Sheshi Kham
प्रेरित 18
पावल कोरिन्थील
ओटन नाल छिन्ट पावल एथेन्स सहर राइस्यु कोरिन्थीले हिनौ। नकाले पोन्टसलं जर्मिन्या अकिलास मिनला तोलोअ यहूदीजन आडोटौ। नका आमेएमा प्रिस्किलास इटालियाङन रा:स्यु लेऊ, दानाङभन्या सम्राट क्लौडियसले सोगलै यहूदीयाङजन रोमङन पलिईस्यु हिनन्या आग्या आयोवाङ। पावल नकाङजन डोएनाव। नकाङ तोलोअ तिरपाल जाएन्या पेशाला राटाहौकाले पावल बै नकाङसै चुङौ, ओटन काम आढोव। दानाङभन्या नकाङल पेशा तिरपाल जाएसिऊ चुङौ नाल्ट जिबिका चलाइज्यावाङ। सदाईका शबाथल नका आराधना झिमल बहस ढोवा, ओटन यहूदीयाङ सनर ग्रीकयाङजन बिस्वासतं होनन्याल नाल्ट सभनन्या कोशिस आढोवाङ।
जब सिलास सनर तिमोथी माकेडोनियाङन ताप्राऔने, ओटन पावलले यहूदीयाङजन येशु जै ख्रीस्ट ज्या, ऐलेस्यु बचन प्रचारल सोगल समायतन लाइस्यु नकाले गवाइ आयोवाङ। तर जब नकाङै बिरोद ढास्यु नकाल बाए ढाऔ लागिवाङ, तब नाले आक्वा हरस्यु नकाङजन आढोवाङ, “जे जी जे ङएलै ग्यापरित्या, ङा दोस माल्दी। आबकन ङा गैरयहूदीयाङ ल्योङ हिनन्यालेङा।” तब पावलले ओयाङजन बनाएस्यु नङंन परमेस्वरलं भक्ति ढान्या तितस युस्तस मिनला गैरयहूदी रुल झिमल चुङौ नाल्ट हिनौ। ओलंझिम आराधना झिमल वङ्क लेऊ। यहूदी आराधना झिमला शासक क्रिस्पसलं सोगल जाहानले प्रभु त बिस्वास रांढोव, ओटन कोरिन्थीयाङ मध्य बै तबर रुयाङै पावलल बचन थएस्यु बिस्वास रांढोव, ओटन बप्तिस्मा राहोनौ।
तरिऊ प्रभुल पावलजन दर्शनत ऐआढोव, “ताछ्यातन, तर ङा बचन छ्योङौयन ढाज्यान्ते, ओटन छपक्कै तादिङन, दानाङभन्या ङा नङसं लिज्याङा, काङ्काईले नयर्त परिरास्यु नैज हानि ढाऔ माढुदुऊदी, दानाङभन्या ईका सहरल ङामि भ्याई रुयाङ लिज्यारा।”1 ओटन रुयाङजन परमेस्वरलं बचन ह्युउकौयन ढास्यु पावल त बर्स छ मैना समन कोरिन्थीलै लिज्याऔ।
जब गलियोन अखैयाला शासक ताहौ, तब कोरिन्थीला यहूदीयाङ तपोईलै ताइस्युकने पावलल यर्त परिवाङ, ओटन नकाजन कोलोअस्यु अदालतल राहोनौ, ओटन नकाङै ऐलेवाङ, “ईका रुले ब्यबस्थालं बिरोदत परमेस्वरलं आराधना ढान्या रुयाङजन ह्युउज्याऔ।”
जब पावल छ्योङ्ङाइ लिज्याऔ, तब गलियोनले नका यहूदीयाङजन आढोवाङ, “ऐ यहूदीयाङ, यदि मछ्युजै ईका तचिइ अनिया या घुर्बी अपरादल छेन आताइन्या ताहकन ङा जेमि छेन ध्यानसं थएन्या ठिक ताइन्यालेऊ। तर शब्दयाङ, मिनयाङ सनर जे-जेमिईज ब्यबस्थालं सवाल आताहौकाले जे-जेईज बिचार ढोचिते। ङा ऐटाइन्या छेनयाङल निया ढान्या सुइकार माढोङदी।” ओटन ओले नकाङजन अदालतलन आचाहारवाङ। तब नकाङ सोगलैले आराधना झिमला शासक सोस्थेनेसजन कोलोअस्यु अदालतल सामन्दी राटुपौ। तर गलियोनले ना छेनल नैज वास्ता मानाएदा।
पावल एन्टिओखियाल वलस्यु रांऔ
नकाल छिन्ट पावल तबर दिन समन कोरिन्थील लिज्याऔ। तब भाईयाङस बिदा ताइस्यु नका जहासतं सिरियाल हिनौ। नका सकाए प्रिस्किला सनर अकिलासने बै लेऊने। नकाले कोबाअ बर आनीउकाले नका बाचा अनुसार किङक्रियाल हिनस्यु आचेम आयनौ।2
नकाङ एफिससलं ताप्रावाङ, ओटन पावलले अकिलास सनर प्रिस्किलानेजन नलै आबनाटौने, ओटन ओलं तोलोअ आराधना झिमल पसिस्यु यहूदीयाङस बहस ढाऔ तअसिऊ। तब नकाङै ओलजन अझै तचिइ दिन चुङन्या बिन्ति राढाऔक नकाले आमाभनस्योवाङ। नकाङसं बिदा आताहौक नाले आढोवाङ, “परमेस्वरलं इच्छ्या ताहकन ङा फरि वलस्यु जेल्योङ ऐरांङा।” तब नका री जहासलं चरिस्यु एफिससलन हिनौ।
जब ना कैसरियाल ताप्स्यु लाहौ, तब नका यरुशलेमल हिनौ ओटन तङ्ङ वूमस्यु मन्डलीलं डोएसिस्यु अभिबादन ढास्यु एन्टिओखियाल वलौ। नकाले नल तचिइ दिन बिताइस्यु नङंन पलिईस्यु गलातिया सनर फ्रिगियाला पोलन ताइस्यु सोगलै सिइयाङजन हौसला यांऔयन छुटाछुट्टै पो जिऊल हिनौ।
एफिसस सनर कोरिन्थील अपोल्लोस
तचिइ समायल अलेक्जेन्ड्रिया सहरल जर्मिन्या अपोल्लोस मिनला तोलोअ यहूदी एफिससलं रांऔ। नकाजन पबित्रशास्त्रलं चान्या ग्यान लेऊ। नकाले प्रभुल सत्य यमल सिक्छ्या डोएस्यु आनाटौ, ओटन आत्मात उत्साहित ताइस्यु येशुल बारेला छेनयाङ चान्यासै छ्योङन्या सनर ह्युउन्या आढोव। अथाबा नाले बप्तिस्मा यांन्या यहुन्नाल बप्तिस्मालं बारे याएज सनस्यु लेऊ। नका यहूदी आराधना झिमल साहस सकाए छ्योङौ लागिऊ। तर नकाले आछ्योङन्या छेन थएस्यु प्रिस्किला सनर अकिलासनेले नकाजन नें झिमल नेंहोनौ, ओटन परमेस्वरलं यमल अर्थ जन अझै प्रस्टै नेंबुजाहौ। अपोल्लोसले अखैया राढान्या पोल हिनन्या यिङ आढाऔक बिस्वासी भाईयाङै नकाजन नङ हिनन्या अझै हौसला रांयोव, ओटन नकाजन सुइकार ग्याढोरत्या लेस्यु नङा सिइयाङजन उत्साह यांस्यु चिठी रा:सरौ। नाले नङ तापौ ओटन अनुग्रहङन बिस्वास ढान्याङजन तबर आव्एवाङ। दानाङभन्या नकाले पबित्रशास्त्रला बचनङन येशु जै ख्रीस्ट ज्या ऐलेन्या ईका छेन प्रमानित जाएस्युकने यहूदीयाङजन सोगलै रुयाङल हार्मै नैज माछ्योङडुन्या आजाएवाङ।
Source notes (2)
- Cross-reference यशैया ४१:१०; यशैया ४३:५; यर्मिया १:८
- Cross-reference गन्ती ६:१८
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.