Rô-ma 15

1Bơơi nôôq he, nek manưih karơ phaai ting kajóói nôôq dhur óóch ưng manưih kah karơ, lơq kah têêng iêm lóóm ađêi. 2Ting chanak kalóóng nôôq he phaai têêng iêm lóóm manưih đan tóór ađêi taai kanóq kaniêng liêm kre, malóóm tơk tarnêêng tơq hayuur manưih achêk. 3Taai chênh tơk Chuôq Paq Manưih ơi kah têêng iêm lóóm ađêi kala. Palâh lóóiq, kơi rau ơi bâân xaraq: “Nôôq paraaq tóh taaiq ưng nôôq manưih kađiq tamôôp Ađó ơi n'toh lóóiq dhiq akóón.” 4Tââq n'nal mơ bơk rau ơi bâân xaraq lóóiq n'loom hei nek ơi bâân xaraq lóóiq taai rau pató pachóóm đóng chênh nôôq he, hơq đóng đươi rau jruôn parngau lơq đươi rau têêng tabhơơl ưng Bha-aar Yaang Pleng, nôôq he ve bâân lóóm parââm. 5Gavơh nhan Yaang Pleng ưng rau jruôn parngau lơq têêng tabhơơl đóng ơơn leq adhi anó buôn đóng ve markơi mưi lóóm kanóq palơq xóng ađêi ting kơi Jê-su Chuôq Paq Manưih, 6buôn đóng adhi anó ve chóóm markơi mưi lóóm, tââq mưi bóóp bhi haanh Yaang Pleng, nek Ama ưng Chuôq nôôq he, nek Jê-su Chuôq Paq Manưih.

7Kơi achêk, phaai pơh đơơp xóng ađêi, kung kơi Chuôq Paq Manưih ơi pơh đơơp adhi anó, buôn malóóm tơk rau cha-iil tabah ưng Yaang Pleng. 8Taai aku nhan praaq kơi Chuôq Paq Manưih ơi bâân têêng val kơi dhơn ratơơq ưng dhanuôr đơơp iêt ng'kar ơi taai paraaq dhalam ưng Yaang Pleng, buôn đóng lêi paraaq hươq ưng nôôq abhươp avuôq, 9bơơi nek buôn nôôq dhanuôr katiêk lââng bhi haanh Yaang Pleng ơi taai lóóm kayô ka-er ưng Ađó. Dhiêp kơi paraaq ơi bâân xaraq:

“Tââq ađek, akóón e đơơp chanót Ađó dhiq m'pơng nôôq dhanuôr katiêk lââng

lơq babóóch chaxuul haanh dhanóók Ađó.”

10Val ve truuih kơi ađô:

“Nôôq dhanuôr katiêk lââng, phaai bhuui marhaal palơq lơq dhanuôr Ađó.”

11Lơq val kơi ađô:

“Tabhơt nôôq dhanuôr katiêk lââng, phaai bhi haanh Chuôq;

tabhơt nôôq dhanuôr, phaai babóóch haanh Ađó.”

12Lơq Ê-saai móón kơơq dyơq:

“Riêh ưng Je-sê e yuur vaaih, nek Yaang bâân tahayuur buôn kadhâng akoq nôôq dhanuôr katiêk lââng;

Nôôq dhanuôr katiêk lââng e ve lóóm rââm dhiq Ađó.”

13Rââm Yaang Pleng ưng rau lóóm rââm têêng adhi anó bhlaai bing dyóp rau bhuui marhaal lơq yươq rauha kalóóng lóóm huuiq, buôn têêng đóng adhi anó xưa bhlaai kalóóng rau lóóm rââm đươi karơ mataai ưng Chuôq Yaang Liêm.

14Mat lââng, nhan móón adhi anó ưng aku, chênh aku kala kung bâân xâng alua leq adhi anó kơi chênh adhi anó kung bâân bing xưa rau liêm kre, taai ơi bâân buur bing dyóp tabech n'nal, lơq ve mapraan buôn bhơơl tapachóóm móón xóng ađêi. 15Bơơi aku ơi xaraq kơi nhóól lóóm đóng adhi anó bơk lơh kalóóng dhiq ađô dhiq tôôh kơi buôn móón pahei adhi anó, tââq ơơn phươk liêm ơi bâân Yaang Pleng đóng leq aku, 16buôn têêng aku nek mưi dhơn ratơơq ưng Jê-su Chuôq Paq Manưih đóng nôôq dhanuôr katiêk lââng, xók yuur têêng tarnêêng kadhâng bhanuôih đóng Taruuih Liêm ưng Yaang Pleng, hơq đóng bhanuôih ưng nôôq dhanuôr katiêk lââng ve chóóm bâân bhuui lóóm pơh đơơp, tââq bhêêl bâân sek tabah tââq Chuôq Yaang Liêm. 17Taai ađek, kalóóng Jê-su Chuôq Paq Manưih, aku ve rau pajơơr ađêi ting kơi palơq nôôq tarnêêng mađó leq Yaang Pleng. 18Taai aku e kah khin móón mak rau dhơ dharau hơq tarnêêng ađek eh rau Chuôq Paq Manưih ơi yuur têêng dhiq aku, buôn đââng tơk rau xâng bóóp ưng nôôq dhanuôr katiêk lââng tââq paraaq praaq palơq tarnêêng têêng, 19palơq praan karơ ưng nôôq mataai chrih, lơq raman chrih, palơq karơ mataai Yaang Liêm ưng Yaang Pleng — tơk mơ aku ơi truuih đuui Taruuih Liêm ưng Chuôq Paq Manưih kơi bing dyóp tââq Jê-ru-sa-leem lơq ving praang đóng tơk leq I-li-ri; 20hơq ting kơi ađek, bhiêk tabhlơng palơq malóóch kiêng truuih đuui Taruuih liêm eh rau pa-ô dhiq Chuôq Paq Manưih ơi bâân dhaloong gavơh, hơq đóng aku óóq hayuur kadhơng ganơơm dhiq bhanơn ưng manưih lââng. 21Dhơ kơi ađek, dhiêp kơi rau ơi bâân xaraq:

“Nôôq manưih kah bâân truuih đuui leq Ađó nek e lêi,

lơq nôôq manưih kah glêh xâng nek e n'nal.”

22Kơi achêk, bơk chu aku kung ơi bâân takajơq buôn tơk palơq adhi anó. 23Bơơi xók ađôk, taai kah dyơq ve dhiq kalóóng nôôq parah ađôk, hơq taai gamang karaang lóóm rââm mamââk tơk tham adhi anó tââq bơk kamó, 24đóng hayơq hơq xók bhêêl aku vôôiq kalơng tơk Têi Baan Nha, aku alua rââm, xók vôôiq kóh lalơh, lum adhi anó, lơq bâân adhi anó poor jóói tơk ađek, la laloom tââm aku bâân iêm lóóm palơq adhi anó kalóóng n'jang đươnh. 25Hayơq xók ađôk aku xók dhiq kalơng vôôiq tơk Jê-ru-sa-leem poor jóói nôôq manưih đu huuiq. 26Taai manưih Ma-xê-đoan lơq A-chaai ơi bhuui lóóm yuur têêng mưi ganhuh achêk pagoop achêk đóng nôôq manưih ngeeo ha-ul m'pơng kalóóng nôôq manưih huuiq liêm dhiq kanóón Jê-ru-sa-leem. 27Taai piđó ơi bhuui lóóm lơq piđó nek nôôq manưih manơơq nôôq manưih achêk. Ơi la nôôq dhanuôr katiêk lââng bâân ting đơơp nôôq ơơn phươk liêm ưng nôôq manưih achêk, nek piđó kung ve pâng tarnêêng têêng yaauq nôôq manưih achêk leq hót chana tarmông. 28Kơi achêk, xók ơi têêng paxong tarnêêng ađô lơq panhơm kaliim kliim pagoop ađô tơk palơq piđó, nek aku e yuur vôôiq kóh hót adhi anó buôn tơk Têi Baan Nha. 29Hơq aku n'nal kơi xók tơk palơq adhi anó, aku e tơk palơq rau bing dyóp ơơn phươk ưng Chuôq Paq Manưih.

30Mat lââng, adhi anó ơơi, tââq Chuôq nôôq he, nek Jê-su Chuôq Paq Manưih, lơq tââq lóóm nh'nhơr ưng Yaang Liêm, aku mââl nhan adhi anó chadrươh ting tarjơl palơq aku palơq nôôq paraaq gavơh nhan klóóih đóng aku malóóm leq Yaang Pleng, 31buôn aku ve chóóm bâân paq jóói lơh tââq nôôq manưih kah xâng bóóp dhiq Ju-đê, lơq buôn tarnêêng parvôôiq ưng aku đóng leq Jê-ru-sa-leem ve chóóm bâân bhuui lóóm pơh đơơp tââq nôôq manưih huuiq liêm; 32buôn đóng tââq karnóq kiêng ưng Yaang Pleng, aku ve chóóm tơk palơq adhi anó kalóóng rau bhuui marhaal, taai bâân khe khưưi nek palơq adhi anó. 33Gavơh nhan Yaang Pleng yươq rauha tơơt palơq tabhơt adhi anó. A-meen.