Jang 9

1Hayơq xók bhêêl vôôiq kalơng, Ađó lêi mưi nak kabaang tââq bhêêl tame n'niên. 2Nôôq môôn-đô Ađó tamóh Ađó kơi ađô: “Thêi ơơi, ngaai ơi têêng matu, ađó ađek môôiq amêêq ama ađó ađek, đóng hayơq ađó tame bâân n'niên ơi kabaang?” 3Chuôq Jê-su ââi bóóp: “Eh rau ađó ađek têêng matu, kung eh rau amêêq ama ađó ađek, bơơi chêk nek đóng tarnêêng ưng Yaang Pleng bâân tapakah dhiq ađó ađek. 4Ađô nek rau kơng bhlơng đóng nôôq he đóng têêng tarnêêng ưng Yaang đu kayua thêi xók bhêêl dyơq tangêi. Hayum ravang tơk nek bhêêl kah ngaai ve chóóm têêng tarnêêng dyơq. 5Xók bhêêl thêi tơơt dhiq hóng katiêk, thêi nek taklaaq brương ưng hóng katiêk.” 6Xong xók praaq nôôq paraaq achêk, Ađó kathui leq katiêk, lơq palơq đơơk havi, Ađó lok xar bhiq, hayơq xut đóng ađó bhiq ađek dhiq bơơr hót mat ưng ađó ađek. 7Ađó praaq palơq manưih kabaang: “Phaai vôôiq buôch dhiq atông Si-lô-ê” (ađó lók nek “Bâân Kayua Vôôiq”). Kơi ađek, ađó vôôiq lơq buôch mat, hayơq brương mat kơi kaxu. 8Tââq ađek, nôôq manưih dharing tapóóng lơq nôôq manưih ơi lêi ađó ađek xók loom, tââq bhêêl ađó nek mưi manưih nhanhan, piđó móón: “Eh dhơq ađôk nek manưih biêh tơơt nhanhan?” 9Maphơn móón kơi ađô: “Ađek nek ađó achêk.” Maphơn lââng nek móón: “Mơq eh rau, dhơ kơi ađek, manưih ađek nek thê ađó.” Ađó nek bhiêk móón kơi ađô: “Chênh nek aku.” 10Kơi ađek hayơq, piđó móón palơq ađó: “Ng'kơi têêng mat amei chóóm brương?” 11Ađó ađek ââi bóóp: “Manưih bâân đóók nek Jê-su ơi lok abhiq lơq xut mat aku, hayơq kayua aku kơi ađô: ‘Phaai vôôiq tơk Si-lô-ê lơq buôch.’ Đóng hơq, xong xók vôôiq lơq buôch, aku chóóm bâân lêi.” 12Piđó móón palơq ađó: “Manưih achêk tơơt n'dhiq?” Ađó ađek ââi: “Aku kah n'nal.”

13Piđó đââng ađó ađek, manưih laloom ahei ơi kabaang, tơk nôôq manưih Pha-ri-si. 14(Xók achêk nek tangêi Sa-baat Chuôq Jê-su ơi lok abhiq lơq pơơh mat ưng ađó ađek xók tangêi achêk.) 15Tââq ađek, nôôq manưih Pha-ri-si vil kung tamóh ađó ng'kơi têêng hơq amei bâân brương mat. Hayơq ađó ađek móón palơq piđó: “Ađó achêk xut abhiq leq mat aku, lơq aku vôôiq buôch nek chóóm lêi.” 16Xong ađek, bơơr pe nak kalóóng nôôq manưih Pha-ri-si praaq: “Manưih ađô kah mađó leq Yaang Pleng, taai ađó kah huuiq jư tangêi Sa-baat.” Maphơn lââng nek móón: “Ng'kơi têêng mưi nak, nek đu ve matu, ve chóóm têêng nôôq kanal chrih kơi ađek?” Lơq hayơq ve rau tablah xóng ađêi kalóóng m'pơng piđó. 17Kơi ađek hơq piđó tamóh ađó kabaang machu dyơq: “Amei praaq hau rau leq Ađó ađek, tââq xók Ađó achêk ơi pơơh mat amei?” Nek hayơq, ađó móón kơi ađô: “Ađó achêk nek mưi manưih đââng truuih.” 18Taai kơi achêk, manưih Jo Thaaiq kah huuiq chiên leq ađó kơi ađó ađek ơi biêh kabaang hơq chóóm bâân lêi, patơk mơ xók piđó kayua dhaloong amêêq ama ưng ađó ađek, nek manưih ơi yươh kaliêng mat. 19Piđó tamóh amêêq ama ađó kơi ađô: “Ve alua ađôk nek akóón ưng bơơr nhưa, manưih đu bơơr nhưa móón nek tame n'niên ơi kabaang? Kơi ađek nek, ng'kơi têêng xók đôk ađó ađek chóóm lêi?” 20Kơi achêk nek amêêq ama ưng ađó ââi bóóp lơq nhiđó móón: “Bơơr yưa bâân n'nal kơi, ađôk nek akóón padruuih bơơr yưa, lơq kơi ađó bâân gluh n'niên ơi kabaang. 21Bơơi xók ađôk, ng'kơi têêng ađó chóóm bâân lêi, bơơr yưa kah n'nal, môôiq ngaai ơi pơơh mat ưng ađó, bơơr yưa kah n'nal. Nhan tamóh ađó; ađó dyóp gamak taha. Ađó e tư móón đóng achak araang ađêi.” 22Akonh kan ađó praaq nôôq paraaq kơi ađek taai nhiđó kakhin manưih Jo Thaaiq. Taai manưih Jo Thaaiq ơi markơi paraaq hayơq, kơi la ngaai đu đơơp móón Ađó nek Chuôq Kriit, manưih achêk bâân tađuôi lơh tââq đong gươl. 23Taai kơi ađek amêêq ama ađó ơi móón kơi ađô: “Ađó dyóp taha gamak, nhan tamóh ađó.” 24Kơi ađek hơq, tơk chu đu bơơr, piđó yua dhaloong manưih đu ơi glêh bâân kabaang lơq móón palơq ađó: “Phaai tapôông cha-iil tabah đóng Yaang Pleng. Nôôq he n'nal kơi manưih ađek nek mưi đu ve matu.” 25Kơi achêk hayơq ađó ađek ââi: “Ađó achêk nek manưih ve matu môôiq kah, aku kah n'nal. Aku n'nal mưi rau, ađek nek dhơ bâân kabaang, bơơi xók đôk aku chóóm bâân lêi.” 26Tââq ađek, piđó móón palơq ađó: “Manưih achêk ơi têêng harau đóng amei? Ađó ađek ơi pơơh mat amei ng'kơi dhơq?” 27Ađó ââi bóóp piđó: “Aku ơi truuih đóng nôôq pe aq, hơq nôôq pe kah xâng! Hau nôôq pe kiêng xâng lóóiq dyơq? Kah alua nôôq pe kung kiêng val xar môôn-đô ưng Ađó achêk kơi?” 28Lơq hayơq piđó chaleq chapeeng ađó lơq praaq: “Amei hơq nek môôn-đô ưng ađó ađek, dyơq nôôq yi nek môôn-đô ưng Môôi-se. 29Nôôq he n'nal kơi Yaang Pleng praaq palơq Môôi-se, bơơi manưih ađô, nôôq yi kah n'nal nek tââq tiq abhral.” 30Manưih padruuih parkonh chróót ââi lơq praaq palơq piđó: “Đôk nek rau ađô hơq nek chrih, kơi Ađó achêk ơi pơơh mat aku hơq nôôq pe kah n'nal Ađó achêk nek tââq tiq abhral. 31Nôôq he n'nal kơi Yaang Pleng kah tameng xâng nôôq manưih matu lơt, bơơi la ngaai đu ve lóóm bhi chap lơq têêng ting karnóq kiêng Ađó, nek Ađó tameng xâng manưih achêk. 32Tââq hanua hana, kah glêh bâân xâng chiên mưi chanak chanâ pơơh mat ưng manưih kabaang tââq bhêêl tame n'niên. 33La manưih ađô eh rau nek tââq Yaang Pleng, nek manưih achêk kah kơi têêng chóóm dhơ dharau tarnêêng.” 34Piđó ââi lóóiq lơq móón ađó: “Amei tabhơt bâân n'niên kalóóng matu lơt hơq amei dyơq pachóóm pató nôôq yi alua?” Hayơq piđó chuih ađó ađek gluh.

35Chuôq Jê-su xâng kơi piđó ơi dhalươq ađó gluh leq nguôi nek tabâân lum ađó, Chuôq praaq: “Amei ve huuiq dhiq Akóón Manưih kah?” 36Ađó ađek ââi bóóp lơq praaq: “Manưih achêk nek ngaai, Chuôq ơơi, đóng aku ve chóóm huuiq leq Ađó?” 37Chuôq Jê-su praaq palơq ađó: “Amei kung ơi lêi Ađó, lơq ađek nek manưih dyơq papraaq palơq amei ađôk.” 38Xók achêk, ađó móón: “Chuôq ơơi, aku huuiq”, lơq amei bhuôih kakoh Chuôq. 39Chuôq Jê-su praaq: “Aku ơi bhral kalóóng hóng katiêk ađô ơi rau praaq xêi, hơq đóng nôôq manưih kah lêi, ve chóóm bâân lêi, lơq nôôq manưih chóóm lêi val xar kabaang kapôk.” 40Tââq kalóóng kabhuh manưih Pha-ri-si xók tơơt dhiq ađek palơq Ađó, piđó xâng nôôq paraaq chêk, nek tamóh Ađó: “Ve kơq nôôq yi kung pâng kabaang óh?” 41Chuôq Jê-su praaq palơq piđó: “La nôôq pe pâng kabaang hơq alua nek nôôq pe kah ve matu, bơơi xók đôk nôôq pe móón kơi ađô: ‘Nôôq yi chóóm lêi.’ Nek hayơq, matu ưng nôôq pe biêh dyơq ađek.”