Sheshi Kham
प्रेरित 22
“ऐ भाईबैनाङ सनर आमा बौयाङ, ङा छेन थएचिते, जो ङा आब जेहार्मै ऐलेङा।” पावल हिब्रू छेनल आछ्योङन्या थएस्यु नकाङ चुप ताइवाङ।
नकाले ऐलेऊ, “ङा किलिकिया सहर टार्ससलं जर्मिन्या तोलोअ यहूदी हो, तर ईका यरुशलेमला गमलिएलल सिक्छ्यात ङाघिङु। गे पुर्खाल बिधि अनुसार ङा चान्या सिक्छ्या डोएस्यु लेङा। आछिम जे परमेस्वरतं ज्वाए उत्साहित जेल्चिऊ, ङा बै ओवाएजै उत्साहित लिज्याङा। ङा ईका यमला रुयाङजन सिऊ समनजै ङासताहङवाङ, ओटन ल्हेपा सनर मेएमाङजन पोअस्यु झ्यालखानाल ङाझोकङवाङ। प्रधान पुजाउरो सनर सोगलै महासभाले बै ङा पक्छेल साची योंरा। प्रधान पुजाउरोयाङ तरफङन भाईबैनाङल मिनत कोलोअन्या पुर्जी डोएस्यु ङा नङ लिज्यान्या बिस्वासीयाङजन पोअस्यु यरुशलेमल होनस्यु सजाय यांऔ नाल्ट दमस्कसलं हिनस्यु ङाल्ङु।”
पावलले आयिङ आफिरिसिन्या बारे आपानन्या
प्रेरित ९:१-१९; २६:१२-१८
“ङा यमल दमस्कसलेऊलं ङातापरांऔक लगभग लाअक तोलोअ झुकाउन्या नमतन तोलोअ घिन्या ज्योति ङा चारवरङन चम्किऊ, ओटन ङा नामल ङापाइङु, ओटन ङाजन ऐआढाज्याङन्या तोलोअ ग़ा ङा थएङु, ‘औ शाऊल, औ शाऊल, नङ दानाङ ङाजन दुख यांङ?’ ओटन ङा ङागिन्ङु, ‘औ प्रभु, नङ काङ्का?’ ओटन ओले ङाजन ऐआढाङु, ‘नासरतला येशु ङाई ज्या, जोजन नङ दुख नयांज्यानु।’ तब ङासकाए ज्वाए गोटाङ लेवाङ, नकाङै ज्योति ता रांरङौ, तर ङासकाए छ्योङन्याल शब्द ता माथएदुरा।” “ङा ऐङाढोङु, ‘औ प्रभु, आब कै लेङ?’ ओटन प्रभुले ङाजन ऐआढाङु, ‘च्याङनते, दमस्कसलं हिनन्ते, ओटन नङ ढाऔपरिन्या तुकिसिन्या कामयाङ नङजन पानन्या लेसिया।’ नका ज्योतिल चमकले जब ङा नैज रङौ ङामाढुदुङु, तब ङासकाए लिज्यान्याङै ङा कुई कोलोअस्यु डोऱ्याइस्यु ङाजन दमस्कसलं राहोनौ।”
“नका सहरल हननिया ऐढासिन्या तोलोअ ब्यबस्था अनुसार चलिस्यु लेन्या तोलोअ भक्त रु जोले नल चुङन्या सोगलै यहूदीयाङ ल्योङन मान डोएस्यु लेऊ, नका ङाल्योङ रांऔ, ओटन ङा नेराक च्याङस्यु ङाजन ऐआढाङु, ‘भाई शाऊल, कि नङ रङौ ग्याढुदुनत्या।’ ओटन ङा नवाए बेला नजर ङाडोएङु, ओटन नकाजन ङारङ्ङु।”
“ओटन नकाले ऐलेऊ, ‘गे पुर्खाङल परमेस्वरलं इच्छ्याजन सनन्या, सनर ना धार्मिक ल्हेपाजन रङन्या, ओटन ओलं याह्लन छेन थटौ नाल्ट नङजन छेल्स्यु नाटन्वा। दानाङभन्या सोगलै रुयाङल लेऊक ओलं नाल्ट नङ जो नरङन्या सनर थएस्यु नल्नु, नङ नकाल साची लेना। ओटन आब दानाङ वुइज्याङ? च्याङनते, ओटन बप्तिस्मा होन्ते, ओटन येशुल मिन पुकारस्यु नपाप चेईते।’”1
गैरयहूदीयाङजन प्रचार यांऔ नाल्ट पावलजन अनुरोद
“जब ङा फरि यरुशलेमल वलस्यु ङारांङु मन्दिरलं प्रार्थना ङाढाज्याङु ना बेला दर्शन ङारङ्ङु। परमेस्वरले ङाजन ऐआढाज्यान्या ङा ङारङ्ङु, ‘छिटो ढास्यु यरुशलेमलन पलिहन्ते, दानाङभन्या ङा बारेल नङ नयांन्या बयन नकाङै ग्रहन ढान्या मालरदी।’”
“ङा ऐङाल्ङु, ‘औ प्रभु, ङा सोगल आराधना झिमल हिनस्यु नयर्त बिस्वास ढान्याङजन झ्यालखानाल झोअन्याङ सनर टुपन्याङ इकाङ सोगलैजन थाह ऐलेया।’ नमी साची स्तिफनसल जी आबगिउक ङा ङाईज बै नेराकै च्याङस्यु नकाजन सएन्याल सहमत ताइस्यु, नकाजन सएन्याङै क्वा वाइस्यु ङाचुङज्याङु। तब प्रभुले ङाजन ऐआढाङु, ‘हिनन्ते, दानाङभन्या ङा नङजन गैरयहूदीयाङ ल्योङ लोए-लोए समन परिङना।’”
नकाङै पावलल छेन इङ समन याएज राथटौ, ओटन ऐलेऊयन नकाङ घिन्या ग़ाले चिचच्याहौ तअसिवाङ, “ऐटाइन्या रु पिरथ्बीलन लोए ग्याताइत्या। दानाङभन्या ईका बान्चिन्या लायकला माल्दी।” नकाङ रां क्वा चिटौयन ओटन धुलो ओडाहौयन कलिकौ तअसिवाङ। रोमला सेनापतिले आदेस आयोवाङ, “नाजन अड्डा भितरलं लाङचिते, ओटन कोर्ला लगाइस्यु खारनिखार जाएचिते, कि ङाजन थाह ग्याताइत्या दानाङ नकाल बिरोद ढास्यु ऐलेस्यु कलिऊज्यार।” ओटन जब नकाङै पावलजन छालाल छिङले रांपोकौ, तब पावलले नेराकै च्याङज्यान्या कप्तानजन आगिनौ, “नैति रोमी नागरिक सनर दोसी माठहरिन्या रुजन कोर्ला लगाइन्या नियासका लेऊ?”
कप्तानले ईका थएवापाइनाई सेनापति ल्योङ रा:स्यु ऐलेऊ, “नङ नैति ढाऔ नआन्तिज्यानु? दानाङभन्या ईका रु ता रोमी नागरिकदी रैस।” तब सेनापतिले रा:स्यु पावलजन आगिनौ, “ङाजन पान्ते, नैति नङ रोमी नागरिक रों?” नकाजन ऐआढोव, “औ ओज्या।” सेनापतिले जबाक आयोव, “ङा ता ईका नागरिक ताइन्या हक भ्याई रुप्या फोअस्यु ङालङ्ङु हो।” पावलले ऐलेऊ, “तर ङा ता ङाजर्मिऊकन्ज रोमी ज्या।” तर नकाजन जान्चिन्या ठिक्कै ताइन्याङ सोगलै ओचोएटै हतिस्यु हिन्वाङ, ओटन पावल तोलोअ रोमी नागरिक रैस ऐलेस्यु सनस्यु सेनापति बै छ्याटौ, दानाङभन्या नकाले ओजन साङ्गलले पोअस्यु लेऊ।
पावल महासभालं लेऊक
तर छिन्का छिम्क यहूदीयाङै पावलजन नैति खास नै कारनले दोस लगाइस्यु लेवाङ, ना बुजिन्या इच्छ्याले नकाजन आपलाकौ, ओटन सोगलै मुख्या पुजाउरोयाङ सनर महासभाजन दुउसिन्या आग्या आयोव, ओटन पावलजन वान्ल हिनस्यु नकाङल लेऊक आसच्यानौ।
Source notes (1)
- Cross-reference योएल २:३२
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.