Skip to content
BibleKenya

Sheshi Kham

प्रेरित 16

पावल सनर सिलास सकाए तिमोथी आहिनन्या

पावल डर्बी सनर लुस्त्रालं बै रांऔ। ओलं तिमोथी मिनला तोलोअ सिइ लेऊ। नका तोलोअ बिस्वासी यहूदी मेएमाल ल्हेपाज़ा हो, तर नकाल आबौ ग्रीक हो। लुस्त्रा सनर आइकोनियनला बिस्वासी भाईयाङतन नकाल मिन चलिस्यु लेऊ। तिमोथीजन पावलले ओलसं लाङन्या यिङ आढोव। तर ना पो ज्युउल लिज्यान्या यहूदीयाङल कारनले पावलले नकाजन लाङस्यु खटना आढोस्योव। दानाङभन्या नकाल बौ ग्रीक हो ऐलेन्या नकाङ सोगलैजन थाह लेऊ। आब नकाङ सहर जिऊला यम ताइस्यु रांहिनौक नकाङै यरुशलेमला प्रेरितयाङ सनर मुख्या सेर बिस्वासीयाङै राढान्या निर्नययाङ मानिन्या ढोचिते, लेस्यु रा:सथएवाङ। ऐलेस्यु मन्डलीयाङ बिस्वासतं बलल्या ताहौयन सनर सङख्याल दिनकाई बदिस्यु हिन्वाङ।

त्रोआसल पावलल दर्शन

पबित्र आत्माङन एशियाल बचन प्रचार ढाऔ माडोएन्या आताहौकाले पावल सनर आन्हाएयाङ फ्रिगिया सनर गलातियाला पो ज्युउलन ताइस्यु हिन्वाङ। माइसियाला सान्ढल रारापाइना नकाङै बिथिनिया प्रदेस देए हिनन्या बिचार रांढोव। तर येशुल आत्माले नकाङजन हिनौ मायोदुऊरा। तब माइसिया ताइस्यु नकाङ त्रोआसल हिन्वाङ। रिउल पावलले तोलोअ दर्शन आरङौ माकेडोनियाला तोलोअ रु च्याङस्यु ओलजन बिन्ति ढाज्याव, “माकेडोनियाल रांन्ते, ओटन गेजन व्एन्या ढासिन्ते।” जब पावलले ईका दर्शन आडोटौ, ओचोएटै गे माकेडोनिया हिनन्या तयार गेताइयिउ। गे ईका पक्का गेढोयिउ कि नकाङजन चान्याथाई प्रचार ढावनाल्ट परमेस्वरले गेजन आखुलयिउ रैस।

लिडियाल यिङ फिलिप्पील आफिरिसिन्या

तब गे त्रोआसङन री जाहसतं चरिस्यु सिधै सामोथ्राकेदेए1 गेहिन्यिउ, ओटन तयोअका छिम्क नियापोलिसलं गेतापरायिउ, ओटन गे माकेडोनियाला जो पहेला जिल्ला फिलिप्पी सहरल गेरांयिउ, ओटन जो रोमी उपनिबेस हो। गे ना सहरल तचिइ दिन गेचुङयिउ। आब शबाथ छिम्क सहरला झलाप तन बाहेर भई वङल गेहिन्यिउ, दानाङभन्या नङ प्रार्थना ढान्या पो लेया लेस्यु गे अनुमान गेढोयिउ ओटन नङ गेचुङयिउ ओटन दुउसिस्यु लेन्या मेएमाङस छेनपान छ्योङौ गेलागियिउ। ओटन थिआटीरा सहरला चुङन्या, धुङल्याइन्या रङला क्वाल ब्यापार ढान्या लिडिया मिनला तोलोअ ईस्वरभक्त मेएमाले गेमि बचन आठटौ। पावलले आछ्योङन्या छेन ध्यानसं ग्याथएरत्या ऐलेस्यु प्रभुले नकाल यिङ आखुलिस्यौ। जब ओलं सनर आझिमलाङ सोगलैले बप्तिस्मा राहोनौ, तब नकाले गेजन बिन्ति आजुरिऊ, “यदि जे ङाजन प्रभुल बिस्वासीनी यिङ्ङच्योकन ङा झिमल रा:स्यु चुङचिते।” ऐलेस्यु नकाले गेजन कर आलाइयिउ।

पावल सनर सिलास झ्यालखानाल

जब गे प्रार्थना ढान्या पोल गेहिनज्यायिउ, तब अख्यान रङन्या आत्मा लेन्या तोलोअ नोक्कर्नि मेएमासकाए गे गेडोएसियिउ, जोले अख्यान ढास्यु नकाल साहूल नाल्ट भ्याई पैसा कमाइ ढोस्यौरा। नका पावल सनर गे छिनछिन लागिऊ, ओटन ऐलेस्यु कलिकौ, “ईका रुयाङ सर्बोच्च परमेस्वरलं सेवाऱ्याङ हो। इकाङै जेजन मुक्तिल ऐलेस्यु मुइरा।” ना मेएमाले तबर दिन समन ऐजै लिज्याऔ। तब पावलले झिजो मानिस्यु फरक्कै वलस्यु ना दुस्टआत्माजन ऐआढोव, “येशु ख्रीस्टल मिनतन ङा नङजन नका ल्योङन पलिईन्या आग्या यांना।” ओटन दुस्टआत्मा नवाए बेलाजै पलिईदा।

तर नकाल खसमयाङै नकाङल कमाइल आस आमालन्या रङस्यु पावल सनर सिलासजन कोलोअस्यु बजारला चोकल शासकयाङ ल्योङ सेलस्यु रालाङौ। ओटन नकानेजन सहरला रोमी अढिकारीयाङ ल्योङ हिनस्यु ऐराढोव, “ईका रुनें यहूदीने हो, ओटन इकाने गे सहरल होहल्ला मच्चाईन्या।2 इकानेले ऐटाइन्या सिक्छ्या ह्युउन्या जो रोमी शासकलं नियामल बिरोदल लेऊ, जो निया सङ्गत माल्दी।” तब हुलयाङ मिलिस्यु पावल सनर सिलासनेलयर्त परिरावाङ। सहरला हाकिमयाङै नकानेल क्वा चिइस्युकने राक्याइस्यौ, ओटन नकानेजन सिप्का राइस्यान्या आग्या रांयोव। ओयाङै पावल सनर सिलासनेजन भ्याई सिप्का रांलाहौ छिन्ट नकानेजन झ्यालखानाल राझोकौ, ओटन झ्यालखानाला हाकिमजन ईका कैदीयाङजन कडा नजरत नाएन्या आदेस आयोव। ऐटाइन्या आदेस डोएस्यु नकानेजन झ्यालखानाल भितरङा पोल लाङस्यु नकानेल खङल यिईन्या फत्किला ठुकिस्यु रांनाटौ।

तर आधा रिउल पावल सनर सिलास प्रार्थना ढाऔयन परमेस्वरलं भजन रेएसिज्याऊने, ओटन छुट्टै कैदीयाङै ओ थएज्यावाङ। तब झुकाउन्या तोलोअ घिन्या भुईचाल रांऔ, ओटन झ्यालखानाला जगयाङ हल्लिवाङ, ओटन ओचोएटै सोगलै झलापयाङ फएसिवाङ, ओटन सोगलैल बन्दनयाङ पलाअसिवाङ। झ्यालखानाला हाकिम मिऊरुइङन सन्सिऊ, ओटन झ्यालखानाला झलापयाङ आफएसिज्यान्या रङस्यु कैदीयाङ सोगलै ढोङदुरा ऐलेन्या यिङस्यु नकाले ओलझन्जै सएन्या बिचारले तरवाल आसेलौ। तर पावलले जोरसं ऐलेस्यु कलिकौ, “नङ नङझन्जै नैज नोक्सान ताढो, दानाङभन्या गे सोगलै इलै लिज्याया।”

तब भाङ नीस्यु नका तरवाल आसिपलं झोअस्यु भितरलं रांऔ, ओटन छ्याहै वुउस्यु पावल सनर सिलासनेल खङल लेऊक गोम लेस्यु फलुप्सिऊ। नकानेजन बाहेर हिनस्यु नकाले ऐआढोवने, “गुरु ज्यू, उद्दार डोटौ नाल्ट ङा नै ढान्या ताहौ?”

ओटन नकानेले ऐनेढोव, “प्रभु येशु ख्रीस्टतं बिस्वास ढोते, नङ उद्दार डोएना ओटन नजाहानयाङै बै।” नकानेले ओलजन सनर आझिमल लिज्यान्याङ सोगलैजन प्रभुल बचन नेसठटौ। तब रिउला नकाई बेला ओले नकानेजन लाङस्यु घाऊ आचेईस्यौने। ओटन ओलं सनर आजाहानयाङै ओचोएटै बप्तिस्मा राहोनौ। नकाल छिन्ट पावल सनर सिलासनेजन झिमल हिनस्यु नकानेजन ज्यान्या रांयोव, ओटन परमेस्वरतं बिस्वास रांढोव ऐलेन्या छेनत खुशी ताइस्यु आमि सोगलै जाहानयाङस ना आनन्दै ताइवाङ।

तर तयोअका छिम्क छकाल्या ताहापाइनाई सहरला रोमी हाकिमयाङै सिपाइयाङजन ईका आदेस यांस्यु रांपरिङौ, “ना नकानेजन राइचिते।”

तब झ्यालखानाला पहरादारले पावलजन ईका छेन आसथटौ, “सहरला हाकिमयाङै झेनजन राइन्या आदेस रायांयिउ। नैताइस्यु आब पलिईस्यु शान्तिसं हिन्चिन्ते।”

तर पावलले शासकयाङजन ऐआढोवाङ, “घोन रोमी नागरिकजन दोसी जै माठहराइस्यु नकाङै रुयाङल हार्मै रातुप्चिऊ, ओटन झ्यालखानाल बै झोअदुचिरा, ओटन आब घेनजन गोप्यल पलिटौ रोअरा? ईका ताहौ माढुदुऊदी। रोमी अढिकारीयाङ रांईज ग्यारांरत्या ओटन घेनजन पलिईस्यु ग्यालाङचिरत्या।” ना सिपाइयाङै रोमी हाकिमयाङजन आछेन रापानस्यौ। नकाने ता रोमी नागरिक रैस ऐलेन्या थएस्यु नकाङ छ्याएवाङ। नकाङ पावल सनर सिलास ल्योङ रा:स्यु छेमा नीवाङ, ओटन नकानेजन बाहेर रालाङौ ओटन सहर राइस्यु हिन्चिन्ते लेस्यु बिन्ति रांढोव। नकाने कैदलन पलिईस्यु लिडियाल झिमल हिनौने, ओटन बिस्वासी भाईयाङ सकाए डोएसिस्यु नकाङजन उत्साह यांस्यु बिदा ताहौने।

Source notes (2)
  1. Footnote सामोथ्राकेल अर्थ टापु
  2. Cross-reference १राजा १८:१७

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.