Lu-ka 8

1Tarnêêng vaaih xók ganah drươh xong ađek, Ađó dyơq bhiêk yuur vôôiq leq kanóón ađô, bhươl tôôh, truuih pachóóm kung kơi truuih taruuih liêm leq katiêk ưng Yaang Pleng, lơq majêt bơơr sưưq-đô ting vôôiq palơq Ađó, 2lơq nôôq pađiil tôôh nek nôôq manưih ơi bâân payươh tââq yaang môôp lơq ka-ai dreh: Ma-ri, ađó bâân đóók nek Ma-đơ-leen, đu tââq ađó ve tapól panong abhưi môôp ơi gluh xooq; 3Jaan-nơ, kađiêl Chu-xa, kadhâng karvaan ưng Hê-rôôt; Xu-xa-nơ; lơq bơk pađiil lââng, piđó têêng yaauq nôôq manưih ưng Ađó palơq nôôq drươp karvaan piđó ve.

4Xók tanóói dhanuôr manưih bơk krong madhiq tââq dyóp kanóón pơh tơk palơq Chuôq Jê-su, Ađó truuih pachóóm palơq babi: 5“Mưi nak manưih vươk m'ma vôôiq gluh đóng vươk m'ma ưng ađêi, lơq bhêêl xók ađó ađek vươk, maphơn kaliêng m'ma ruuh tóór kalơng, bâân tađâq raal dyung lơq achim pleng chóh luch nôôq m'ma ađek. 6Nôôq kaliêng lââng ruuh dhiq dhơl, hayơq xók yuur chat, maphơn ađek avet rang, taai kah vaaih katiêk dyêp. 7Maphơn lââng dyơq ruuh leq m'pơng tââm axông, hayơq xók yuur chat, nek xông têêng đóng ađó óóm. 8Lơq maphơn nôôq kaliêng lââng ruuh dhalam dhiq katiêk liêm, hayơq xók chat gamak, ađó bóóng pale bơk lơh mưi hariêng chu.” Xong xók praaq nôôq paraaq achêk, Ađó praaq pakarơ: “Ngaai ve katór đóng xâng, nek xâng.”

9Tatun ađek, nôôq môôn-đô ưng Ađó tamóh Ađó: “Babi achêk nek hau kơi?” 10Ađó ââi: “Adhi anó ơi bâân đóng ơơn n'nal leq nôôq rau takadrêi leq katiêk ưng Yaang Pleng, bơơi palơq manưih lââng nek pei babi, đóng ‘xók lêi, piđó kah lêi, lơq xók xâng, piđó kah n'nal.’ 11Babi achêk nek kơi ađô: Kaliêng m'ma nek paraaq ưng Yaang Pleng. 12Nôôq dham tóór kalơng nek nôôq manưih ơi xâng, bơơi tatun ađek abhưi tơk lơq pei drooih paraaq tââq lóóm piđó hayơq đóng piđó kah huuiq đóng bâân paq. 13Nôôq dham dhiq dhơl nek nôôq manưih xók piđó ơi xâng, nek palơq bhuui marhaal, piđó pei đơơp paraaq. Bơơi piđó kah vaaih riêh, nek nôôq manưih chapiên huuiq mưi ganah giêl, lơq bhêêl xók hadhaap janah, nek piđó prah lơơi. 14Dyơq leq maphơn kaliêng ơi ruuh bhlưa nôôq tââm axông, hayơq dham ađô nek nôôq manưih ơi xâng, hayơq xók bhiêk vôôiq kalơng đơơi ađêi, piđó bâân têêng đóng óóm taai nôôq karaang, rau karvaan lơq sương si đơơi ađôk, lơq piđó kah chóóm taha lóóm. 15Bơơi leq nôôq phơn kaliêng m'ma dhiq katiêk liêm, ađôk nek nôôq manưih palơq lóóm taniih lơq kanóq liêm, xong xók xâng paraaq nek piđó jư tamưng lơq bâân bóóng pale kalóóng đu mưng lóóm.

16Xong xók bat dhơu, kah ngaai jróp ađó lóóiq palơq thung môôiq lơơi krum dharââng. Klóóih leq ađek, palââng lơơi ađó dhiq dyung dhơu đóng nôôq manưih bhadyaang mót ve chóóm bâân lêi brương. 17Ơi kah ve marau marâ bâân kadrêi palââp hơq e kah bâân tapakah, kung kah ve rau lalââp hơq lalua kah bâân pakah lơq pakah pagluh leq brương. 18Hayơq kơi ađek, nek chagơn leq kơi adhi anó xâng, ơi ngaai ve e bâân đóng kơơq, dyơq ngaai kah ve, patơk mơ rau ađó achêk ngóq ađêi ve kung e bâân tapei luôn tââq ađó.”

19Xók ađek amêêq lơq nôôq adhi Ađó tơk palơq Ađó, bơơi piđó kah chóóm pađan tơk Ađó ơi taai bơk manưih. 20Hayơq, tarnêêng achêk bâân móón leq Ađó: “Amêêq thêi lơq nôôq adhi ưng thêi xók ađôk dyương hót nguôi, kiêng lum thêi.” 21Bơơi xók ââi bóóp, Ađó móón palơq piđó: “Ađôk nek amêêq aku lơq adhi anó aku, nek ngaai dhơơm xâng lơq ting têêng paraaq Yaang Pleng.”

22Tarnêêng vaaih xók mưi tangêi tôôh, Ađó palơq nôôq môôn-đô ưng ađêi bhadyaang dyók leq mưi beq bhuông, lơq Ađó móón palơq piđó ađek: “Nôôq he kơng phaai vôôiq chaang atông hót tôôh.” Hayơq piđó đââng bhuông vôôiq. 23Xók piđó chông bhuông nek Ađó bêch. Tatun ađek, mưi garnhuh adhiiq gamak pruung tơk leq taxiiq atông, piđó bâân đơơk mót bing bhuông lơq ngơn bhlơng. 24Piđó tơk đan payuur Ađó, kơi ađô: “Thêi ơơi! Thêi ơơi! Nôôq he ravang chêt!” Bơơi xók Ađó yuur meh, Ađó trêh dhiiq lơq đơơk gar-uul, nek piđó parngau lóóiq lơq dyóp rau xar bha-ip. 25Ađó móón palơq piđó ađek: “Lóóm huuiq adhi anó n'dhiq?” Xók rau kakhin kapơn, piđó hêq lêi tapraaq xóng ađêi: “Xariêq thêi nek ngaai hơq thêi kayua đóng adhiiq lơq đơơk, lơq piđó phaai xâng bóóp thêi?”

26Hayơq piđó chông bhuông tơk xưưq Jê-ra-sê, nek dhiq chang gan palơq xưưq Ga-li-lê. 27Xók Ađó dyók leq kakóóng, mưi manưih tôôh tââq kanóón achêk vôôiq gluh kêch Ađó, manưih ađek bâân abhưi bóq. Ơi mưi ganah đươnh, ađó ađek kah xơp n'đóh kun aau, kung kah mamông kalóóng đong, bơơi tơơt dhiq ping xaal. 28Xók lêi Chuôq Jê-su, ađó ađek yuur lalơu, chakoh dhiq toom Chuôq lơq praaq dhariêng karơ: “Ơ, Jê-su, Akóón Yaang Pleng Bhơt Yaal, aku lơq Amei ve rau pâng kre kah? Aku gavơh Amei, nhan óóq janah aku.” 29Taai Chuôq ơi praaq parâng leq abhưi môôp gluh tââq manưih padruuih achêk. Ơi bơk chu abhưi bóq dhiq ađó, dyơq ađó biêh bâân taxiêng lóóiq palơq xaniêng lơq kanum, dhơ bâân đương jư, nek taai abhưi, dyóp xók rươt tarlêi xiêng, ađó bâân đââng leq kruung vơng. 30Xók achêk, Chuôq Jê-su tamóh ađó: “Achak amei nek hau?” Ađó ââi: “Kabhuh Linh,” taai bơk abhưi ơi bóq leq ađó ađek. 31Hayơq piđó bhiêk gavơh nhan Chuôq Jê-su đóng Ađó óóq praaq parâng đóng piđó phaai dhaluônh leq maraaih. 32Dhiq ađek ve mưi kabhuh a-ook bơk bhlơng xók cha dhiq taring bôôl, piđó nhan Chuôq đóng Ađó đóng pheep piđó bóq leq kabhuh a-ook. Lơq Chuôq đóng pheep piđó. 33Hayơq nek, xók ơi gluh tââq manưih padruuih, kabhuh abhưi bóq leq kabhuh a-ook, hayơq luch kabhuh a-ook mut haluông ting taring bôôl chrơm leq atông lơq bâân chêt haleng. 34Xong xók nôôq manưih jư a-ook lêi tarnêêng ơi tame vaaih, nek piđó mut klôôn lơq truuih lóóiq tarnêêng achêk kalóóng kanóón lơq kalóóng bhươl m'bưưiq manưih. 35Kơi ađek, manưih dhanuôr vôôiq tơk đóng lêi chiên ơi vaaih, piđó tơk dhiq Chuôq Jê-su lơq lêi manưih padruuih, đu kabhuh abhưi ơi gluh xooq, xók tơơt dhiq dyung Chuôq Jê-su, ve xơp kun aau, lơq lóóm kanóq brương, nek piđó bâân kakhin kapơn. 36Nôôq manưih ơi lêi truuih lóóiq leq piđó ng'kơi hơq manưih bâân abhưi bóq ơi bâân paq payươh. 37Tabhơt ganơr manưih kalóóng xưưq Jê-ra-sê nhan Ađó xooq tââq piđó, taai piđó bâân rau kakhin kapơn gamak xavaang. Hayơq kơi ađek, Ađó dyók leq bhuông lơq val chô. 38Manưih padruuih, đu kabhuh abhưi ơi gluh xooq, nhan gavơh Chuôq đóng tơơt palơq Chuôq, bơơi Chuôq đóng ađó chô, praaq kơi ađô: 39“Phaai val chô leq đong ưng amei lơq phaai truuih lóóiq dyóp rau tarnêêng Yaang Pleng ơi têêng leq amei.” Hayơq ađó yuur vôôiq truuih plok luch kanóón dyóp rau tarnêêng Chuôq Jê-su ơi têêng leq ađêi.

40Xók Chuôq Jê-su val chô, mưi tanóói manưih bơk pơh kêch Ađó, ơi dyóp ngaai maar đương rââm Ađó. 41Lơq lêi tôôh, mưi nak manưih vôôiq tơk, achak ưng ađó nek Jaai-ru, ađó nek manưih têêng jư lêi đong gươl. Kakoh achak dhiq dyung Chuôq Jê-su, ađó gavơh nhan Chuôq vôôiq leq đong ađó, 42taai akóón pađiil mưi giêl palơq ađó, mơ majêt bơơr tuôi, paniên pađiil xók kiêng phet. Xók Chuôq dyơq vôôiq dhiq kalơng, ganơr manưih bơk kaxiêq kajêêq xirvir Ađó.

43Ve mưi pađiil palơq ka-ai hóói ahaam ơi majêt bơơr kamó, dhơ ơi gleh luch jêên baak leq manưih payươh, hơq kah ve dhơ dhangaai chóóm payươh ka-ai đóng ađó. 44Palơq tơk pađan tââq hót hóng, akan ađek xuui leq tahaal aau ưng Ađó, lơq n'drươh, ka-ai ahaam hóói ưng akan ađek bâân pat. 45Chuôq Jê-su tamóh: “Ngaai manưih ơi xuui leq aku?” Bơơi dyóp ngaai maar dyiin, Phi-e-rơ yuur móón: “Thêi ơơi, ganơr manưih dhanuôr bơk xók xavaang praang lơq kaxiêq thêi.” 46Bơơi Chuôq Jê-su praaq: “Ve mưi nak ơi xuui leq aku, ơi aku n'nal mataai raman tââq aku ơi yuur gluh.” 47Xók achêk, xók manưih pađiil đơơp lêi kơi ađó ơi kah đuôh chóóm palââp dyơq, nek akan ađek hayer hatơq tơk lơq xong xók kakoh achak chok leq toom Chuôq, ađó truuih toom mat tabhơt manưih dhanuôr taai ng'kơi hơq ađó ơi xuui leq Chuôq lơq ađó ơi bâân yươh n'drươh nek ng'kơi. 48Chuôq praaq palơq akan ađek: “Akóón pađiil, lóóm huuiq ưng akóón ơi payươh akóón. Nek vôôiq kơi yươh rauha.”

49Xók Ađó dyơq praaq, ve manưih tââq đong ưng manưih jư lêi đong gươl tơk móón kơi ađô: “Akóón pađiil amei ơi chêt. Óóq têêng panhok thêi dyơq.” 50Bơơi xók Chuôq Jê-su xâng paraaq ađek, Chuôq praaq palơq ađó: “Óóq kakhin; phaai ve lóóm huuiq giêl nek akóón n'niên e bâân paq.” 51Xók ơi vôôiq tơk leq đong, Ađó kah đóng ngaai mót palơq Ađó, chapiên Phi-e-rơ, Jang, Ja-kơ, palơq amêêq lơq ama ưng akóón paniên. 52Dyóp ngaai maar nhiim kalau lơq tơm tadhưa taai akóón paniên, bơơi Ađó móón: “Óóq nhiim, taai akóón paniên yươq ơi chêt, hơq nek mơ bêch giêl.” 53Bơơi piđó kachang bhalưưk Ađó, taai n'nal nek akóón paniên ơi chêt. 54Bơơi xong xók kadhâng têi akóón paniên, Ađó dhaloong karơ, kơi ađô: “Akóón ơơi, nek yuur aq.” 55Ravaai ưng akóón paniên val lóóiq lơq ađó n'drươh yuur tơơt, hayơq Chuôq kayua đóng akóón paniên cha. 56Akonh akan akóón paniên hêq lêi bhlơng, bơơi Chuôq Jê-su paraaq pató piđó kah chóóm truuih palơq manưih lââng leq tarnêêng đu ơi avaaih.