Skip to content
BibleKenya

Katu Bible Literal Text

Ma-thi-ơ 19

Tarnêêng yuur vaaih nek xók Chuôq Jê-su ơi praaq parluch nôôq paraaq achêk, Ađó xooq tââq Ga-li-lê lơq vôôiq tơk parah Ju-đê tơơt hót tôôh karuung Jô-đen. Nôôq tanóói dhanuôr ganơr ting Ađó lơq Ađó payươh ka-ai đóng piđó dhiq ađek.

Nôôq manưih Pha-ri-si tơk pađan Ađó, klêêu Ađó lơq tamóh: “Ve kre kah đóng pheep mưi chanak manưih padruuih tarlơơi lơq kađiêl ađêi ơi taai nek dhơ dharau?” Xók ââi bóóp, Ađó praaq: “Nôôq pe kah đok kơi Yaang tavaaih tââq bhêêl tââp tarnââp ơi têêng tavaaih piđó, mưi chanak padruuih lơq mưi chanak pađiil, lơq praaq: ‘Ơi taai achêk, manưih padruuih e tââi tââq akonh lơq akan hơq panjoop madhiq maleq palơq kađiêl ađêi, lơq miq bơơr e nek mưi ng'kar m'bech?’ Tơk mơ, piđó kah dyơq nek bơơr, bơơi nek mưi ng'kar m'bech. Taai ađek, rau hơq Yaang Pleng ơi panjoop lóóiq, nek akóón manưih kah chóóm têêng tablah.” Piđó tamóh palơq Ađó: “Kơi achêk, hau kơi Môôi-se ơi truuih pachóóm phaai pađơơp tala bha-aar tarlơơi hayơq ve lơơi kađiêl?” Ađó móón piđó kơi ađô: “Taai rau nhâng lóóm ưng nôôq pe hơq Môôi-se ơi đóng pheep nôôq pe tarlơơi kađiêl ađêi, bơơi tââq tarnââp, rau ađek eh rau nek kơi achêk. Bơơi Aku praaq palơq nôôq pe kơi chapiên ơi matu têêng tapiing, ngaai manưih tarlơơi kađiêl ađêi hayơq nhan manưih lââng nek matu lơt têêng tapiing; đu nhan manưih ơi bâân tarlơơi kung matu lơt têêng tapiing.” Nôôq môôn-đô móón palơq Ađó: “La rau chiên ưng manưih padruuih nek palơq kađiêl ađêi hơq kơi achêk, nek n'jang kah pei kađiêl.” Bơơi Ađó praaq palơq piđó: “Eh rau dyóp ngaai kung ve chóóm đơơp paraaq ađô, bơơi nek pakoom đóng nôôq ngaai hơq rau achêk bâân tađóng. Ơi ve nôôq manưih tablươt, nek nôôq manưih bâân n'niên tââq kalóóng luônh akan ơi kơi achêk; ve nôôq manưih tablươt hơq bâân palââng têêng tablươt; lơq ve nôôq manưih tablươt nek nôôq manưih tư blươt chênh ađêi ơi taai katiêk pleng. Ngaai ve đuôh pei đơơp paraaq ađô, manưih ađek nek pei đơơp.”

Tââq ađek, nôôq akóón paniên katưưiq bâân đââng tơk leq Ađó buôn Ađó kadhâng têi dhiq piđó lơq gavơh nhan, bơơi nôôq môôn-đô trêh teng piđó. Dhơ kơi ađek, Chuôq Jê-su praaq: “Phaai lơơi đóng akóón paniên tơk palơq thêi, lơq óóq châq kajơq piđó, ơi katiêk pleng nek ưng nôôq ngaai kơi achêk.” Xong xók lơơi têi dhiq piđó, Ađó tââq ađek yuur vôôiq.

Lơq lêi tôôh, mưi chanak tôôh xók tơk pađan Ađó, ơi tamóh: “Thêi ơơi, harau tarnêêng liêm aku phaai têêng buôn aku ve bâân parmông tơk nh'chró?” Hayơq Chuôq praaq palơq ađó: “Hau amei tamóh aku leq tarnêêng liêm? Chapiên mưi Yaang nek bhơt liêm, hayơq la amei kiêng mót kalóóng parmông, phaai jư nôôq gani pachóóm.” Manưih ađek móón palơq Ađó: “Nôôq n'đó dhơơm gani pachóóm?” Hayơq Chuôq Jê-su ââi: “Óóq leng manưih, óóq têêng matu tapiing, óóq tatông papei, óóq truuih móón chachââr, Phaai bhi nh'nhơr akonh lơq akan, lơq nh'nhơr manưih đan tóór ưng amei kơi ađêi kala.” Padruuih n'dhóm achêk móón palơq Chuôq: “Aku ơi xâng jư tabhơt nôôq rau achêk. Hau rau hayơq aku thiêuq dyơq?” Chuôq Jê-su praaq palơq ađó: “La amei kiêng bâân liêm dyóp, nek vôôiq, chô baan nôôq rau ađêi ve hayơq poor đóng leq manưih ngeeo, nek amei e ve jơơng drươp dhiq pleng; lơq nek ting aku mơq!.” Bơơi xók xâng praaq achêk xong, padruuih n'dhóm ơi yuur xooq taai ranguôq rangóót, ơi ađó ađek biêh xók ve lóng bơk drươp karvaan.

Xók achêk, Chuôq Jê-su praaq palơq nôôq môôn-đô ađêi: “Alua, thêi praaq palơq adhi anó kơi ađô: manưih karvaan e mót kalóóng katiêk pleng mưi kơi kadhaap bhlơng. Hơq thêi vil praaq palơq adhi anó, lơơi akóón adhah kamel paliên hót bóng jarum nek rau buôn khe lơh marchơng palơq manưih karvaan mót kalóóng katiêk ưng Yaang Pleng.” Xók achêk, xong xók xâng kơi achêk, nôôq môôn-đô lóng chrih xâng, móón: “Kơi achêk nek ngaai ve chóóm bâân paq?” Padrêh chamet lêi piđó, Chuôq Jê-su praaq palơq piđó: “Palơq akóón manưih, tarnêêng ađô nek kah chóóm, bơơi palơq Yaang Pleng, dyóp tarnêêng nek ve chóóm.” Bhêêl ađek, buôn ââi lóóiq, Phi-e-rơ móón palơq Ađó: “Thêi lêi nek, nôôq yi ơi lơơi dyóp rau lơq ting thêi. Kơi achêk nek e ve hau rau pakoom đóng nôôq yi?” Hayơq Chuôq Jê-su praaq palơq piđó: “Alua, thêi praaq palơq adhi anó, kơi adhi anó, hơq nek nôôq manưih ơi ting thêi, kalóóng tangêi vaaih tame, xók Akóón Manưih tơơt dhiq tanơơt brương cha-iil ađêi, nek adhi anó kung e tơơt dhiq majêt bơơr tanơơt xêi xanêi majêt bơơr kabhuh I-sơ-ra-êên. Ting chanak, hơq nek ngaai ơi lơơi đong xaang, adhi anó, miing móóq, akonh, akan, kađiêl, akóón môôiq katiêk hare ơi taai dhanóók ưng thêi, e đơơp bơk mưi hariêng chu lơq bâân đơơp parmông tơk nh'chró. Bơơi ve bơk ngaai laloom e val xar tatun, lơq nôôq manưih tatun e val xar laloom.

Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.