Tarnêêng Nôôq Sưưq-đô 17

1Xók achêk, xong xók vôôiq pagan Am-phi-bô-liit lơq A-bô-lô-ni, piđó vôôiq tơk Tê-sa-lô-ni-ka, dhiq ve mưi đong gươl ưng manưih Jo Thaaiq. 2Hayơq ting kơi kaxu ưng Phaau-lô, ađó mót nhoom palơq piđó, lơq kalóóng pe tangêi Sa-baat, ađó kluôh lók palơq piđó ting tââq Bha-aar Yaang Pleng, 3xók klôôq lók dyóp lơq paraaq pakah kơi Chuôq Paq Manưih kơng phaai đơơp ka-ai janah lơq mamông lóóiq tââq kan chêt kơi ađô: “Chuôq Jê-su ađô, Yaang hơq aku truuih pakah đóng adhi anó, chênh nek Chuôq Paq Manưih.” 4Masôôq manưih kalóóng m'pơng piđó bâân huuiq ting lơq chô maleq ting Phaau-lô palơq Si-la, dhơơm luch masôôq bơk manưih Hi-laap bhuôih kakhin Yaang Pleng, lơq kah m'bưưiq nôôq pađiil ve tarnêêng gamak. 5Dhơ kơi ađek, taai nôôq manưih Jo Thaaiq vaaih lóóm makhinh, hayơq xók ơi têêng payuur nôôq manưih đu aak chêk dhiq kalơng kanóón, karong mưi ganơr manưih bơk, piđó têêng nhôôn nhaauq kanóón ađô. Xong xók haluông leq đong Ja-sôôn, piđó chêk tabâân bơơr nhiđó đóng đââng pagluh toom dhanuôr. 6Bơơi xók kah bâân lêi bơơr nhiđó, piđó galôôi Ja-sôôn palơq nôôq adhi anó tôôh gluh toom nôôq kuôn dhiq kanóón, yuur lalơu kơi ađô: “Nôôq manưih têêng tapalâh katiêk ađô, piđó kung xók ve mat dhiq ađô, 7nek nôôq manưih hơq Ja-sôôn lơq tabhơt kabhuh ađô ơi kêch yaauq. Piđó xók têêng jơl lóóiq nôôq praaq kayua ưng Xê-xa, xók móón ve mưi bhua lââng, nek Jê-su.” 8Kơi ađek nek, nôôq piđó têêng đóng ganơr manưih bơk lơq nôôq kuôn dhiq kanóón nhôôn nhaauq xók xâng nôôq paraaq achêk. 9Hayơq xong xók đơơp jêên paklóóih tââq Ja-sôôn lơq nôôq manưih đu dyơq, nôôq kuôn ploh đóng piđó vôôiq.

10Bơơi hayơq, n'drươh leq hayum, nôôq adhi anó đââng miq Phaau-lô lơq Si-la vôôiq tơk Bê-rê, hơq bơơr nak ađô, xók tơk leq ađek, nek vôôiq leq đong gươl ưng manưih Jo Thaaiq. 11Xók achêk, nôôq manưih dhiq ađô nek bhuui marhaal lơh nôôq manưih dhiq Tê-sa-lô-ni-ka, piđó ơi pei đơơp taruuih palơq tabhơt lóóm lalua, xók dyóp tangêi chamet lêi Bha-aar Yaang Pleng, lêi nôôq rau achêk ve pâng kơi ađek môôiq kah. 12Hayơq, bơk manưih kalóóng sôôq piđó ơi huuiq, patơk masôôq pađiil Hi-laap leq kabhuh kavaan lơq kah m'bưưiq padruuih. 13Bơơi xók manưih Jo Thaaiq dhiq Tê-sa-lô-ni-ka bâân n'nal kơi paraaq ưng Yaang Pleng kung xók bâân truuih đuui taai Phaau-lô dhiq Bê-rê, nek piđó kung tơk dhiq ađô, paxuq lóóm lơq panhôôn dhanuôr. 14Kơi ađek nek, leq bhêêl achêk, nôôq adhi anó n'drươh đââng Phaau-lô vôôiq gluh tơk leq taxiiq, bơơi xók bơơr nhiđó Si-la lơq Ti-mô-thê nek dyơq tơơt dhiq ađek. 15Dyơq nôôq manưih kađââng kalơng Phaau-lô ơi đââng ađó tơk luch A-thêên hayơq xong xók đơơp chaleq pagơơi đóng Si-la lơq Ti-mô-thê kơi bơơr nhiđó phaai tơk palơq ađó ve đâh ve kre, nek piđó palâh val lóóiq.

16Xók achêk dhiq A-thêên, bơơi xók Phaau-lô đương rââm nhiđó, lóóm karnóq ađó bâân kabhróónh tââq hót kalóóng ađêi, xók lêi kanóón ađô ve bing bhlaai kabhêi. 17Kơi ađek nek ađó tarkaai kalóóng đong gươl nek palơq manưih Jo Thaaiq lơq nôôq manưih bhuôih haanh Yaang Pleng, palơq nôôq manưih ve bâân talum leq dyóp tangêi dhiq dham buôn baan. 18Bơơi masôôq manưih mađó kabhuh nôôq manưih hok yaal kabhuh Bhuui Sương lơq kabhuh Gơt Lóóm Malóóch kung tarkaai palơq ađó. Masôôq móón: “Dhươm praaq bơk ađô kiêng praaq hau rau?” Dyơq sôôq lââng nek praaq: “Nh'jau ađó ađek nek manưih truuih pachóóm leq nôôq yaang dhanuôr lââng,” taai ađó xók truuih đuui Taruuih liêm leq Chuôq Jê-su lơq mamông lóóiq. 19Maan drươh, xong xók jư ađó lóóiq, piđó đââng tơk Kabhuh takóh A-rê-ô-ba, móón kơi ađô: “Nôôq yi ve chóóm n'nal rau tame ađô, paraaq pachóóm xók bâân amei pachóóm, nek hau kah? 20Ơi amei đââng tơk nôôq chiên chrih katór nôôq yi. Kơi ađek hayơq nôôq yi kiêng n'nal nôôq rau achêk ve kiêng móón nek hau.” 21(Xók achêk, tabhơt manưih A-thêên lơq nôôq dhanuôr tââq lââng mamông dhiq ađek maar kah pei lóóm malóóch leq hau rau lââng lơh nek truuih chiên môôiq xâng chiên tame chrih.)

22Kơi ađek hayơq, xók bâân dyương dhiq m'pơng Kabhuh takóh A-rê-ô-ba, Phaau-lô pei praaq:

“Nhan móón nôôq pe nek manưih A-thêên, aku lêi nôôq pe bhlơng huuiq karơ ting dyóp kơi n'nal n'đơq. 23Ơi xók vôôiq blôônh lơq đóng chamet lêi nôôq kabhêi bhuôih haanh ưng nôôq pe, aku patơk mơ lêi mưi baang bhanuôih hơq piing ađek bâân chan chư: ‘Bhuôih Yaang Kah N'nal.’ Kơi ađek, yaang hơq nôôq pe bhuôih xók kah n'nal, achêk nek Yaang aku xók truuih đuui đóng nôôq pe. 24Yaang Pleng, Yaang ơi tavaaih pale katiêk lơq dyóp rau kalóóng ađek, nek Chuôq ưng pleng lơq katiêk, Ađó kah mamông kalóóng nôôq đong bhanuôih taai têi akóón manưih têêng. 25Ađó kung kah chóóm têêng yaauq taai tapaang têi akóón manưih kơi ngóq Ađó kơng marau marâ, taai chênh Ađó đóng leq dyóp n'dreh m'ma parmông, parhââm palơq dyóp rau lââng. 26Maan drươh, tââq mưi nak, Ađó ơi tavaaih dyóp dhanuôr akóón manưih mamông dhiq plok hóng katiêk, xong xók chaleq nôôq nil kah tadhơ lơq kalơng bhlưa xưưq xaang mamông ưng piđó, 27đóng chik chêk Yaang Pleng, đóng hayơq n'nal kơi ve kơq nek piđó ve chóóm chêk ravơq bâân Ađó hayơq bâân lêi Ađó, dhơ Ađó lalua kah tơơt dhiq changaai palơq dyóp mưi nak kalóóng nôôq he. 28Ơi kalóóng Ađó, nôôq he mamông, veq vôôiq lơq chaq ching, kung kơi masôôq manưih kalóóng nôôq manưih têêng thơ nôôq pe ơi praaq, kơi ađô: ‘Taai nôôq he kung nek akóón anaaq ưng Ađó.’ 29Kơi ađek, taai nek akóón anaaq ưng Yaang Pleng, nôôq he kah chóóm karnóq kơi Yaang Bhi Chap nek thê kơi nôôq kabhêi palơq vaang, môôiq baak, môôiq dhơl taai têi ragêi lơq koq karnóq ưng akóón manưih. 30Taai kơi ađek, xók Yaang Pleng ơi lơơi lơt klaang đơơi kah n'nal rau ađek, xók ađô Ađó praaq đóng akóón manưih, dyóp nak plok dyóp dhiq, phaai klôôq lóóm, 31taai Ađó ơi têêng mưi tangêi, hơq leq tangêi ađek Ađó e xêi xanêi klaang katiêk kalóóng rau bhơt liêm ơi Manưih hơq Ađó ơi chaleq, xók pakah praaq truuih lalua đóng dyóp nak palơq têêng Manưih achêk mamông lóóiq tââq kan chêt.”

32Xók achêk, xók xâng leq đu mamông lóóiq ưng manưih chêt, masôôq pacheh ađó; bơơi sôôq lââng nek móón: “Nôôq yi kung e xâng amei leq tarnêêng ađô machu dyơq.” 33Taai kơi ađek, Phaau-lô xooq tââq m'pơng bhlưa piđó. 34Bơơi nôôq manưih chêk ơi krong maleq ting ađó nek huuiq, kalóóng sôôq ađek patơk ve Đi-ô-ni-xi-uut, manưih kalóóng kabhuh takóh A-rê-ô-ba, mưi pađiil achak Đa-ma-ri, lơq nôôq manưih lââng palơq piđó.