालिस मिटर लेऊ लेस्यु पत्ता रांलाहौ, ओटन तचिइ हुदेए हिनस्यु फरि गैराई रामानौक नकाङै तिस मिटर लेऊ लेस्यु पत्ता रांलाहौ। ओटन ऐयाङ चमलयर्त ठुकिसियाकरअ ऐलेन्या छ्याहै, नकाङै जहासलं छिन्ङन चारगोटा लङ्गर रासटेहौ, ओटन छकाल्या ग्याताइत्या ऐलेस्यु प्रार्थना ढाऔ तअसिवाङ। जब नाबीकयाङ री जाहसलन ढोङौ तअसिवाङ, ओटन हाङन लङ्गर सतेइन्या बाहानाले डोङ्गालन समुन्दरल लाइवाङ, तब पावलले कप्तान सनर सिपाइयाङजन ऐआढोवाङ, “ईका रुयाङ जाहसलं माचुङदुरा भन्या जे बान्चिऊ माढुदुचिदी।” तब सिपाइयाङै डोङ्गाला छिङयाङ रापलाअस्योव, ओटन डोङ्गाजन हिनौ रांयोव।

जब छकाल्या होएहोए ताइङा लिज्याऔ, पावलले सोगलैजन ज्यान्याज्योया ऐआढोवाङ, “जे अन्टातोल परीस्यु लेच्यो नैज माज्यास्यु करेटै जेचुङन्या आछिम चौध दिन ताइदा। नैताइस्यु कोबाअ ज्योचिते ङा जेजन ऐढाच्या। कोबाअ ज्योच्योकन जे बान्चिच्या, ओटन जेमि काङ्काईल ङएलन तोलोअ चेम बै नस्ट माताइदी।” ईका आपानौ छिन्ट नकाले भरेई आहोनौ, ओटन सोगलैल हार्मै परमेस्वरजन धन्याबाद चराइस्यु ना कलाएस्यु कयौ तअसिऊ। तब नकाङ सोगलैले बै हौसला डोएस्यु कोबाअ ज्यान्या जन्तु रांज्योव। जाहसलं ताइन्या गे जम्मा नेसय छेहत्तर जना गेलेयिउ। नकाङ सोगलैले वाङौजोरसं ज्योरापाइना, जाहसजन बुङन्या जाटौ नाल्ट समुन्दरल पलीमाजन राक्याइस्यौ।

री जहासलं नोक्सान

होएहोए आताहौक बै नकाङै ना पो सहौ रांमाढुदुऊ, तर नकाङै तोलोअ खाडी रांरङौ। नकाल बलौत्या आवङ लेऊ। ताहौढुदुउकन जाहसजन नलै आवङल लाङया। नकाङै लङ्गर पलाअस्यु रासटेहौ, ओटन समुन्दरलै नका लिज्याऔ रांयोव। नवाए बेलाई पटवाराङजन पोअस्यु रानाएन्या छिङयाङ रापलाअस्योवाङ, हादेएङा तिरपालजन छेन्स्यु घूईकादेए राथोरौ ओटन जाहसजन आवङदेए रालाङौ। तर रील न्युउल बोरसिज्यान्या बाल्वाल जाहस थुक्किसिस्यु नलै बुदिउ, जहासलं हाङन्ता वङ व्आव ओटन चलिउज माढुदुडा, ओटन छिन्ङन्ता भाग छालयाङल जोरले टुक्रिऊ तअसिऊ। कैदीयाङ च्योलस्यु ढोङवाङ सन् ऐलेन्या यिङसिस्यु सिपाइयाङै नकाङजन सएन्या सल्ला रांढोव। तर कप्तानले पावलजन जोगाइन्या यिङ ढास्यु नकाङजन नैलेन्यातन आरुकिवाङ। च्योलौ ढुदुन्याङ सोगलै जाहसलन हादेए जोओस्यु आवङल हिन्चिते ऐलेन्या आदेस नकाले आयोवाङ, ओटन बाङ्की लिज्यान्याङ फलल्यां जिऊतन सनर जाहसला टुक्राङतन हूत हिन्चिते ऐआढोवाङ, ओटन ऐलेस्यु सोगलै चान्यासकाए आवङल तापवाङ।

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.