Kaike Standard Traslation
मत्ती 4
येसुन छोए सेम्पा
(मर्क १:१२-१३; लुक ४:१-१३)
अन्न छाम्म सैतानलम छोए सेन्चेन भिह्तु पबित्र आत्मालम येसु सुनसान ठाउँग वप्पो। नू ङेथल ङिह्म रे ङेथल छान्न बेर बर्त छ्युङ तामी गुसिह्बो।1 तब छोए सेन्नानजै नुन स्याह् स्वास्वा र्वाबो, “ना परमेस्वरन ङोह्जो जेङ्न अन लुङवग रोता राःयो र्वार्वा आग्या भिना।”
जेङ्नै येसुई झब बिम्बो, “सर्पा ङ्याह्, ‘सिमि रोताई मात्र नङ्पा, जेङ्नै परमेस्वरन ङुरलै गेप्पान बचन पुरूजै सम्पु लुईनान।’” तब सैतानजै नू पबित्र सहर यरूसलेमग वव्वै आराधनालयन यू सोल्बो,2 रे नू र्वाबो, ङेन परमेस्वरन ङोह्जो जेङ्न स्यीह्लै माह्ः भोरा तैङर्वाङिन झाःम सर्पा ङ्याह्,
परमेस्वरजै जेँन दुतकाङ्मोः आग्या खेनान ङ्याह्
रे ख्युई नाः सेन्चे खेनान ङ्याह्,
तेमन्ता नान लेह् लुङ्ग थ्वाफान्नान ङ्याह्!3
येसुई नू र्वाबो, “सर्पा ङ्याह्, ‘नाई परमप्रभु जेँन परमेस्वरन छोए नसेह्ना।’”4 ह्याङ सैतानजै नू ला थोमदीग वव्वै सन्सारन राज्य पुरू रे नुन बैभब नू थम्बो, रे नू र्वाबो, “नाई खल्बू क्यापक्याप ङाः ध्वाः खेङिन, अन तैस्याङ पुरू ङा नाः बिन्नान ङ्युँ।” तब येसुई नू र्वाबो, “सैतान, ना ग्याङ्म रा! तैङर्वाङिन सर्पा ङ्याह्, ‘नाई परमप्रभु जेँन परमेस्वरग ध्वाः ख्या, रे नुन मात्र सेवा ख्या’।”5 तब सैतान नू ख्योवाख्योवा होई रे स्वर्गदुतवजै स्वास्वा नू सेवा खेबो।
येसुई गालीलग जेँन धोन सुरु खेपा
(मर्क १:१४-१५; लुक ४:१४-१५)
बप्तिस्मा बिन्नान्न यूहन्ना झ्यालखानाः थेप्पो र्वानान्न ल्होई ताह्ताह् येसु गालील प्रदेसग होई,6 रे नासरत ख्योवाख्योवा कफर्नहुमग वैवै स्याह् छ्युङ्मः जाःबो। अन सहर जबूलून रे नप्तालिन छेत्रग, योह्न नाः परि राँ। यसैया भबिस्यबक्ताजै र्वापान बचन झामखेखे पुरा रह्बो “जबूलून्न मुलुक रे नप्तालिन मुलुक, यर्दन चाङ्पुन धिङाः, समुद्रक्याँ, यहूदीन खोलोःन सिमिवन गालील, नाःतुमाः छ्युङ्नान्न सिमिवजै किम ताह्मदी रङ्पा ङ्याह्। कालन तिप्सोन देसग छ्युङ्नानवन लाह्ः ताह्मदी स्यार्पा ङ्याह्।” मन्न भेलालै ताह्फेरैफेरै येसुई र्वामः जाःबो, “तीपावलम होला, तैङर्वाङिन स्वर्गन राज्य ङेह्मः स्वा ताप्पा ङ्याह्।”7
येसुई ङाह् जुङ्नान्न लिपाः कताङ्पा
(मर्क १:१६-२०; लुक ५:१-११)
गालील-योह्न नाः लेन्तौ नुई पत्रुस र्वानान्न सिमोन रे नुन भाई अन्द्रियास, थिक्कोव ङ्योरुमग योह्ग जाल कह्पाई छ्युङ्पा रङ्बो। ख्यु ङाह् जुङ्नान्न सिमि ङ्याह्। नुई ख्युकाङ्मोः र्वाबो, “ङन ङिक जाः, रे ङा ङेनकाङ्मोः सिमिकाङ्मोः जुङ्नान्न सिमि दोङ्नान ङ्युँ।” तब मन्नै भेला जालव ख्योवाख्योवा ख्यु येसुन ङिक जाःबो। स्याह्लै वैतौवैतौ नुई घङ थिक्कोव ङेह्, जब्दियान ङोह्जोव याकूब रे नुन भाई युहन्नाः ख्युन पा जब्दियान ङ्याबो दोङाः जेँन जाल दोङ्यङ खेपा रङ्बो, रे नुई ख्युकाङ्मोः कताङ्बो। तब तुरुन्तै दोङा रे ख्युन पाः ख्योवाख्योवा ख्यु नुन ङिक जाःबो।
गालिलग येसुन सेवाकाई
(लुक ६:१७-१९)
आलै येसु ख्युन आराधनालयवग लह्नैलह्नै, राज्यन ल्होन् लः ताह्फेरैफेरै, रे सिमिकाङ्मोः ङिह्पान राँसा राँसान नाह्जा रे ल्होन नाह्प्पुवा ताःफानैफानै पुरू गालीलभरि तूह्बो। नुन मिह्नकै सिरिया देसभरि फेल्बो, रे खङ्नानव, आथबा राँसा राँसान नाह्जा रे पिरजै तेपफाम्पा, मुई सेम्पा, नाम्क्यान ताह्पा, रे ल्हो मगुल्नान्न नाह्जा रह्पाव पुरूग सिमिवजै नुन स्याह् सप्पो। नुई ख्युकाङ्मोः ताःफाम्बो। आलै गालील प्रदेस, देकापोलिस, यरूसलेम सहर, यहूदिया रे यर्दन चाङ्पुन धिङाःलैन मोङ किमव नुन ङिक जाःबो।
Source notes (7)
- Cross-reference प्रस ३४:२८
- Cross-reference लुक ४:९
- Cross-reference भजन ९१:११-१२
- Cross-reference कानुन ६:१६
- Cross-reference कानुन ६:१३
- Cross-reference मत्ती १४:३; मर्क ६:१७; लुक ३:१९-२०
- Cross-reference मत्ती ३:२
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.