Phi-liip 3

1Tatun kiêt, nhan móón adhi anó ưng aku, phaai bhuui marhaal kalóóng Chuôq. Ting kơi palơq aku, yươq rau nhok nhói rauriq xók xaraq lóóiq palơq nôôq rau ađô leq adhi anó, taai nek rau yươq rauha koom đóng adhi anó. 2Phaai hêch lêi kabhuh anuq, phaai hêch lêi nôôq manưih têêng tarnêêng môôp lơt, phaai hêch lêi pheep iêt ng'kar galơơk. 3Taai nôôq he đơơp pheep iêt ng'kar lalua, hơq nek nôôq manưih bhuôih haanh palơq Yaang Liêm ưng Yaang Pleng, tarhơơnh kalóóng Jê-su Chuôq Paq Manưih, lơq yươq rââm ganơơm dhiq manưih ti. 4Dhơ nek aku patơk mơ ve rau taai rââm ganơơm dhiq ng'kar m'bech. La ngaai lââng kanóq ve rau taai buôn ganơơm dhiq ng'kar m'bech, nek aku dyơq ve bơk lơh: 5aku đơơp têêng iêt ng'kar xók tangêi takóól, mađó dhanuôr I-sơ-ra-êên, kabhuh Bêên-ja-miin, manưih Hê-bơ-rơ, akóón ưng manưih Hê-bơ-rơ, leq gani, nek manưih Pha-ri-si; 6leq lóóm jêi tarang nek kóóp leng kabhuh akóón dhơn Chuôq; leq rau bhơt liêm ting gani hơq bâân đóók nek yươq dhiq trêh jươm. 7Dhơ kơi ađek, dhơ dharau mak rau biêh nek malơơi ting kơi palơq aku, nek ơi taai Chuôq Paq Manưih, aku ơi lêi piđó nek kah malơơi. 8Bơơi hayơq lơh achêk dyơq, aku patơk mơ lêi tabhơt maar nek kah malơơi ơi taai kiiq liêm lơh bhơt ưng rau đơơp n'nal leq Jê-su Chuôq Paq Manưih, Chuôq ưng aku, taai Ađó hơq aku ơi đơơp bil tabhơt, alua, aku lêi piđó kơi xanaak nh'xók, hơq đóng aku bâân Chuôq Paq Manưih 9lơq bâân chêk-lêi kalóóng Ađó, eh rau taai ve rau bhơt liêm dhiq achak araang ađêi tââq gani bơơi nek rau bhơt liêm đươi lóóm huuiq dhiq Chuôq Paq Manưih, hơq nek rau bhơt liêm tơk tââq Yaang Pleng liêm tââm dhiq lóóm huuiq — 10buôn đơơp n'nal Ađó lơq mataai karơ rau mamông lóóiq ưng Ađó kung palơq marau tarnêêng kalóóng nôôq kadhaap jarnah ưng Ađó, xók bâân đââng tơk dhiq markơi palơq rau chêt ưng Ađó, 11dhơ palơq n'đó kơi kiq ađek, nek aku ve chóóm bâân tơk rau mamông lóóiq tââq kan chêt. 12Achêk eh rau nek aku ơi bâân pei kaliim ơi, hamôôiq ve bâân bhơt liêm ơi, bơơi aku xók viêng tapun ng'kơi đóng ađêi ve chóóm jeng pei kaliim hơq ơi taai ađek, aku kung ơi bâân Jê-su Chuôq Paq Manưih pei jeng. 13Nhan móón adhi anó, aku kah móón nek kala achak ađêi ơi bâân jeng. Bơơi aku bhiêk têêng mưi rau: xók havil vaq nôôq rau hót hóng hơq chavươh tơk nôôq rau hót lóóm, 14malóóm tơk kanóq têêng, aku xók viêng tapun đóng bâân kaliim haanh leq rau dhaloong tââq dhiq pleng ưng Yaang Pleng kalóóng Jê-su Chuôq Paq Manưih. 15Kơi achêk hayơq, tabhơt nôôq ngaai gamak taha maar kơng phaai kanóq kơi achêk, dyơq kơi la ve rau lââng adhi anó kanóq kơi lalêi kiêt, Yaang Pleng kung e pakah rau ađek leq adhi anó. 16Dhơ kơi ađek, nôôq he ơi bâân tơk n'đó mơ nek hayơq jađaang vôôiq ting mơ ađek.

17Nhan móón adhi anó, phaai val kơi nôôq manưih ting đuui aku, lơq phaai chamet lêi nôôq manưih xók mamông kalóóng dhanang achêk, ting kơi xamil ngil adhi anó lêi dhiq nôôq yi. 18Taai ve bơk ngaai, nek nôôq manưih hơq aku ơi đóók praaq palơq adhi anó, bơơi xók ađôk aku patơk mơ phaai nhiim hơq praaq, piđó dyơq mamông kơi manưih brau makhich palơq m'baang chatông ưng Chuôq Paq Manưih, 19Leq xariêq ưng nôôq manưih ađek nek chêt bil, chuôq ưng piđó nek luônh palung, lơq cha-iil tabah ưng piđó dhiq kalóóng tarnêêng têêng đaang kachiit mat ưng piđó, hơq nek nôôq manưih chapiên kanóq tơk nôôq tarnêêng hóng katiêk. 20Bơơi taai tanơơt pa-at manưih dhanuôr ưng nôôq he ơi ve dhiq pleng, hơq tââq dhiq ađek nôôq he puih lóóm rââm đương Yaang Trôông Paq, nek Chuôq, hơq Jê-su Chuôq Paq Manưih, 21nek Yaang e tavaaih paxar achak araang êêp katưưiq ưng nôôq he val xar markơi palơq achak araang cha-iil tabah ưng Ađó, ting kơi rau matêêng ưng karơ mataai Ađó buôn pajaau dyóp rau leq ađêi.