Tiit 2

1Bơơi akóón, phaai praaq nôôq rau nek pâng dhalam palơq rau pató pachóóm liêm kre. 2Phaai bhơơl pahêêl nôôq padruuih yaal tuôi phaai pakala ađêi, liêm charnap, n'nal mơ garđơq, liêm kre kalóóng lóóm huuiq, kalóóng lóóm tanhơr, lơq kalóóng rau jruôn parngau. 3Kung kơi achêk, phaai bhơơl pahêêl nôôq pađiil yaal tuôi pakah rau đaang bhi chap kalóóng kơi praaq têêng, kah praaq tamôôp môôiq pâng têêng xól đóng buôh, bơơi phaai nek manưih pató pachóóm rau liêm kre, 4buôn đóng piđó ve chóóm pachóóm kayua nôôq pađiil parkan val kơi nôôq manưih nh'nhơr kayiik, nh'nhơr akóón, 5n'nal mơ garđơq, tabah sek, taraang karaang gamang tarnêêng đong lơq huuiq xâng kayiik ađêi, buôn Paraaq ưng Yaang Pleng yươq bâân praaq tamôôp. 6Makơi ađek, akóón phaai bhơơl pachóóm nôôq n'dhóm kamór phaai n'nal mơ garđơq, 7xók pakah chênh akóón kala kơi m'beq xamil leq nôôq tarnêêng liêm kalóóng dyóp rauriq, paraaq tarnêêng dhalam, moor charnap kalóóng tarnêêng pató pachóóm, 8palơq taruuih liêm pâng dhalam yươq chóóm bâân trêh teng, buôn dhơ dhangaai tââq kabhuh jaklâk jơl phaai bâân kachiit mat taai yươq ve rau n'đó môôp buôn praaq leq nôôq he. 9Phaai pachóóm nôôq têêng xól phaai huuiq bóóp kala ađêi, têêng bhuui lóóm kala kalóóng dyóp tarnêêng, hơq kah ââi bóóp, 10kah tatông papei, hơq klóóih dhiq ađek phaai pakah tabhơt đaang huuiq xâng, đóng kalóóng dyóp kơi, piđó ve chóóm đââng lóóiq dhariêng thum đóng tarnêêng pató pachóóm leq Yaang Pleng, Chuôq Paq nôôq he. 11Taai ơơn phươk liêm ưng Yaang Pleng đóng paq jóói dyóp ngaai ơi bâân tapakah, 12ađôk dyơq pajêi pakeen nôôq he, buôn xók ơi m'peq lơơi rau kah huuiq palơq nôôq malóóch kiêng ưng hóng katiêk, nôôq he ve chóóm mamông kơi đu chagơn giit, bhơt liêm lơq bhơt lóóm kalóóng đơơi ađôk, 13dyơq xók đương rââm lóóm parââm ơơn phươk lơq rau tabhral tơk cha-iil tabah ưng Yaang Pleng bhơt yaal lơq Chuôq Paq nôôq he nek Jê-su Chuôq Paq Manưih. 14Yaang ơi pajaau chênh Ađó kala taai nôôq he buôn pók kơl nôôq he tââq dyóp rau lơt aak lơq buôn kajut sek đóng Ađó mưi dhanuôr liêm tââm, nek dhanuôr bhơt lóóm palơq tarnêêng liêm.

15Phaai pachóóm nôôq rau ađek, tabhơơl lơq klôôq paliêm palơq tabhơt kala kataai. Óóq đóng ngaai kađiq lêi akóón.