Katu Bible Literal Text
Ma-thi-ơ 17
Chapat tangêi tatun, Chuôq Jê-su đââng Phi-e-rơ, palơq Ja-kơ lơq Jang, adhi ađó, hayơq Ađó đââng n'tua piđó palơq xóng ađêi đơk tơk mưi kachruôch bôôl yaal. Hót nguôi ưng Ađó bâân vaaih xar toom mat piđó, lơq mat Ađó taklaaq cha-iil kơi mat tangêi, dyơq aau Ađó val xar tabah chalóng kơi taklaaq brương. Lơq lêi tôôh, Môôi-se palơq Ê-li tabhral toom piđó, praaq chiên palơq Ađó. Xók achêk, xók pơơh paraaq, Phi-e-rơ móón palơq Chuôq Jê-su: “Kakoh Chuôq, alua nek liêm đóng nôôq he buôn tơơt dhiq ađô. La Amei kiêng, aku e kadhơng dhiq ađô pe beq pơơq — mưi đóng Amei, mưi đóng Môôi-se lơq mưi đóng Ê-li.” Xók bhêêl ađó bhiêk dyơq xók papraaq nek lêi tôôh, mưi garboq dhaluk brương braang dhuum pađơp piđó, lơq lêi ađô, mưi dhariêng praaq tư tââq garboq dhaluk, kơi ađô: “Ađô nek Akóón nh'nhơr tââm ưng Aku, hơq Aku lóng liêm lóóm dhiq Akóón. Phaai xâng bóóp Akóón achêk.” Xók ơi xâng, nôôq môôn-đô kalơm bharóp mat lơq lóng braaih kakhin bhlơng. Hayơq Chuôq Jê-su, xong xók vôôiq pađan lơq kadhâng leq piđó, hơq praaq: “Nek yuur dyương lơq óóq braaih kakhin.” Bơơi xók yuur chaling mat ađêi, piđó kah lêi ngaai chapiên mưi Chuôq Jê-su giêl.
Bhêêl xók piđó tââq dhiq bôôl vôôiq dhaluônh, Chuôq Jê-su praaq parâng leq piđó kơi ađô: “Óóq truuih lóóiq rau ơi lêi palơq ngaai đóng tơk xók Akóón Manưih ơi tââq akan chêt mamông lóóiq.” Nôôq môôn-đô achêk tamóh Ađó, kơi ađô: “Kơi achêk hau kơi nôôq manưih pachóóm gani móón nek Ê-li kơng phaai bhral laloom?” Xók achêk, xók ââi bóóp, Ađó praaq: “Dhơ Ê-li phaai bhral lơq e hayuur paliêm dyóp tarnêêng. Bơơi thêi praaq palơq adhi anó kơi Ê-li nek ơi abhral, lơq piđó ơi kah đơơp n'nal ađó. Klóóih dhiq ađek, piđó têêng dyóp kơi rau piđó kiêng palơq ađó. Kung mưi kơi achêk, Akóón Manưih ravang phaai đơơp jarnah tââq piđó.” Bhêêl ađek, nôôq môôn-đô n'nal kơi Ađó praaq palơq piđó leq Jang Bap-tiit.
Xók ơi bhral palơq tanóói dhanuôr, mưi ngaai manưih padruuih ơi tơk đan Ađó, chakoh tarkól dhiq toom Ađó lơq móón: “Chuôq ơơi, nhan kayô ka-er akóón padruuih aku, taai ađó ka-ai kah praang goq lơq bâân ngơn bhlơng, ơi ađó buôn kalơm leq óih, lơq buôn kalơm leq đơơk. Aku ơi đââng ađó tơk leq nôôq môôn-đô ưng Amei, bơơi piđó kah ve chóóm đuôh payươh đóng ađó.” Xók achêk, xók ââi lóóiq, Chuôq Jê-su praaq: “Dhong nooi kah huuiq lơq chêt bil tôôh, aku e tơơt palơq nôôq pe patơk mơ bhêêl? E đơơp jruôn nôôq pe patơk mơ đươnh? Nek đââng akóón paniên tơk leq ađô đóng aku.” Chuôq Jê-su trêh teng ađó, nek abhưi yuur xooq tââq akóón paniên, lơq ađó bâân yươh tââq bhêêl ađek.
Tââq ađek, xong xók tơk pađan n'tua palơq Chuôq Jê-su, nôôq môôn-đô tamóh: “Ơi taai harau chóóm nôôq yi kah đuôh paxooq abhưi gluh?” Hayơq Ađó praaq palơq piđó: “Taai lóóm huuiq kuôq m'bưưiq ưng adhi anó. Ơi alua, Aku praaq palơq adhi anó, la adhi anó ve lóóm huuiq kơi mưi kaliêng habhêi, nek adhi anó e kayua đóng bôôl ađô: ‘Phaai tââi tââq dham ađô leq dham tôôh,’ nek ađó e tââi vôôiq, lơq e yươq ve rau nek kah chóóm palơq adhi anó.” (Bơơi rau abhưi ađô kah đuôh paxooq la kah palơq gavơh nhan lơq điêng chacha.)
Xók achêk, bhêêl xók piđó nhoom xóng piđó lóóiq dhiq Ga-li-lê, Chuôq Jê-su praaq palơq piđó: “Akóón Manưih ravang bâân tapajaau leq têi palââng, lơq palââng e leng Ađó vóq, hayơq mót tangêi thưưq pe, Ađó e bâân têêng mamông lóóiq.” Nôôq môôn-đô val xar lóng ranguôq bhlơng.
Bhêêl achêk, xók piđó ơi vôôiq tơk kanóón Ka-bê-na-um, nôôq manưih pagoop jêên đong bhanuôih tơk palơq Phi-e-rơ lơq tamóh: “Thêi ưng amei kah goop jêên leq đong bhanuôih alua?” Ađó ââi: “Ve.” Lơq bhêêl ơi mót kalóóng đong, Chuôq Jê-su ơi yuur paraaq palơq ađó laloom, kơi ađô: “Si-môôn, ng'kơi amei kanóq? Nôôq bhua dhiq katiêk pei jêên môôiq pagoop ngaai tââq? Tââq akóón anaaq piđó môôiq tââq manưih nguôi?” Xong xók ââi: “Tââq manưih nguôi”, Chuôq Jê-su praaq palơq ađó: “Kơi achêk akóón anaaq nek bâân yươh pagoop. Bơơi buôn nôôq he yươq têêng kanóq lơt đóng palââng, nek bhêêl vôôiq leq taxiiq, amei m'peq rabeh lơq hayuur ađó kadhóóng chóót laloom. Xong xók vaaq bóóp ađó, amei e lêi mưi siêk-lơ. Bâân pei jêên ađek hayơq, nek pagoop leq piđó klóh mơ phơn ưng thêi lơq amei.”
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.