Kaike Standard Traslation
मत्ती 15
खेपुलवन खाईकोए
(मर्क ७:१-२३)
तब कान फरिसीव रे कानुन लन्नान्न सिमिव यरूसलेम सहरलै स्वास्वा येसू लोप्पो। “नान चेलावजै खेपुलवन ल्हूलाम तैङ मङ्याङ्ङ? ख्युई झाचेन खेरे ङू लाह्ई मथूँ।” येसुई ख्युकाङ्मोः झब बिम्बो, “ङेन रे जेँन ल्हूलामन भिह्तु परमेस्वरन र्वापा तैङ मङ्याङ्नान? परमेस्वरजै र्वापा ङ्याह्, ‘जेँन पोमाः सम्मान ख्या आलै सुई जेँन पोमाः सराप खेँ नू सह्त त्वानान।’1 जेङ्नै ङेनजै र्वाङ, सुई जेँन पोमाः ‘सेह्ना ङेनकाङ्मोः बिनत्वानान्न भेति ङै परमेस्वरग फुल्तह्पा’ र्वाङिन नुई चन जेँन पोमान सम्मान खेमत्वानान। झामखेखे ङेन जेँनै ल्हूलामग जाःजाः परमेस्वरन आग्या फानै मत्वानान र्वार्वा छूँ। ङेन ख्वाकिबाव हो। यसैयाजै भबिस्यबानी र्वापान ल्होई ङेनकाङ्मोः थ्याक्कै दीङ: ‘ङुरजै चन अन सिमिवजै ङाः सम्मान खेँ! जेङ्नै ख्युन सम चन ङन स्यीह्लै लैः ग्याङ्म ङ्याह्। ख्युई ङाः आराधना खेपा ता भाछ्योवा ङ्याह्। तैङर्वाङिन ख्युई एकुरो सिमिजै दोङ्पान लूह्लाम मात्र लह्ङ्ङ।’”2
सिमी बाःपा दोङ्नान्न ल्होईव
मन्न छाम्म येसुई सिमिवन मोङग जेँन रह्म्म स्वा र्वार्वा र्वाबो, “ङन ल्होई ध्यान बिमबिम ङ्याना, ङुरलै झिङ जाःनान्न ल्होईजै सिमी बाःपा दोङ्नान नङ्पा। नुन ङुरलै खोलोः गेन्नान्न जिचजै नू बाःपा धोँ।” तब चेलाव येसुन स्याह् स्वास्वा नू र्वाबो, “तै नाः क्युई रह्बोयौ? नाई र्वापान ल्होईग फरिसीव सुतूबो।” येसुई र्वाबो, “स्वर्गन ङन पाई मजूपान तङ्पु पुरु पिङ्नान ङ्याह्। ख्युन वास्ता नख्या, ख्यु ता कानावन अगुवा काना जेङ्पा। कानादीजै घङ कानाः र्वाङिन तै ङ्योरुम लुह्मग मघ्यानान तै।”3 पत्रुसजै नू र्वाबो, “ङी अन द्रिस्तान्तन अर्थ र्वा।” येसुई र्वाबो, “तै ङेन हेँद्रि हामकोनौ? ङेनकाङ्मोः क्युई मह्या तै? सिमिन ङुरलै झिङ जाःपान ल्होई ता नुन फौग ताप्ङ। आलै ङिक ल्होलै गेग्गे वैङ। जेङ्नै सिमिन ङुरलै गेन्नान्न ल्होई नुन समलै स्वापा राह्नान। अनै ल्होईवजै नू बाःपा धोँ। तैङर्वाङिन सिमिन समन झिङलै नावा अलःव गेङ्ङ। अनै नावा अलःवजै खेपान कारन नुई सिमि सच्चे, जेँन ब्यभिचार खेचे, खुचे, लबारन साँचि बिन्चे, ल्हुई झाचेलैम धोन अलःव खेँ। अन ल्होईवजै सिमी बाःपा धोँ। जेङ्नै ल्हा मथुरे झाझा सिमी बाःपा मदोङ्नान।”
कनानी चिमिचान बिस्वास
(मर्क ७:२४-३०)
येसु मन ठाउँ ख्योवाख्योवा तुरोस रे सीदोन सहरक्याँ होई। स्याह्ई कनानी चिमिचादी येसुन स्याह् स्वास्वा फाईरा खेईखेई र्वाबो, “हे प्रभु, दाऊदन ङोह्जो, ङाः दया ख्या। ङन चमेः मुई सेम्पा राह्राह् मिह्दा तूरि देप्पा ङ्याह्।” जेङ्नै येसुई नू तये यङ झब मबिम्बो आलै नुन चेलावजै स्वास्वा नू छ्याःफुल्बो, “अन चिमिचाः फेरा, नु ता ङिन ङिह्ङिह् दाईदाई स्वायङ खेपा ङ्याह्।” जेङ्नै येसुई र्वाबो, “इस्राएलन सिमिवन मोल्पान लूपावन स्याह् फेप्पा जेङ्पा।” अन ताह्ताह् मन चिमिचाई येसुन ल्हेग खल्बू क्याप्क्याप र्वाबो, “प्रभु, ङाः फुरी ख्या।” जेङ्नै येसुई र्वाबो, “जेँन वैचावन रोता तलतल ख्युकोग बिन्चे लः मराह्नान?” आलै मन यहूदीन खोलोःन चिमिचाई र्वाबो, “जेङ्पा प्रभु, जेङ्नै ख्युवजै र्वार्वा जेँन मालिकवन तेबललै छार्पान रोतान तुकराव झाँ न।” तब येसुई र्वाबो, “हे चिमिचा नान बिस्वास किम ङिम्न। नाई चाहि खेपा लैमै राःयो।” आलै नुन चमेः मन्नै भेला ताःबो।
येसुई लैः सिमिकाङ्मोः ताःफाम्पा
येसु मन ठाउँ ख्योवाख्योवा गालील योह्न नाः नाः वैवै धुरग लिह्प्पो रे स्याह् छ्युङ्बो। ह्याङ लैः सिमिवन मोङ येसुन स्याह् स्वाबो। मन सिमिवजै लैः नाह्जा ङिह्पान सिमिकाङ्मोः वव्वै स्वाबो आलै येसुन ङू नाह्म्बो। लुल्या, काना, वाम्पा आलै नाम्ज्योवा मताह्नान मोङलम सप्पा ङ्याह्। येसुई अन पुरूग ताःफाम्बो। स्यीह् थाल कि, वाम्पाव ल्होई र्वापा, लुल्याव ताःपा, खोर्याव लेम्पा रे कानावजै मी रङ तैनान रह्पा रङरङ सिमिव हालाईबो, रे ख्युई इस्राएलन परमेस्वरन महिमा खेबो।
येसुई घङ किम मोह्ङग ख्वाःपा
तब येसुई जेँन चेलाकाङ्मोः जेँन स्याह् घ्वाघ्वा र्वाबो, “ङा अन मोह्ङ्ग दिसाँ, तैङर्वाङिन अजोव ङन ङ्याबो छ्युङ्पा त्या सुमङी रह्पा, आलै अजोवन ङ्याबो झाचेन भिह्तु तये मह्या। अजोवग फोङै फेस्सुम ङाः मीपा। तेमन्ता ख्यु लमग बेहोस रह्दरा।” चेलावजै नू र्वाबो, “अकेः ह्याल्म मोह्ङग अन सुनसान ठाउँग खालै झायाप सस्सै ख्वाःचे?” येसुई ख्युकाङ्मोः लोप्पो, “ङेन ङ्याबो रोता हाति थाम ङिह्पा?” ख्युई झब बिम्बो, “नेह् थाम रोता रे तयाः ङाह् कत्याःम ङिह्पा।” नुई मोह्ङ्ग साः छ्योवा र्वार्वा र्वाबो। नुई मन नेह् रोता रे ङाह् वव्वै परमेस्वरग मया रह्पा र्वामी क्युक्क्युई चेलाकाङ्मोः बिम्बो, आलै चेलावजै सिमिकाङ्मोः परेःबो। ख्यु पुरूजै बरङ्बरङ् झबो। रे चेलावजै लाःमा रह्पान तुकराव रूरू थाम नेह् खाप्च्योवा तुईबो। चिमिचाव रे वैचाव नङ्म झानानव हजार ली चोलोङ्चाव ङ्याह्। तब सिमिन मोङ किमवग भिदा खेतामी नु दोङाः चप्पो, रे मगादान्न छेत्रक्याँ होई।
Source notes (3)
- Cross-reference प्रस २०:१२; २१:१७; कानुन ५:१६; लेवी २०:९
- Cross-reference यसै २९:१३
- Cross-reference लुक ६:३९
Kaike Standard Traslation. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.