Katu Bible Literal Text
Pakah Đóng Lêi 9
Hayơq dhơn pleng đu xââng plong karyóól, nek aku lêi mưi beq chatur tââq pleng ơi n'tôq leq katiêk, lơq kaliêng kliêng bóng dhơuq ưng bóng luôh luông ơi bâân đóng leq ađó. Ađó lóng bóng dhơuq gluh ưng bóng luôh luông, nek gayươk tââq bóng dhơuq yuur par kơi gayươk ưng mưi bóng óih gamak, lơq mat tangêi palơq parhââm maar bâân kanam lóóiq taai tââq gayươk ưng bóng dhơuq ađô. Hayơq tââq gayươk ađek vaaih bhral kabhuh maniit amaach dhiq katiêk, lơq kataai karơ bâân đóng leq piđó thê kơi kataai karơ m'ma agót ve dhiq katiêk. Rau bâân kayua đóng piđó ađek nek piđó kah phaaq pahư bhơơi dhiq katiêk môôiq dhơ dharau bhơơi nhơk hamôôiq n'lóóng m'póóih n'đó, bơơi chapiên têêng pahư akóón manưih, nek nôôq đu kah ve kanal ưng Yaang Pleng dhiq maang ađêi. Tarnêêng bâân pajaau đóng piđó ađek nek piđó kah chóóm leng chêt palââng, dhơ kơi ađek piđó e bâân janah chanaaq kalóóng xââng kaxe, lơq ganơt janah chanaaq dhiq piđó kơi rau janah chanaaq tââq akóón agót xók ađó kap akóón manưih. Kalóóng nôôq tangêi ađek, akóón manưih e tabâân karchêt, bơơi piđó dhơ dhakơi e kah bâân lum ađó, lơq piđó e rââm kiêng bâân chêt, bơơi akan chêt nek róch changaai tââq piđó. Dyaang achak ưng kabhuh amiit amaach thê kơi axeh ravang ravưa gluh tarjơl. Dhiq akoq piđó nek rau ađek thê panơơng charnap pakơi rau palơq vaang, hayơq mat piđó nek thê mat manưih. Piđó ve xok kơi xok pađiil parkan, lơq kaniêng piđó nek thê kơi ưng sư tư. Piđó ve gróh pađơp tadhưa dhiêp kơi gróh palơq bhaxêi, lơq dhariêng nanang ưng piđó thê kơi dhariêng ưng nôôq xe axeh tarjơl, ưng bơk panong axeh xók ruul leq dhiq tarjơl. Piđó ve xóói palơq chapââr xóch makơi akóón agót, lơq praan karơ ưng piđó kalóóng nôôq xóói ađêi buôn têêng pahư akóón manưih kalóóng xââng kaxe. Piđó ve bhua dhiq piing ađêi nek abhưi môôp ưng bóng luôh luông. Achak ađó kalóóng dhariêng Hi-baaq-laai nek A-ba-đôôn, dyơq kalóóng dhariêng Hi-laap, ađó ve achak nek A-bô-li-ôôn.
Rau jarnah xarngaat đu tarnââp ơi lơh. Lêi tôôh, biêh dyơq bơơr rau jarnah xarngaat dyơq bhral dyơq tatun nôôq tarnêêng ađô.
Hayơq dhơn pleng đu chapat plong karyóól, lơq aku xâng mưi dhariêng praaq gluh tââq nôôq tagê ưng baang bhuôih palơq vaang dhiq toom mat Yaang Pleng, kayua đóng dhơn pleng đu chapat, nek chanak dyơq ve m'beq karyóól: “Phaai paloh puôn dhơn pleng biêh bâân taklooiq dhiq karuung gamak Ơ-phơ-raat.” Kơi ađek nek, puôn dhơn pleng, nek nôôq chanak ơi bâân ravang lơơi xók chênh xók, tangêi, kaxe, kamó ađek, bâân gluh paloh buôn đóng piđó ve chóóm leng chêt mưi phơn pe akóón manưih. Sôôq linh dhââng axeh nek bơơr hariêng triêuq. Aku ơi xâng parbơk ưng piđó kơi ađek. Lơq kalóóng pakah lêi, aku ơi lêi kabhuh axeh lơq nôôq đu dhââng dhiq piđó pakơi ađô ve gróh pađơp tadhưa bhrôông ngót, lơq parhóm taviêng ngót, lơq parhóm rââk ưng lưưu hunh. Akoq nôôq akóón axeh ađô nek thê kơi akoq sư tư, tââq bóóp piđó próih pagluh óih, gayươk lơq lưưu hunh. Mưi phơn pe akóón manưih bâân taleng chêt taai tââq pe bhrê hư ađô, tââq óih, gayươk, lơq lưưu hunh próih gluh tââq bóóp piđó. Tââq praan karơ ưng kabhuh axeh nek tââq bóóp piđó lơq dhiq xóói piđó, taai xóói piđó pakơi xóói kaxênh ve akoq, lơq tââq ađek piđó têêng tabhrê akóón manưih. Phơn dyơq lóóiq ưng akóón manưih, nek nôôq đu yươq ơi bâân leng chêt tââq nôôq bhrê hư ađô, ơi kah klôôq karnóq lóóm lơt leq nôôq tarnêêng têêng ưng têi ađêi, buôn đóng piđó e kah bhuôih kakoh abhưi palơq nôôq yaang kabhêi palơq vaang, baak, kóng, dhơl, lơq n'lóóng, nek nôôq rau kah ve chóóm lalêi, hamôôiq tameng xâng, môôiq vôôiq veq. Piđó kung kah klôôq lóóm karnóq lơt leq nôôq matu leng manưih, têêng abhô, têêng tapiing kah paprô, môôiq tatông papei ưng ađêi.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.