Sheshi Kham
प्रेरित 1
पबित्र आत्माल बाचा
ङानिज्युन्या थियोफिलस, ङामि पहेला किटापल ङा नका सोगल छेनयाङ बारेल सरस्युलेङा। जो येशुले आकाम सुरु आढान्या बेलाकन आढान्या सनर आह्युउन्या लेऊ1 ओलजै आछेलन्या प्रेरितयाङजन येशुले पबित्र आत्माङन आग्या योंवरा पाइना, ओलं स्वर्गत छेन्स्यु आलाङसिऊ छिम समनका छेन ईका किटापल सरसिज्याया। येशुले ओल दुख आभुगिउ छिन्ट, भ्याई मागनिदुसिन्या प्रमानयाङ नकाङै हाकै ओले ओलजन जै जिङदा साबित आजाटौ। चालिस दिन समन तबर पाला नकाङल्योङ रंनौ, ओटन परमेस्वरलं राज्यल बारेल नकाङजन आपानस्योवाङ। नकाङसं ज्योङा लेस्यु राचुङौक येशुले नकाङजन ऐटाइन्या आपरिमवाङ, “जे यरुशलेमङन कान्देए ताहिनच्यो, तर बौले आढान्या बाचाल यमवुईचिते। ईका बारेङन जे ङाल्योङन थएस्युई लेच्या।2 दानाङभन्या यहुन्नाले ता रीले बप्तिस्मा आयोव तर आबका थोरै दिनक पबित्र आत्माङन जे बप्तिस्मा डोएच्या।”3
येशुजन स्वर्गदेए लाङसिऊ
नैताइस्यु जब प्रेरितयाङ दुउसिवाङ, तब नकाङै येशुजन रांगिनौ, “औ प्रभु, नैति नङ ईकाइ बेला इस्राएल राज्यजन फरि जाएन्यालेया?”
येशुले नकाङजन ऐआढोवाङ, “नका बेला या नकाछिम सनन्या बौले आ अढिकारङन आटुकिन्या समायजन सनन्याल काम जेमि माङडी। तर पबित्र आत्मा जेल्योङ रायापाइनाई जे सक्ति डोएन्यालेच्या,4 ओटन जे यरुशलेमल, ओटन सोगलै यहूदियाल, ओटन सामरीयाल सनर पिरथ्बील आवङ समन ङा साची ताइन्यालेच्या।” ईका पान्वापाइना, नका ओयाङै रांखिमज्याऔ रांखिमज्याऔकै स्वर्गदेए छेन्सिऊ, ओटन बादलल ओलं नकाङल नजरतन माऔ।5 जब नका हिनौ, ओटन बै नकाङल नजर नमदेए लेऊ, तब पालन्या क्वा क्वाएसिन्या नेंलोअ रुनें झुकाउन्या नकाङ ल्योङ रा:स्यु च्याङौने। ओटन ऐलेऊ तअसिऊने, “औ गालीलला रुयाङ, दानाङ नमदेए खिमस्युकने च्याङज्याच्यो? नकाई येशु, जो जेलेऊकन्ज स्वर्गदेए हिनौ, आकअ जोमनलेस्यु जे ओजन स्वर्गदेए आहिनन्या जेरङचिऊ, नैलेस्युजै ओ फरि रांया।”
यहूदाल उत्तराधिकार
मत्ती २७:३-१०
तब प्रेरितयाङ जैतुन ऐराढान्या डान्डालन यरुशलेम वोल्वाङ। यरुशलेम सहरङन नका डान्डा छ्योअछ्योअ तकिलोमिटर याए लोए लेऊ। सहर भितरलं पसिरा पाइना नकाङ टङटालत रा:चुङन्या कोठालं वूम्वाङ। नकाङ पत्रुस, यहुन्ना, याकूब, अन्द्रियास, फिलिप सनर थोमा बारथोलोमाइ ओटन मत्ती, अल्फयसलं ज़ा याकूब सनर बअचासोसं बिस्वास ढान्या सिमोन सनर याकूबल ज़ा यहूदा लेवाङ।6
ख्वाए मेएमाङ सनर येशुल आमा मरियम सनर ओलं भाईयाङ सकाए प्रेरितयाङ सोगलै तोलोअ यिङला ताइस्यु लगातार प्रार्थना ढाज्यावाङ।
नका दिनल भाईयाङल खार्ल पत्रुस च्याङौ ओटन (ईका रुयाङल बगाल छ्योअछ्योअ तसय बिस लेवाङ), ओटन ऐआढोवाङ, “ऐ बिस्वासी भाई बैनाङ, पबित्रशास्त्रलं बचन पुरा ताहौ परिया, जो सत्य बचन येशुजन कोलोअन्याङल अगवा यहूदाल बारेङन दाऊदल याह्लन हाकन्जै पबित्र आत्माले छ्योङस्यु लेऊ।7 दानाङभन्या यहूदाल गनिइ गेसकाए ताइस्यु लेऊ। ओटन आकाई सेवाल नकाले बठा डोएस्यु लेऊ।”
नका यहूदाले कैफट ढास्यु आकमाइन्या रुप्याले तोलोअ येङ आलङौ, ओटन उभिन्ड्या ताइस्यु तेहौ ओटन आभन्दिउ पाकौ, ओटन नकाल सोगलै आटअ भन्दिउ सोगलै पलिहौ।8 ईका छेन यरुशलेमला चुङन्याङ सोगलैजन थाह ताहौ। नका येङल मिन नकाङै राभासाल आखेल्दाल नाएसिऊ अथाबा जील खेए।
“दानाङभन्या पत्रुसले ऐलेऊ, भजनसङग्रहलं किटापल सरसिज्याया,9 ‘नकाल बाई पो खालि ग्याताइत्या ओटन आचुङन्या पोल काङ्काई तालरत्या ओटन नकाल पदाधिकार छुट्टैले ग्यालाङौत्या।’ जोमनलेस्यु गे प्रभु येशु गेखार्ल लेऊ गे ओलं साचील हिसापत गेसकाए बोलोङ ताहौपरिया, ओ नकाङ मध्यलन तोलोअ ताहौ परिया, जो गे बगालल ना पुरा समाय गेसं लेऊ, प्रभु येशु गेसकाए आबारिऊ बेलाकन सुरु ताइस्यु जब यहुन्नाले बप्तिस्मा सनर आमि चान्याथाई प्रचार आढोव, जो पुनरुत्थान समन जब येशु गेल्यौकन स्वर्गदेए लाङसिऊ।”
नकाङै नेंलोअ रु सच्यानौ जो बारसाबास ऐराढान्या योसेफ, जोल मछ्युका मिन युस्तस लेऊ, ओटन मतियासलं मिन प्रस्ताब आढोव। नकाङै ऐलेस्यु प्रार्थना रांढोव, “सोगलै रुयाङल यिङला छेन सनन्या प्रभु, ईका नेंलोअ मध्य काङ्काजन छेल्स्यु नल्नु ना गेजन थनस्यासिन्ते, ओटन ना ईका सेवा सनर प्रेरितल कामल पसिऊ ग्याढुदुऊत्या, जो सेवाङन यहूदा भत्किस्यु आपोलै सिऊ।” ओटन नकाङै ना नेंलोअनेंल खार्ल चिठ्ठा राझोकौ, ओटन मतियासलं मिनत परिऊ, ओटन एघार प्रेरितयाङस नका बै गनिसिऊ।
Source notes (9)
- Cross-reference लूका १:१-४
- Cross-reference लूका २४:४९
- Cross-reference मत्ती ३:११; मर्कुस १:८; लूका ३:१६; यहुन्ना १:३३
- Cross-reference मत्ती २८:१९; मर्कुस १६:१५; लूका २४:४७-४८
- Cross-reference मर्कुस १६:१९; लूका २४:५०-५१
- Cross-reference मत्ती १०:२-४; मर्कुस ३:१६-१९; लूका ६:१४-१६
- Cross-reference भजनसङ्ग्रह ४१:९
- Cross-reference मत्ती २७:३-७
- Cross-reference भजनसङ्ग्रह ६९:२५; १०९:८
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.