Katu Bible Literal Text
1 Phi-e-rơ 4
Kơi ađek nek, taai Chuôq Paq Manưih ơi đơơp jarnah kalóóng manưih ti, hơq adhi anó kung phaai đơơp paróóng pasam palơq karnóq achêk, Ơi ngaai manưih ơi đơơp jarnah kalóóng manưih ti hơq ơi klah kang palơq matu lơt, đóng bhluuch ganah dyơq lóóiq kalóóng manưih ti, manưih achêk kah dyơq mamông đóng lóóm kiêng ưng akóón manưih dyơq, bơơi đóng kanóq kiêng ưng Yaang Pleng. Taai tangêi kaxe ơi lóóng lơh xưa ramưa đóng tarting bâân karnóq kiêng ưng dhanuôr katiêk lââng, xók mamông kalóóng rau huông hư malóóch n'thaam, ból plơ, ơm đah, blôônh pasương lơq bhuôih kakoh a-ô kabhêi đaang harek paper, hơq kalóóng chiên ađôk, piđó bâân chrih xâng xók adhi anó kah ting tapun piđó kalóóng mađó parloong ajuh tuh ưng rau cha blôônh bêi ba, hơq gluh paraaq praaq tamôôp; kabhuh piđó e đââng pagluh paraaq truuih đuui toom Yaang ravang xêi lơt manưih mamông palơq manưih chêt. Ơi taai rau ađek, Taruuih Liêm kung ơi bâân truuih pachóóm đóng nôôq manưih ađôk chêt aq, lơơi dhơ đóng piđó ơi đơơp xêi lơt ting akóón manưih kalóóng manưih ti, nek ađôk piđó ve chóóm mamông ting Yaang Pleng kalóóng lóóm kanóq.
Mat lââng, rau tatun xariêq ưng dyóp rau ơi tơk đan. Taai kơi achêk, phaai brương tabech lơq n'taach bhriêl pakah tapôông nôôq paraaq gavơh nhan; xók laloom tââm ve lóóm nh'nhơr bhơt lóóm koom đóng xóng ađêi, taai lóóm tanhơr e jađơr palââp bơk rau matu lơt; ve lóóm nh'nhơr tamóói palơq xóng ađêi hơq kah mơ m'bhoonh; lơq ting kơi dyóp ngaai ơi đơơp ơơn tarnêêng, pei vech ađó têêng yaauq đóng xóng ađêi, markơi nôôq manưih kataai jư lêi palơq ơơn phươk liêm dyóp rau n'dreh m'ma ưng Yaang Pleng. La ngaai truuih pachóóm nek makơi praaq paraaq ưng Yaang Pleng; La ngaai têêng yaauq nek yuur têêng kơi palơq praan đu Yaang Pleng đóng leq, đóng kalóóng dyóp rau Yaang Pleng bâân bhi haanh tââq Jê-su Chuôq Paq Manưih, nek Yaang đaang bâân cha-iil tabah lơq mataai raman patơk taluôn luôn kah bil. A-meen!
Adhi anó bơk nh'nhơr, óóq chóóm kakhin kapơn leq bóng óih rahôôq tơơt m'pơng adhi anó, xók avaaih bhral dhiq adhi anó đóng klêêu lêi, kơi ngóq rau chrih laaq vaaih tơk đóng ađêi, palâh lóóiq, mak mơ adhi anó ting tapâng n'đó mơ leq nôôq jarnah xangaat ưng Chuôq Paq Manưih, nek phaai bhuui marhaal mơ ađek, buôn đóng kalóóng rau pakah cha-iil tabah ưng Ađó, adhi anó bâân marhaal malaat, bing bhlaai bhuui sương. La adhi anó bâân praaq kađiq taai dhanóók Chuôq Paq Manưih, nek ve phươk đóng, tââq Yaang Liêm ưng rau cha-iil tabah lơq ưng Yaang Pleng, jaq dhiq adhi anó. Óóq ngaai kalóóng adhi anó đơơp jarnah kơi đu leng manưih, đu tatông papei, đu têêng aak, hamôôiq kơi đu kachrua leq chiên palââng, bơơi la đơơp jarnah taai nek manưih huuiq Chuôq nek manưih ađek óóq kachiit mat, hơq kalóóng dhanóók achak achêk phaai bhi haanh Yaang Pleng. Ơi taai ơi tơk bhêêl tarnââp rau xêi lơt tââq đong ưng Yaang Pleng; hơq La laloom tââm tââq nôôq he, nek rau tatun xariêq ưng nôôq manưih kah huuiq bhi Taruuih Liêm ưng Yaang Pleng nek e ng'kơi?
Lơq “La manưih bhơt liêm hadhơơp bâân trôông,
nek manưih kah huuiq bhi lơq manưih ve matu e tơơt n'dhiq?”
Taai kơi ađek, ngaai nôôq đơơp jarnah ting karnóq kiêng ưng Yaang Pleng phaai pajaau bhơt ravaai ađêi đóng Yaang Tavaaih yươq tadhơ kalóóng tarnêêng têêng liêm.
Katu Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.